راكتان ءولىپ كەتپەۋ ءۇشىن نە ىستەۋ كەرەك
ياعني اۋرۋدى اسقىنباي تۇرىپ جانە وزگە ورگاندارعا تاراپ كەتكەنگە دەيىن توقتاتۋدىڭ جولى بار.
جىلدار بويى قينالماي، ءدارى- دارمەككە اقشا قۇرتپاي، ءومىرىڭىز بەن دەنساۋلىعىڭىزدى ساقتاپ قالۋ جولدارىن بىلە ءجۇرىڭىز.
اۋرۋدى ەرتە باستان انىقتاۋ ءۇشىن بىرنەشە ەرەجەنى بىلگەن ءجون:
- ادام اعزاداعى قانداي وزگەرىستەرگە، سيمپتومدار مەن رەاكتسيالارعا ءمان بەرۋ كەرەكتىگىن ءبىلۋى قاجەت؛
- كۇماندى بەلگىلەر پايدا بولعان جاعدايدا، دارىگەرگە جەدەل ارادا قارالۋعا ىنتاسى بولۋى كەرەك؛
- ادام جاسىنا، جىنىسىنا، گەنەتيكاسى مەن تۇقىمىنا قاتىستى ەرتە باستان تەكسەرىلۋ جولدارىن ءبىلىپ جۇرگەنى ابزال؛
جالپى اۋىرىپ ەم ىزدەگەنشە، اۋىرماۋدىڭ جولىن ىزدەۋ كەرەكتىگىن حالقىمىز بۇرىننان ايتادى.
دارىگەر يزرايلدىك مەديتسينادا قولدانىلاتىن سيپاتتامالار تۋرالى ايتىپ بەردى.
قىرىق جاستان اسقاننان كەيىن ادام جىلىنا ءبىر رەت قان ءاناليزىن تاپسىرۋى كەرەك. ماسەلەن، ەگەر گەموگلوبين مولشەرى تومەندەپ كەتكەن بولسا، دارىگەر قان كەتۋ سەبەبىن اسقازاننان، ىشەك جولدارىنان نەمەسە گەمموروي تۇيىنىنەن ىزدەيدى. مۇندا ءسوز اسقازان جاراسى نەمەسە ونكولوگيا جايلى بولۋى مۇمكىن.
40 جاستان اسقان ايەلدەر جىلىنا كەمى ەكى رەت مامموگرافياعا ءتۇسىپ، جىل سايىن گينەكولوگ پەن مامولوگتىڭ قابىلداۋىنا بارعانى دۇرىس. سونداي- اق، جاتىر موينى وبىرىنا اپارىپ سوقتىراتىن پاپيلوما ۆيرۋسىنا تەكسەرىلگەنى ءجون.
50 جاستان اسقان ەرلەر قۋىقالدى بەزى وبىرىنا تەكسەرىلۋ ءۇشىن قان تاپسىرىپ، جىلىنا ءبىر رەت پروستاتاعا تەكسەرىلگەنى ابزال.
50 جاستان باستاپ ەرلەر دە، ايەلدەر دە جىلىنا كەمى بەر رەت گاسترو جانە كولونوسكوپيادان ءوتۋى قاجەت- اق. بۇل تەكسەرىس ارقىلى ەرلەر مەن ايەلدەر وبىرعا اكەپ سوقتىراتىن جابىسقاقتى تەكسەرەدى. بۇدان بولەك، جىلىنا ءبىر رەت كولورەكتالدى راكتى انىقتاۋ ءۇشىن ۇلكەن دارەت ءاناليزىن تاپسىرعانى دۇرىس.
سونداي- اق، تەرىدەگى مەلانومانى انىقتاۋ ءۇشىن جىل سايىن دەرماتولوگقا تەكسەرىلىپ تۇرۋ قاجەت.
اعزاداعى كۇماندى دەگەن كەز كەلگەن وزگەرىسكە ءجىتى ءمان بەرگەن ءجون: ءىشتىڭ قاتۋى، ءناجىس ءتۇرىنىڭ وزگەرۋى، دارەتحانا قاعازىنداعى قان ءىزى، ايەل ومىراۋىنىڭ تىعىزدالۋى نەمەسە قاتايۋى، تەرىدە داقتاردىڭ پايدا بولىپ، تەز ۇلكەيۋى - مۇنىڭ بارلىعى دارىگەرگە قارالۋ سيمپتومدارى.
جىلدار بويى ەمدەلىپ، ۋاقىت پەن اقشا جۇمساعانشا، ءبىر ساعاتىڭىزدى قيىپ دارىگەرگە قارالىڭىز، قىمباتتى وقىرمان!
