تۋريستەردى تامسانتقان ون ەل
الايدا قاي مەملەكەت قوناق كۇتۋدە الدا كەلەدى؟ وسى سۇراققا جاۋاپ ىزدەگەن بىرىككەن ۇلتتار ۇيىمىنىڭ دۇنيەجۇزىلىك تۋريستىك ۇيىمى وتكەن جىلدىڭ قورىتىندىسى بويىنشا جۇرتتىڭ جۇرەگىن جاۋلاعان 10 ەلدى اتادى.
فرانسيا مەملەكەتى قوناقجايلىعىمەن الدىڭعى ورىنعا شىققان. ءبىر بارعان كىسىنىڭ باسىن اينالدىراتىن نە قاسيەت بارىن اركىم وزىنشە جورامالدايدى. پاريج، كوكشىل جاعالاۋ، بوردو شارابى، ءالپى تاۋلارى... وسىنداي جەرلەردى قىزىقتاپ، ءدامدى اس ءىشۋ ءۇشىن فرانسياعا 90 ميلليون ادام ساپارلاپ بارعان.
بۇل جەردە فرانسيانىڭ تۋريستەر قابىلداۋدان بىرنەشە جىل قاتارىنان الدىڭعى ورىندى بەرمەگەنىن ايتا كەتكەنىمىز ءجون. مۇنىڭ ءوزى ەلدىڭ ەكونوميكاسى مەن ساياساتىنا تىكەلەي قاتىسى بار. «جاقسىدا جاتتىق جوق» دەگەندەي، جاقسى جەرگە جۇرت تا ۇيىرسەك كەلەدى.
يسپانيا سوڭعى 10 جىلدا العاش رەت ا ق ش- تى ارتقا تاستادى. الاڭدا بۇقامەن ارپالىساتىن ءارى ەش جەردە جوق ويىنىمەن قىزىقتىراتىن ەلگە بىلتىر 82 ميلليون قوناق تابان تىرەپتى (ا ق ش- قا 73 ميلليون تۋريست بارعان) . مۇنى ماماندار ا ق ش پرەزيدەنتى دونالد ترامپتىڭ ساياساتىمەن تىكەلەي بايلانىستىرادى. ويتكەنى يمميگراتسيا تۋرالى جاڭا زاڭعا ساي امەريكاعا ۆيزا الۋ كۇردەلەنە تۇسكەن. اسىرەسە، تاياۋ شىعىس پەن افريكادان كەلەتىندەر كۇرت ازايعان.
ءبىر جىلداعى قوناقتار:
فرانسيا - 88,9 ميلليون
يسپانيا - 82,2 ميلليون
ا ق ش - 72,9 ميلليون
قىتاي - 59,3 ميلليون
يتاليا - 57,8 ميلليون
تۇركيا - 39,9 ميلليون
مەكسيكا - 39,3 ميلليون
ۇلىبريتانيا - 38,7 ميلليون
گەرمانيا - 37,6 ميلليون
تايلاند - 34, 7 ميلليون
قىزىق دەرەكتەردىڭ ءبىرى - بيىل تۇركيادا تەك 5 ميلليون ادام رەسەيدەن كەلەتىندىگى جوسپارلانىپ وتىر. تۇرىكتەر 2016 -جىلمەن سالىستىرعاندا بىلتىر تۋريستەردى %30 كوپ قابىلداپتى. جۇرتتىڭ جايلى دا جىلى مەملەكەتكە مويىن بۇرۋىنىڭ ءبىر بەلگىسىن قازىردىڭ وزىندە تۋريستىك جولدامالاردىڭ كوپتەپ ساتىلا باستاعانىنان كورۋگە بولادى.
2017 -جىلى تۋريستەر قابىلداۋ جاعىنان جاقسى كورسەتكىشتەرگە مىنا ەلدەر جەتكەن:
نەپال +%39
ۆەتنام +%28
يزرايل %25
يندونەزيا +%23,5
تۋنيس +%23,5
كولۋمبيا +%21,5
جاپونيا +%18
يسلانديا +%16,5
ءۇندىستان +%15,5
وسىنداي دەرەكتەردى كەلتىرگەن رەسەي ماماندارى «ءبىز قانداي دەڭگەيدەمىز؟ » دەگەن سۇراققا جاۋاپ ىزدەگەن. ولاردىڭ ايتۋىنشا، ورىس ەلىنە ويلانىپ باراتىندار كوبەيگەن، ىقىلاس تومەن، قىزىعۋشىلىق از. سونىڭ سالدارىنان كورشىمىز 2016 -جىلمەن سالىستىرعاندا تۋريستەر قاتارىن%8,4 ازايتىپ الىپتى. ولاردىڭ ەندىگى ءۇمىتى بيىلعىدۇنيەجۇزىلىك فۋتبول چەمپيوناتىندا. وڭتۇستىك كورەيا قۇدايى كورشىسى سولتۇستىك كورەيا ۇستانعان ساياساتتىڭ تۇسىنىكسىزدىگىنەن 24 پايىزعا ازايعان.
بۇل دەرەكتەردىڭ قاتارىندا قازاقستان مۇلدە اتالمايدى. دەمەك، ءبىز قازاقستانعا كەلەتىن قوناقتاردىڭ قاتارىن كوبەيتە الماي وتىرمىز. سەبەپ- سالدارى كوپ. ونى قۇزىرلى ورىندار بىلەدى. ءبىراق الەمدە قازاق جەرىنىڭ جاعىمدى جارناماسى ءالى كۇنگە قالىپتاسپاعانىن مويىنداۋىمىز كەرەك.
جولداسبەك دۋاناباي
ايقىن گازەتى
