سولتۇستىك قازاقستاندا قوقىس تاستاعان اۋىل تۇرعىنى تۇتقىندالدى
وبلىستىق ءى ءى د-نىڭ باسپا ءسوز قىزمەتى وقيعا اققايىڭ اۋدانى، چەركاسسكوە اۋىلىندا بولعانىن جەتكىزدى. ۋچاسكەلىك ينسپەكتور سەرعازى قاسەنوۆ وزىنە بەرىلگەن ايماقتى باقىلاۋ بارىسىندا جۇك كولىگىن بايقاپ قالعان. كولىكتىڭ جۇرگىزۋشىسى ەلدى مەكەننىڭ ماڭىنا قوقىستارىن تاستاپ كەتىپ بارا جاتقان.
«ءىستى تەكسەرۋ بارىسىندا ءمالىم بولعانى، قيالى اۋىلىنىڭ 26 جاستاعى تۇرعىنى چەركاسكوە اۋىلىنا وتىن الىپ كەلۋگە بارا جاتقان. اۋىلعا كىرە بەرەر تۇستا ول گرەيدەر ماڭىنا جۇك كولىگىنە سالىپ الىپ كەلگەن قوقىستارىن تاستاي سالعان. ونىڭ ارەكەتىنە قاتىستى «قالالار مەن ەلدى مەكەندەردىڭ كوگالداندىرۋ ەرەجەلەرىن بۇزۋ» ارەكەتى بويىنشا اكىمشىلىك حاتتاما تولتىرىلدى»، - دەپ حابارلادى باسپا ءسوز قىزمەتىندەگىلەر.
سوت شەشىمىنە سايكەس اۋىل تۇرعىنى 1 تاۋلىككە قاماۋعا الىندى.
جەرگىلىكتى پوليتسيا اقپاراتى بويىنشا، قاڭتار ايىندا وبلىس بويىنشا، قالالار مەن ەلدى مەكەندەردى كوگالداندىرۋ تالاپتارىن بۇزۋدىڭ 770 فاكتىسى انىقتالعان.
