شىمكەنتتىڭ ەرىكتى جاستارى جاعدايى تومەن ادامدارعا ىستىق تاماق تاراتتى - فوتو

شىمكەنت. قازاقپارات - شىمكەنتتىڭ ەرىكتى جاستارى ءۇيسىز جۇرگەن جاندارعا ىستىق تاماق تاراتتى، دەپ حابارلايدى قازاقپارات ءتىلشىسى.

ەرىكتىلەر توبى ايازدى كۇنى كوشە كەزىپ، توڭىپ جۇرگەندەرگە وسىنداي قايىرىمدىلىق كورسەتتى. ءوز ۇيلەرىنەن ءتۇرلى تاعامدار دايىنداپ، باۋىرساقتار مەن بالىشتەرىن الا كەلىپتى. جاستار اتا- انالارىنىڭ كۇندەلىكتى ءجۇرىپ- تۇرۋىنا بەرگەن اقشاسىن ۇنەمدەپ، وسىنداي پايدالى ىسكە جاراتقان. ولاردىڭ بۇل باستاماسىن وقۋ ورىندارىنىڭ باسشىلارى دا قولداپتى. «ىستىق تاماق» شاراسى اياسىندا قاڭعىباس جاندار ءبىر مەزگىل اس ءىشىپ، قۋانىپ قالدى. جاستار قايىرىمدىلىق ءىستى قالاداعى ءۇش مەشىتتەن باستادى.

ولار كەزبەلەردەن بولەك اۋلا سىپىرۋشىلارعا دا، كوشەلەردە ساۋدا جاساپ تۇرعان جاندارعا دا ىستىق تاماق ۇلەستىردى. «ەلباسى سەرىكتەستەرى» ەرىكتىلەر ۇيىمىنىڭ ءتوراعاسى بيعالي ءابدىقۇلوۆتىڭ ايتۋىنشا، مۇنداي ساۋاپ ىستەر جاساۋ جاستاردى مەيىرىمدىلىككە، ءار نارسەگە جاناشىرلىق تانىتۋعا تاربيەلەيدى.

 

ايتا كەتەيىك، اتالعان ەرىكتىلەر ۇيىمى 5 جىل بۇرىن قۇرىلعان. سودان بەرى، قايىرىمدىلىق شارالاردىڭ باسى-قاسىندا جۇرەدى. قۇرامىندا 500 دەن اسا ستۋدەنت بار ۇيىمنىڭ وكىلدىكتەرى ەلىمىزدىڭ وزگە قالالارىندا دا قايىرىمدىلىق جاساۋمەن اينالىسادى.