قازاق ەرتەگىسى جەلىسىمەن سالىنعان كوميكس امەريكا نارىعىندا ساتىلىپ جاتىر
زاماناۋي ديزاينمەن، تىڭ سيۋجەتپەن جاسالعان تۋىندى نەگە قازاقستاندا كەرەك بولماي قالدى؟ نەگە قازاق ەرتەگىلەرىنە سۇرانىس جوق؟ وسى جانە وزگە دە سۇراقتار تۋرالى قازاق كوميكس يندۋسترياسىندا العاشقى جول سالىپ كەلە جاتقان كاسىپكەرلەر، Ermek batyr جوباسىنىڭ اۆتورلارى ماديبەك مۇسابەكوۆ پەن بەكزات مىرزاحمەتوۆتەن سۇراپ بىلدىك.
قولىندا ازىن- اۋلاق اقشاسى بارلار مۋلتفيلم، كينو تۇسىرۋگە تىرىسىپ جاتادى. سىزدەر نەگە كوميكس جانرىن تاڭدادىڭىزدار؟ جالپى بۇل تۋرالى يدەيا قالاي تۋىندادى؟
ماديبەك: بالا كەزىمنەن كوميكستى جاقسى كورەم. ەرمەك باتىردى 2011 -جىلدان سالىپ كەلەمىن. وسى ءحوببيىم 2016 -جىلدان باستاپ جۇمىسقا اينالدى. باسىندا سيۋجەتى قاراپايىم بولاتىن. كەيىن قىزىقتى كەيىپكەرلەر قوسىلدى، دەتالدار پايدا بولدى. ءسىز ايتقانداي، مۋلتيپليكاتسيا، كينو ءتۇسىرۋ ويدا بار. ءبىراق، قازىر بىزگە كاپيتالدى از قاجەت ەتەتىن سالا ماڭىزدى بولىپ تۇر.
ەرتەگى جانرى قانداي؟
ماديبەك: Ermek batyr تاريحي- فانتاستيكالىق جانرداعى ەرتەگى، ىشىندە عاجايىپ موتيۆتەر دە بار. نەگىزىنەن 15 عاسىرداعى قازاق حاندىعى قالىپتاسقان كەز سۋرەتتەلەدى. سيۋجەت جەلىسىندە كوپ قازاق ەرتەگىلەرى، اڭىزدارى جاتىر. وسى ەرتەگىلەرگە زاماناۋي جاڭا تىنىس بەردىك.
بۇل كوميكستى قايدان ساتىپ الۋعا بولادى؟
ازىرگە اعىلشىن تىلىندەگى نۇسقاسى ساتىلىمدا. 1 سەرياسىنىڭ قۇنى 1,99 $. ايىنا 1 سەريادان جاريالاپ تۇرامىز. قازىر بىزدە 1 جىلعا ماتەريال دايىن.
نەگە ا ق ش نارىعىنا شىعىپ جاتسىزدار ؟ Amazon - ComiXology الاڭى سىزدەرگە قانداي مۇمكىندىك بەرەدى؟
ماديبەك: Amazon - ComiXology ۇلكەن اۋديتورياسى بار حالىقارالىق كوميكس ينتەرنەت دۇكەنى. قازىر ساتىپ العان قاراپايىم ادامداردىڭ دا، سىنشىلاردىڭ دا رەتسەنزيالارى جاقسى. بۇل دۇكەنگە شىعۋ ءۇشىن سۋرەت ساپاسى، سيۋجەت جاعىنان ارنايى تالاپتارعا ساي بولۋ كەرەك. وندا ءبىزدىڭ جۇمىسىمىز 3-ايداي تەكسەرۋدە جاتتى. 24 - قاڭتاردا عانا ساتىلىمعا شىعا باستادى. سونىمەن قاتار، 2016 -جىلى ءبىزدىڭ كوميكس رەسەيلىك ءىرى باسپا جۇرگىزگەن ساۋالنامادا ونلاين داۋىس بەرۋ بويىنشا تمد ەلدەرى ىشىندەگى ەڭ ۇزدىك كوميكس رەتىندە ۇزدىك ۇشتىككە ەندى.
قازاقستان نارىعى العاشقى قازاقشا كوميكستى قالاي قابىلدادى؟ ءوز وقىرماندارىڭىزدى تابا الدىڭىزدار ما؟
بەكزات: قازاقستان نارىعىندا شىعارىپ كوردىك. Salben Comics باسپاسىندا ەكى كىتابىمىز شىقتى. ءبىراق، پىكىرلەر جاقسى بولعانمەن، ساتىلىم تومەن بولدى. قازاقستاندا كوميكس يندۋسترياسىنا مۇلدە جاعداي جاسالماعان. قارجى تۇرعىسىنان كەلگەندە دە، مەملەكەتتىك ورگانداردان، مينيسترلىكتەن، اكىمدىكتەن قولداۋ تاپپادىق. كىتاپ، وقۋلىق، باسقا دا سالالارعا قولداۋ بار. ال كوميكس مۇلدە قاراستىرىلماعان. ءوز قارجىمىزدان 3,5 ميلليون تەڭگە سالدىق. وعان قۇرال- جابدىق، جۇمىسقا ارنالعان ديزاينەرلىك كىتاپتار ساتىپ الدىق. سونىمەن قاتار سۋرەتشى، اۋدارماشى، ديزاينەر ۆەرستالشيكتىڭ جۇمىسى بار. ونىڭ بارىنە قوماقتى قارجى كەرەك. يدەيا، امبيتسيا كوپ. سونى جۇزەگە اسىرۋعا قولداۋ جەتىسپەي تۇر. قازاقستاندا ستەرەوتيپ قالىپتاسقان. بۇل - بالا- شاعانىڭ ەرمەگى دەگەن سياقتى. ءبىراق، ءتۇبىن كورە بىلگەن ادامعا بۇل سالادا تابىس كوپ.
ماديبەك: ءبىز قازىر ينۆەستور ىزدەپ جاتىرمىز. ءبىزدىڭ يدەيالارىمىزدىڭ ءبىرى قازاق ەرتەگىلەرى كەيىپكەرلەرىنىڭ عالامىن جاساۋ. سول پەرسوناجدارىمىز ارقىلى كينو، مۋلتفيلم، ۆيرتۋالدى ويىن جوبالارىنا شىققىمىز كەلەدى. سوسىن نەگە ەرمەك باتىر قازاقستاندا ساتىلمادى دەپ سۇراپ وتىرسىز. ساتا المادىق. سەبەبى، ارنايى دۇكەندەر جوق. كىتاپ دۇكەندەرىنە قويىپ كوردىك. ءبىراق ولار كوميكس ونشا ساتقىسى كەلمەيدى. ءقازىر كىتاپ دۇكەندەرى تەك شەتەل ادەبيەتىن ساتىپ كۇن كورىپ وتىر.
ا ق ش ءۇشىن كوميكس تاڭسىق ەمەس. سىزدەردىڭ جۇمىستارىڭىز ولاردى نەسىمەن باۋراۋى ءتيىس؟
ماديبەك: ا ق ش كوميكس نارىعىندا قازىر جاڭا تاقىرىپتارعا تاپشىلىق بار. ولار ءۇشىن قازاق مادەنيەتى تاڭسىق بولارى راس. ماسەلەن، جاپونداردا نيندزيا، سامۋرايلار بار. بىزدە باتىر، بيلەر بار. تاريحتاعى نەشە ءتۇرلى جورىقتار، كەزىندە جارتى الەمدى بيلەگەن شىڭعىس حاننىڭ ءوزى نەگە تۇرادى؟ قىتايلاردا دراكون (اجداھا) بار. بىزدە دە ءوزىمىزدىڭ ايداھارىمىز بار. ياعني، قازاق مادەنيەتىن ەڭ تانىمال فورمات - كوميكس تۇرىندە شەتەلدە تانىتۋعا بولادى.
بەكزات: مادەنيەت - ەكونوميكانىڭ دامۋىنا تۇرتكى بولاتىن قوزعاۋشى كۇش. قازىر ءبىزدىڭ قازاقستانعا ينۆەستيتسيا كەرەك. قازاقستاندى ەشكىم بىلمەسە، تانىماسا، وعان ينۆەستيتسيا قايدان كەلەدى؟ ءارى اقشانى تەك ونەركاسىپكە عانا ەمەس، مادەنيەت سالاسىنا دا تارتۋعا بولادى. ماسەلەن، ءبىر عانا شەتەلدىك ستۋديا كينو تۇسىرەم دەسە، قانشاما جۇمىس ورنى اشىلار ەدى. ءبىز كوميكستەرىمىزدە تۋعان جەرىمىزدىڭ ەڭ ادەمى پەيزاجدارىن كورسەتۋگە تىرىستىق. ورتا عاسىرداعى ەسكى قالالار دا بار. مۇنىڭ ءبارى تۋريستەردى تارتۋعا سەپتىگىن تيگىزەدى. ماسەلەن ۆلاستەلين كولەتس جاڭا زەلانديادا ءتۇسىرىلدى. قازىر ول جەردى بارىپ كورگىسى كەلەتىندەردىڭ سانى وتە كوپ. ماسەلەن، كوميكس وتانى ا ق ش- تى ايتپاعاننىڭ وزىندە، جاپونيا كوميكس (manga) سالاسى بىر جىلدا 242,8 ميلليارد يەن (2,03 ميلليارد دوللار) تابىس تابادى.
بولاشاقتا قانداي جوسپارلارىڭىز بار؟
بەكزات: بولاشاقتا قازاقتى الەمگە تانىتاتىن كەيىپكەرلەر عالامىن جاساۋ ويدا بار. سول كەيىپكەرلەرىمىز ارقىلى كينو، ۆيرتۋالدى ويىن، انيماتسيالىق فيلم تۇسىرسەك دەگەن ارمان بار. ەرمەك باتىردان بولەك، ساق حانشايىمى تۇمار حانىم تۋرالى، التىن ادام كوميكستەر سەرياسىن جازۋدى باستايمىز.
اڭگىمەلەرىڭىزگە راحمەت.
اۆتور: گۇلميرا ءعوسمانالي
