كاكاۋ: بىزگە جانكۇيەر بولعان قازاقستاندىقتاردى قۇتتىقتايمىن
«بىرىنشىدەن، قارسىلاسىمىز - سەربيا قۇراماسىن كەرەمەت وتكەن ويىنمەن قۇتتىقتايمىن! ءبىز ءۇشىن وتە قيىن ويىن بولدى. ەكىنشىدەن، قازاقستان مەن مەنىڭ شاكىرتتەرىمدى بۇل جەڭىسپەن قۇتتىقتايمىن! بۇگىن ولار وزدەرىن جاقسى جاعىنان كورسەتتى. تاينان، يگيتا جانە دۋگلاستار الاڭدا كوپ ۋاقىت وتكىزدى، دەمالمادى دەسە دە بولادى. ولاردىڭ اراسىنان، كاپيتانىمىز دىنمۇحامبەت سۇلەيمەنوۆتى ەرەكشە اتاپ وتكىم كەلىپ وتىر. ول 36 جاسىندا كىرشىكسىز ويىن كورسەتتى. قۇرامانىڭ جاس ويىنشىلارى ەۋروپا چەمپيوناتىندا ءبىرىنشى رەت ويناعانىنا قاراماستان، ناتيجە جاقسى»، - دەدى ول.
باس باپكەردىڭ اتاپ وتۋىنشە، كەشەگى ويىندا قازاقستان قۇراماسىندا برازيليالىقتار عانا ەمەس، جەرگىلىكتى تۇلەكتەر دە دوپ تەبە الاتىنىن دالەلدەدى.
«ءتۇن ۇيقىسىن ءتورت ءبولىپ، بىزگە جانكۇيەر بولعان قازاقستاندىقتاردى قۇتتىقتايمىن! ءار ويىنشى، كوماندانىڭ ءار وكىلى سىزدەرگە العىس بىلدىرەدى. بۇل تۋرنيردە قازاقستاننىڭ نامىسىن قورعاۋ - ءبىز ءۇشىن ابىروي. ەكى رەت قاتارىنان قۇرلىقتىڭ ۇزدىك ءتورت كومانداسى قاتارىنا ەنىپ، تاريحتى قايتا جازىپ وتىرمىز. بارلىعىنا ۇلكەن راحمەت!»، - دەپ ءتۇيدى كاكاۋ.
ەسكە سالايىق، سلوۆەنيادا فۋتزالدان ءوتىپ جاتقان ەۋروپا چەمپيوناتىندا قازاقستان قۇراماسى جارتىلاي فينالعا جولداما الدى.
كاكاۋ جاتتىقتىراتىن قازاقستاندىقتار شيرەك فينالدا سەربيا قۇراماسىمەن كۇش سىناستى.
ۇلتتىق قۇرامانىڭ كەلەسى قارسىلاسى ۋكراينا نە يسپانيانىڭ ءبىرى بولماق. فينالدىق باسەكە 8 -اقپان كۇنى وتەدى.
ايتا كەتەيىك، قازاقستاندىق فۋتزالشىلار 2016 -جىلى سەربيادا وتكەن ەۋروپا بىرىنشىلىگىنە تۇڭعىش رەت قاتىسقانىنا قاراماستان، قولا جۇلدەگەر اتانعان بولاتىن.
