قازاقستاندا قاي سالادا جەمقورلىق ءىسى كوپ تىركەلەدى

 استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ ءتوراعاسى اليك شپەكبايەۆ سىبايلاس جەمقورلىققا قاتىستى قىلمىس ءجيى تىركەلەتىن سالالاردى اتادى، دەپ حابارلايدى «قازاقپارات» ح ا ءا ءتىلشىسى.

«سىبايلاس جەمقورلىققا قاتىستى انىقتالعان قىلمىستىڭ كوبىن اكىمدىك قىزمەتشىلەرى (718) ، ىشكى ىستەر ورگاندارىنىڭ قىزمەتشىلەرى( 323) مەن كۆازيمەملەكەتتىك سەكتوردىڭ جۇمىسشىلارى (239) جاساعان. ءبىلىم سالاسىندا (201) ، اۋىل شارۋاشىلىعى (183) ، قۇرىلىس (158) ، دەنساۋلىق ساقتاۋ (101) سالالارىندا جەمقورلىق قىلمىسقا بارۋ تاۋەكەلدەرى ءالى دە جوعارى بولىپ تۇر» ، - دەيدى اليك شپەكبايەۆ ۆەدومستۆونىڭ القا وتىرىسىندا.

اگەنتتىك ءتوراعاسىنىڭ ايتۋىنشا، 2017 -جىلى جۇيەلى مىنەزدەمەسى بار 108 جەمقورلىققا قاتىستى قىلمىس تىركەلىپ، 320 ادام قىلمىستىق جاۋاپكەرشىلىككە تارتىلعان. جالپى، اگەنتتىك وتكەن جىلى 1835 سىبايلاس جەمقورلىققا قاتىستى ءىستىڭ بەتىن اشقان. 5 ۇيىمداسقان قىلمىستىق توپتىڭ ارەكەتىنە توسقاۋىل قويىلىپ، قولعا الىنعان شارالاردىڭ ارقاسىندا مەملەكەت قازىناسىنا 14 ميلليارد تەڭگە قايتارىلعان. قىلمىستىڭ باسىم كوپشىلىگى - پاراقورلىققا بايلانىستى (40 پايىز نەمەسە 988) تىركەلىپ وتىر.

 «جالپى، سىبايلاس جەمقورلىققا قاتىستى جالپى قۇنى 15,8 ميلليارد تەڭگە شىعىن كەلتىرگەن زاڭ بۇزۋشىلىق انىقتالىپ، بۇگىنگە دەيىن ول سومانىڭ 88 پايىزى، ياعني 14 ميلليارد تەڭگەسى قايتارىلدى. مەملەكەتتىك باعدارلاماردى جۇزەگە اسىرۋ بارىسىندا جاسالعان 400 جەمقورلىق قىلمىسى اشكەرە بولدى. ول باعىتتا مەملەكەتكە 5,3 ميلليارد تەڭگەنىڭ شىعىنى كەلتىرىلگەن. بۇگىنگى تاڭدا ول سومانىڭ 87 پايىزى، ياعني 4,6 ميللياردى قايتارىلدى» . - دەيدى اليك شپەكبايەۆ.