سيريادا قازاقستاندىق ءال- فارابي ورتالىعىنىڭ اشىلۋى بىرنەشە جىلعا سوزىلىپ كەتتى
بۇل تاريحي كەشەننىڭ تۇرعىزىلا باستاعانىنا 10 جىلدان اسىپ كەتتى، دەپ حابارلايدى «قازاقپارات» ح ا ا ءتىلشىسى.
كەشەن ءۇش قاباتتى عيماراتتان، مەشىت، ءال- ءفارابيدىڭ بەيىتى مەن زيارات ەتىپ كەلۋشىلەرگە ارنالعان ورىننان، كەڭسەلىك جانە وقۋ اۋماقتارىنان، كىتاپحانا مەن ەكسپوزيتسيالىق زالداردان تۇرادى.
ق ر مادەنيەت جانە سپورت مينيسترلىگىنەن ۋادە ەتكەندەي بيىل نىساندى پايدالانۋعا بەرۋ ماسەلەسىنە نۇكتە قويىلماق. كەشەن ۆەدومستۆونىڭ تۇراقتى تۇردە باقىلاۋىنا الىنعان. ول ءۇشىن ق ر م س م- ءنىڭ مادەنيەت جانە ونەر دەپارتامەنتىنىڭ ديرەكتورى الماز نۇرازحان جاۋاپتى.
«مەن وتكەن جىلى مينيسترلىككە كەلگەن ۋاقىتتا بىرنەشە شەشىلمەگەن سۇراقتار بار ەدى. ونىڭ ءبىرى - ءدال وسى داماسكىدەگى كەشەننىڭ جۇمىسى بولاتىن. قازاقستان مەن سيريا اراسىندا كەلىسىم بولعاندىقتان، بۇل وتە ماڭىزدى سۇراق. كەلىسىمگە 2008 -جىلدىڭ 21 - قاراشاسىندا قول قويىلدى. بۇل - ءبىزدىڭ ۇكىمەت قارجىلاندىرۋعا مىندەتتەلگەن وتە اۋقىمدى جوبا» - دەيدى ا. نۇرازحان.
ونىڭ ايتۋىنشا، قۇرىلىس جۇمىستارى 2012 -جىلعا دەيىن ءساتتى جۇرگىزىلگەن. سول كەزدىڭ وزىندە كەشەننىڭ قۇرىلىسى اياقتالىپ قويىپتى. كەلىسىمگە سايكەس، ورتالىق پەن كەسەنە جۇمىسى اياقتالعاننان كەيىن سيريا ۇكىمەتىنە بەرىلىپ، مۋزەيدىڭ ودان كەيىنگى جۇمىسى بويىنشا قوسىمشا كەلىسىمدەر جاسالۋى كەرەك ەدى. جوسپار بويىنشا، نىساندى قولدانىسقا ەنگىزۋ جاعىن سيريالىق تاراپ، ال ۇلى ويشىل تۋرالى اقپاراتتار مەن تاريحي مالىمەتتەردى جيناۋ جۇمىسىمەن قازاقستاندىق تاراپ اينالىسۋى كەرەك ەدى. الايدا 2013 -جىلى سيريادا قاقتىعىستار باستالىپ كەتكەن.
«ەكى جاقتى كەلىسىمگە سايكەس، وتكىزۋ- قابىلداۋ قۇجاتىنا قاشىقتىقتا قول قويىلعان. الايدا سيريا ۇكىمەتى نىساندى قابىلداعان جوق. سەبەبى، وندا ۇكىمەت اتاۋلىنىڭ ءوزى جوق ەدى. سوندىقتان، ءبىزدىڭ مينيسترلىك نىساندى رەسمي تاپسىرىلۋىنا دەيىن ساقتاۋ تۋرالى شەشىم قابىلدادى» ، - دەيدى دەپارتامەنت ديرەكتورى.
بىرنەشە جىل بويى اشىلۋعا دايىن ورتالىق پەن كەسەنە سول كۇيىندە تۇر. نىساندى سودان بەرى ءۇش كۇزەتشى مەن جاۋاپتى دوكتور سۋلەيمان زيادا باقىلاپ كەلەدى. ولاردىڭ جۇمىسى ءۇشىن «قازرەستاۆراتسيا» ر م ك ءوز قاراجاتىنان ءۇش جىل بويى اقشا تولەپ كەلدى.
«زاڭدى تۇرعىدا بۇنى دۇرىس دەۋگە كەلمەيدى. نەلىكتەن ءبىزدىڭ جۇمىسشىلار تاپقان اقشاسىن بەرۋى كەرەك. ءبىراق، مورالدىق تۇرعىدا ءبىز باسقا قادامعا بارا المادىق. ادامگەرشىلىك تۇرعىسىنان ويلادىق» ، - دەيدى الماز نۇرازحان.
وسىلايشا، سيرياداعى جۇمىسشىلاردىڭ ايلىعى ءۇشىن 2014 - جىلى 2,8 ميلليون، 2015 -جىلى 7,1 ميلليون ، 2016 -جىلى 1,9 ميلليون تەڭگە بولىنگەن. وتكەن جىلى كۇزەتشىلەر مەن دوكتوردىڭ اقشا الۋى توقتاپ، قازاقستان ورتالىق پەن كەسەنەنى تاستاپ كەتكەندەي كورىنگەن.
انىقتالعانىنداي، «قازرەستاۆراتسيا» ر م ك اقشا اۋدارىلىپ وتىرعان كومپانياعا قاراجات جولداي الماي قالىپتى. 2016 -جىلى ونداعى كومپانيا تۇرعىلىقتى جەرىن اۋىستىرعان. سوندىقتان، «قازرەستاۆراتسيا» اقشانىڭ جەتكەنى نەمەسە جەتپەگەنىنە كوز جەتپەيتىندىكتەن، قاراجات جولداۋدى توقتاتىپ قويعان.
«ءبىز قازاقستاندا سيريالىق دياسپورانىڭ وكىلى سامير ءالي دەرەحپەن، قور ديرەكتورى ساپار ىسقاقوۆپەن بايلانىستىق. ولاردىڭ بەرگەن اقپاراتىنا سايكەس، نىسان ءالى كۇنگە دەيىن كۇزەتىلىپ تۇر. جالعىز عانا تىلەكتەرى - اقشا تولەپ بەرۋدى سۇراپ وتىر. ولارمەن وتكەن جىلدىڭ جەلتوقسانىندا سويلەسكەندىكتەن، وسى جىلدىڭ اقپان- ناۋرىز ايلارىندا ماسەلە شەشىمىن تابار دەپ وتىرمىز (.. .) سوعىس ءجۇرىپ جاتقان ەلدە بۇنداي ماسەلەگە ءمان بەرىلمەيتىنى انىق. سيريا بيلىگىنىڭ بىزگە وزدەرىنىڭ شىعىپ وتىرعانىن - ءبىزدىڭ ديپلوماتتاردىڭ ءساتتى جۇمىسىنىڭ ناتيجەسى دەگەن ويدامىز. ءبىز قازىرگى ۋاقىتتا سىرتقى ىستەر مينيسترلىگىمەن بىرىگىپ، كۇردەلى جاعدايدان لايىقتى تۇردە شىققىمىز كەلەدى. ورتالىقتىڭ الداعى ۋاقىتتا دامۋىنا ءۇمىت ارتامىز» ، - دەيدى الماز نۇرازحان.
ءال- فارابي ورتالىعى مەن كەسەنەسىنىڭ اشىلۋى ءالى دە ءبىرشاما ۋاقىتقا سوزىلۋى مۇمكىن. ورتالىق شامامەن بىرنەشە ايدان سوڭ اشىلىپ قالۋى ىقتيمال.
