مۇحامەدي ۇلى بۋرابايدى لاس- ۆەگاسقا اينالدىرۋدىڭ جولىن ۇسىندى

 استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلى بۋراباي كۋرورتىندا الەمدىك ماڭىزى بار شارالاردى وتكىزۋگە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«وكىنىشكە قاراي، بۋرابايدا الەمدىك دەڭگەيدەگى مادەني نىساندار جوق. نەگىزى، قازىرگى كەزدە اۋقىمدى قوعامدىق شارالار ارقىلى تۋريستەردى كوپتەپ تارتۋ تاجىريبەسى كەڭىنەن تاراعان. ماسەلەن، الەمدىك ويىن- ساۋىق ورتالىعىنا اينالعان لاس- ۆەگاستا ميللياردتاعان تۋريستەردى مادەني شارالار ارقىلى تارتادى. لوس- انجەلەستە ورنالاسقان «مەموريال كوليزەۋم» ستاديونىندا ەكى بىردەي وليمپيادا ءوتتى. بۇدان بولەك، الەمگە تانىمال جۇلدىزداردىڭ كونسەرتتەرى ءوتىپ تۇرادى. سول سياقتى تورونتو قالاسىنداعى ەير كانادا ورتالىعىندا جىل سايىن 200 دەن استام شارا ۇيىمداستىرىلادى. سونىڭ ارقاسىندا ون جىلدىڭ ىشىندە 2,5 ميلليارد دوللار پايدا ءتۇستى. بىزدەگى «بۋراباي كونگرەسس ورتالىعى» تۋرا سونداي كوپفۋنكتسيونالدى مادەني- ساۋىق ورتالىعىنا اينالادى دەگەن سەنىم بار. ول جەردە الەمدىك ماڭىزى بار شارالاردى وتكىزۋگە بارلىق جاعداي جاسالادى» ، - دەدى ا. مۇحامەدي ۇلى بۇگىن شۋچينسك- بۋراباي كۋرورتتىق ايماعىن دامىتۋ ماسەلەلەرىنە ارنالعان جيىندا.

ءمينيستردىڭ ايتۋىنشا، بۋرابايدا حالىقارالىق شارالاردى وتكىزۋ ارقىلى تۋريستەردى كوپتەپ تارتۋعا بولادى.

«بيىل جازدا العاش رەت حالىقارالىق بالالار فەستيۆالىن وتكىزەيىن دەپ جاتىرمىز. ونداي شارالار يسپانيا، تۇركيا جانە تاعى باسقا مەملەكەتتەردە ءجيى ۇيىمداستىرىلادى. نەگە دەسەڭىز، ءبىر بالامەن بىرگە مىندەتتى تۇردە بەس- التى ادام كەلەدى. ول - اكە- شەشەسى، ۇستازى، دوستارى جانە تاعىسىن تاعىلار. وسىلايشا، ىشكى ءتۋريزمدى دامىتۋعا مۇمكىندىك بار. سول سەبەپتى بيىلعى فەستيۆالدى استانامەن قاتار بۋرابايدا وتكىزگەندى ءجون كوردىك» ، - دەپ اتاپ كورسەتتى ا. مۇحامەدي ۇلى.