ساعىنتايەۆ «جاھاندانۋ داۋىرىندەگى سيفرلىق كۇن ءتارتىبى» ە ا ە و فورۋمىنا قاتىسادى

استانا. قازاقپارات - بۇگىن الماتىدا قازاقستان رەسپۋبليكاسى پرەمەر-ءمينيسترى باقىتجان ساعىنتايەۆ «جاھاندانۋ داۋىرىندەگى سيفرلىق كۇن ءتارتىبى» ە ا ە و حالىقارالىق فورۋمىنا جانە ەۋرازيالىق ۇكىمەتارالىق كەڭەس وتىرىسىنا قاتىسادى.

بۇل تۋرالى primeminister.kz حابارلادى.

بۇگىن الماتىدا مەملەكەت باسشىسى نۇرسۇلتان نازاربايەۆتىڭ باستاماسىمەن «جاھاندانۋ داۋىرىندەگى سيفرلىق كۇن ءتارتىبى» فورۋمى وتەدى، ونىڭ اياسىندا يننوۆاتسيالاردى جانە تەحنولوگيالىق كاسىپكەرلىكتى دامىتۋ، بازالىق ينتەگراتسيالىق جوبالار، ەۋرازيالىق ەكونوميكالىق وداقتاعى ونەركاسىپتىك سيفرلاندىرۋ جانە اۋىل شارۋاشىلىعىن سيفرلىق ترانسفورماتسيالاۋدىڭ وزەكتى ماسەلەلەرى تالقىلانادى.

فورۋم جۇمىسىنا ارمەنيانىڭ پرەمەر-ءمينيسترى - ك. كاراپەتيان، بەلارۋستىڭ پرەمەر-ءمينيسترى - ا. كوبياكوۆ، قازاقستاننىڭ پرەمەر-ءمينيسترى - ب. ساعىنتايەۆ، قىرعىزستاننىڭ پرەمەر-ءمينيسترى - س. يساكوۆ، رەسەيدىڭ پرەمەر-ءمينيسترى - د. مەدۆەديەۆ، سونداي- اق ازەربايجان مەن تاجىكستاننىڭ رەسمي دەلەگاتسيالارى قاتىسادى.

ەسكە سالساق، 2017-جىلعى قازاندا جوعارعى ەۋرازيالىق ەكونوميكالىق كەڭەس وتىرىسىندا ە ا ە و مۇشە مەملەكەتتەردىڭ باسشىلارى 2025-جىلعا دەيىنگى سيفرلىق كۇن ءتارتىبىنىڭ نەگىزگى باعىتتارىن بەكىتتى، سونداي-اق پرەزيدەنت نۇرسۇلتان نازاربايەۆتىڭ ە ا ە و ەكونوميكاسىن سيفرلاندىرۋ بويىنشا ارنايى كەزدەسۋ وتكىزۋ تۋرالى باستاماسىن قولدادى.

كۇننىڭ ەكىنشى جارتىسىندا باقىتجان ساعىنتايەۆ ەۋرازيالىق ۇكىمەتارالىق كەڭەستىڭ شاعىن جانە كەڭەيتىلگەن قۇرامدارداعى وتىرىسىنا قاتىسادى.

ءىس-شاراعا ارمەنيا رەسپۋبليكاسىنىڭ پرەمەر-ءمينيسترى - ك. كاراپەتيان، بەلارۋس رەسپۋبليكاسىنىڭ پرەمەر-ءمينيسترى - ا. كوبياكوۆ، قىرعىز رەسپۋبليكاسىنىڭ پرەمەر-ءمينيسترى - س. يساكوۆ، رەسەي فەدەراتسياسىنىڭ پرەمەر-ءمينيسترى - د. مەدۆەديەۆ جانە ەۋرازيالىق ەكونوميكالىق كوميسسياننىڭ القا ءتوراعاسى ت. ساركيسيان قاتىسادى دەپ بولجانىپ وتىر.

شاعىن قۇرامدا تسيفرلىق كۇن ءتارتىبى ماسەلەلەرىن، سونداي-اق ىشكى نارىقتىڭ جۇمىس جاساۋى شەڭبەرىندەگى قاتىسۋشى ەلدەردىڭ مىندەتتەمەلەرىن قاراۋ جوسپارلانعان.

كەڭەيتىلگەن قۇرامداعى وتىرىستا قاتىسۋشىلار ماكروەكونوميكالىق جاعدايدى جانە ەاەو مۇشە مەملەكەتتەردىڭ اراسىنداعى ءوزارا ساۋدا جاعدايىن تالقىلايدى، اگروونەركاسىپ كەشەنى، ونەركاسىپ كەشەنى دامۋىنىڭ ورتاق بولجامدارىن جانە ەاەو مۇشە مەملەكەتتەردىڭ ەڭبەكشىلەرىن زەينەتاقىمەن قامسىزداندىرۋ ماسەلەلەرىن تالقىلايدى.

وتىرىس قورىتىندىسى بويىنشا ءبىرقاتار قۇجاتتاردى قابىلداۋ جوسپارلانعان.