قازاقستاندا دارىگەرلەردىڭ جالاقىسى جاڭا تارتىپپەن تولەنۋى مۇمكىن

استانا. قازاقپارات - دەنساۋلىق سالاسىن كورپوراتيۆتىك باسقارۋ اياسىندا دارىگەرلەردىڭ جالاقىسىن ديففەرەنسيالدى جولمەن، ياعني جۇمىس ناتيجەسىنە قاراي تولەۋ قاراستىرىلعان، دەپ حابارلايدى قازاقپارات ءتىلشىسى.

ق ر دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنشا، بۇگىندە ديففەرەنسيالدى جولمەن جالاقى تولەۋ بويىنشا ادىستەمەلىك ۇسىنىستار بارلىق وبلىستارعا تاراتىلدى.

«وسى ماسەلەگە باسا نازار اۋدارۋ قاجەت. بىزدىڭشە، ىشكى رەزەرۆتەر بار. مەنەدجەرلەر ستراتەگيالىق جوسپارلار اياسىندا مەديتسينا قىزمەتكەرلەرىن ىنتالاندىرۋ شارالارىن، ياعني جالاقىنى ديففەرەنسيالدى جۇيەمەن تولەۋ ماسەلەسىنە كوڭىل ءبولۋى ءتيىس. ءبىز ونداي جۇيە بويىنشا ءتيىستى ادىستەمەلىك نۇسقاۋلاردى ازىرلەپ، بارلىق ايماقتارعا تاراتتىق»، - دەدى ە. ءبىرتانوۆ ۇكىمەتتىڭ بۇگىنگى وتىرىسىندا.

ءمينيستردىڭ سوزىنە قاراعاندا، بۇگىندە رەسپۋبليكا بويىنشا دارىگەردىڭ ورتاشا جالاقىسى 159 مىڭ تەڭگەنى قۇرايدى. ال ەكونوميكالىق ىنتىماقتاستىق جانە دامۋ ۇيىمىنا مۇشە مەملەكەتتەدە اتالعان كورسەتكىش ەكى-ءۇش ەسە ارتىق بولىپ تۇر. ديففەرەنسيالدى جۇيەنىڭ ارقاسىندا دارىگەرلەردىڭ جالاقىسىن ارتتىرۋعا مۇمكىندىك بار.

اۆتور: ارمان اسقاروۆ