ءونىمنىڭ «حالال» ەكەنىن ق ر مۇسىلماندارى ءدىني باسقارماسى انىقتايدى - مينيسترلىك
بۇل تۋرالى ۇكىمەت وتىرىسىنان كەيىن وتكەن باسپا ءسوز ءماسليحاتىندا ق ر ينۆەستيسيالار جانە دامۋ مينيسترلىگى تەحنيكالىق رەتتەۋ جانە مەترولوگيا كوميتەتىنىڭ ءتوراعاسى عالىمجان دوعالوۆ ايتتى، دەپ حابارلايدى «قازاقپارات» ح ا ا ءتىلشىسى.
كوميتەت ءتوراعاسىنا باق وكىلدەرى تاراپىنان: «حالال» دەپ بەلگىلەنگەن تاۋارلار كوبەيىپ كەتتى. ول ستاندارتتاردى كىم بەرىپ جاتىر؟»، - دەگەن ساۋال قويىلدى.
«بۇگىنگى كۇنى بۇل جۇمىسپەن قازاقستان مۇسىلماندارىنىڭ ءدىني باسقارماسى اينالىسىپ جاتىر. ولار ءبىرقاتار ونىمدەردىڭ ءتۇرىن بەكىتتى. سونىمەن بىرگە، وسى ستاندارتتاردى بەلگىلەيتىن مالايزيالىق دەپارتامەنتپەن جۇمىس جۇرگىزىلۋدە. دەمەك، مالايزيالىق تاجىريبە نەگىزگە الىنىپ وتىر. سونداي- اق ءوز تاراپىمىزدان سايكەسىنشە سەمينارلار وتكىزىپ، اۋىل شارۋاشىلىعى مينيسترلىگىمەن بىرلەسكەن جوبانى قولعا الدىق»، - دەيدى كوميتەت ءتوراعاسى.
ونىڭ ايتۋىنشا، قازاقستاندا ۇلتتىق اككرەديتتەۋ ورتالىعى بار. سول ورتالىقتا ونىمدەردى اككرەديتاتسيادان وتكىزۋگە دە بولادى.
«مەملەكەت تارابى ق ر ءدىن ىستەرى جانە ازاماتتىق قوعام مينيسترلىگىمەن بىرگە حالال ونىمدەرگە مەملەكەتتىك- ۇلتتىق ستاندارتتاردى ەنگىزبەۋ تۋرالى شەشىم قابىلدادى. ايتىپ وتكەنىمدەي، ءونىمنىڭ حالال ەكەنىن قازاقستان مۇسىلماندارى ءدىني باسقارماسى بەكىتەتىن بولادى. قازىرگى تاڭدا قازاقستان مۇسىلماندارى ءدىني باسقارماسىنىڭ جانىندا ءونىمدى اجىراتاتىن ۇيىم جۇمىس ىستەيدى»، - دەيدى عالىمجان دوعالوۆ.
