دەنساۋلىق مينيسترلىگى مايدىڭ قۇرامىندا قاۋىپتى زاتتىڭ بار ەكەنىن ەسكەرتتى

 استانا. قازاقپارات - بيىلدان باستاپ قازاقستاندا دۇكەن سورەلەرىنە تۇسكەن ماي ونىمدەرىندە قۇرامىنداعى ترانسمايلار تۋرالى اقپارات بولۋى قاجەت، دەپ حابارلايدى قازاقپارات ءتىلشىسى.

ق ر دەنساۋلىق ساقتاۋ مينيسترلىگى تاراتقان اقپاراتقا سايكەس، بيىلدان باستاپ ماي ونىمدەرىنە قاتىستى جاڭا نورمالار كۇشىنە ەندى.

 «ەندى مارگاريندەر، وسىمدىك- سارى ماي جانە وسىمدىك- ماي سپرەدتەرىنىڭ، قورىتىلعان وسىمدىك- سارى ماي جانە وسىمدىك- ماي، ارنايى ماقساتتاعى مايلار، ونىڭ ىشىندە اسپازدىق، كونديتەرلىك، نان ءپىسىرۋ، ءسۇت مايىن الماستىرعىشتار جانە قۇرامىندا ترانسمايلار بار باسقا دا ونىمدەردىڭ قاپتاماسىندا قانىققان ماي قىشقىلدارى مەن ماي قىشقىلدارى ترانسيزومەرلەرى تۋرالى قوسىمشا اقپارات بەرىلۋى ءتيىس (ونىمدەگى ماي قۇرامىنىڭ پايىزىمەن) » ، - دەلىنگەن ق ر د س م قوعامدىق دەنساۋلىقتى ساقتاۋ كوميتەتىنىڭ رەسمي حابارلاماسىندا.

 تەحنيكالىق رەگلامەنت بويىنشا اتالعان زاتتىڭ مولشەرى مايدىڭ جالپى قۇرامىنان 2 پروتسەنتتەن اسپاۋى ءتيىس.

دۇنيەجۇزىلىك دەنساۋلىق ساقتاۋ ۇيىمى ترانسمايلاردى تۇتىنۋ جۇرەك- قان تامىرى اۋرۋلارىنا، ابدومينالدى سەمىزدىككە، ديابەتكە، التسگەيمەر اۋرۋىنا، وكپە وبىرىنا، رەپرودۋكتيۆتىك فۋنكتسيالاردىڭ بۇزىلۋىنا، ءوت- تاس اۋرۋلارىنا الىپ كەلەتىنىن ەسكەرتەدى. ترانسمايلار قايتا وڭدەلگەن تاماق ونىمدەرىندە، مارگاريندەر جانە بۋتەربرود قوسپالارىندا، قۋىرىلعان تاعامدا، فاستفۋد جانە پىسىرىلگەن ناندا، سونداي- اق پيتستسالار، چيپسىلەر، پەچەنەلەر، فري كارتوبى، تاۋىق ەتىنەن ناگەتستەر جانە باسقا دا ونىمدەردە بولادى.

بۇگىندە كوپتەگەن ەلدەردە ترانسمايلاردى پايدالانۋعا تىيىم سالىنعان. ماسەلەن، شۆەيتساريا، اۆستريا، يسلانديا، ۆەنگريا، نورۆەگيا، شۆەتسيا، دانيادا ونەركاسىپتىك ترانسمايلار قۇرامىنىڭ جوعارعى شەگىن 100 گرامم مايعا 2 گرامم، ياعني جيىنتىق مايدىڭ 2 پروتسەنتى دەڭگەيىندە بەلگىلەنگەن. بيىلدان باستاپ ونداي كورسەتكىش قازاقستاندا، سونداي- اق ەۋرازيالىق ەكونوميكالىق وداققا مۇشە مەملەكەتتەردە دە بەلگىلەندى.

 «2018 -جىلدىڭ 1 - قاڭتارىنان كەيىن دايىندالعان، تاڭبالاۋىندا ماي قىشقىلدارى ترانسيزومەرلەرىنىڭ قۇرامى تۋرالى اقپاراتى جوق نەمەسە ولاردىڭ ۇلەسى بەلگىلەنگەن نورماتيۆتەن (2 پايىزدان) اساتىن ءونىمدى ساتىپ العان جاعدايدا تۇتىنۋشى قوعامدىق دەنساۋلىق ساقتاۋ كوميتەتىنىڭ اۋماقتىق ورگانىنا جۇگىنە الادى. تەحنيكالىق رەگلامەنتتەر تالاپتارىن بۇزعانى، سونىڭ ىشىندە سايكەس كەلمەيتىن ءونىمدى شىعارعانى ءۇشىن كاسىپكەرلىك سۋبەكتىلەرىنە 40 تان 200 گە دەيىن ايلىق ەسەپتىك كورسەتكىش كولەمىندە ايىپپۇل سالۋ كوزدەلگەن» ، - دەلىنگەن كوميتەتتىڭ رەسمي حابارلاماسىندا.