قازاقستان جەمقورلىققا قارسى كۇرەس رەيتينگىندە جوعارىلادى

استانا. قازاقپارات - قازاقستان حالىقارالىق رەيتينگتەردە سىبايلاس جەمقورلىققا قارسى ءىس- قيمىل بويىنشا ءوزىنىڭ كورسەتكىشتەرىن جاقسارتۋدا.

بۇل تۋرالى قازاقپارات ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ باسپا ءسوز قىزمەتىنە سىلتەمە جاساپ حابارلايدى.

جۋىردا سىبايلاس جەمقورلىققا قارسى كۇرەستە پروگرەستى باعالايتىن 9 رەيتينگتىك اگەنتتىكتەردىڭ ءبىرى الەمدىك سوت تورەلىگى جوباسى ءوزىنىڭ ەسەبىن جاريالادى.

سوڭعى جىلدارى قازاقستان ءبىرىنشى كەزەكتە سىبايلاس جەمقورلىقتىڭ پايدا بولۋىنىڭ سەبەپتەرى مەن جاعدايلارىن جويۋعا باعىتتالعان قازىرگى زامانعى سىبايلاس جەمقورلىققا قارسى ساياساتتى ۇستاناتىنىن اتاپ وتكەن ءجون.

اكسەنتتىڭ جازالاۋدان الدىن الۋ شارالارىنا ىعىسۋى حالىقارالىق رەيتينگتىك اگەنتتىكتەردىڭ وڭ باعاسىن الدى.

 الەمدىك سوت تورەلىگى جوباسىنىڭ باعاسى بويىنشا قازاقستان 0,51 ۇپاي جينادى جانە 2016 -جىلعى ناتيجەلەرمەن (73) سالىستىرعاندا 9  پوزيتسياعا كوتەرىلىپ، الەمنىڭ 113 ەلىنىڭ اراسىندا 64-ورىنعا يە بولدى.

 مۇنداي ناتيجەگە قول جەتكىزۋدىڭ نەگىزگى فاكتورلارىنىڭ ءبىرى - «سىبايلاس جەمقورلىقتىڭ بولماۋى» ينديكاتورى بويىنشا كورسەتكىشتىڭ 2016 -جىلمەن (0,43) سالىستىرعاندا 0,02 ۇپايعا ءوسۋى (0,45).

ۇقساس جاعىمدى وزگەرىستەر حالىقارالىق باسقارۋدى دامىتۋ ينستيتۋتىنىڭ جىل سايىنعى جاھاندىق باسەكەگە قابىلەتتىلىكتىڭ رەيتينگىندە دە اتاپ ءوتىلدى، وعان سايكەس 2017 -جىلى ءبىزدىڭ ەلىمىز رەيتينگتە 32-ورىنعا يە بولىپ، 2016 -جىلمەن (47) سالىستىرعاندا كورسەتكىشتى 15 پوزيتسياعا جاقسارتتى.

اتالعان رەيتينگتە جەكە ينديكاتور رەتىندە «پاراقورلىق جانە سىبايلاس جەمقورلىق» بەلگىلەنگەن، ول بويىنشا قازاقستاندا پروگرەسس 1,5 ەسە بايقالۋدا (2017 -جىلى - 4,26 ۇپاي، 2016 -جىلى - 2,52).

ازىرگە بۇل تەك ەكى رەيتينگتىك اگەنتتىكتىڭ مالىمەتتەرى. قازاقستاننىڭ سىبايلاس جەمقورلىققا قارسى ءىس- قيمىل سالاسىنداعى باستامالارى ترانسپارەنسي ينتەرنەشنلدىڭ سىبايلاس جەمقورلىقتى سەزگىشتىگى يندەكسىنە جالپى قالاي اسەر ەتەتىنىن ءبىز ءبىر ايدىڭ ىشىندە بىلەمىز.

 ايتا كەتەيىك، 21 - اقپاندا ترانسپارەنسي ينتەرنەشنلدىڭ سىبايلاس جەمقورلىقتى سەزگىشتىگى يندەكسى جاريالانادى.