ەرلان ءبىلال سوتى: «سەزام» ديرەكتورى پارانى قالاي بەرگەنىن ايتتى

الماتى. قازاقپارات - المالى اۋداندىق سوتىندا م. اۋەزوۆ اتىنداعى قازاق مەملەكەتتىك اكادەميالىق تەاترىنىڭ ەكس-ديرەكتورى ەرلان ءبىلالدىڭ ءىسى بويىنشا سوت تالقىلاۋى جالعاسىپ جاتىر، دەپ حابارلايدى قازاقپارات ءتىلشىسى.

سوت بارىسىندا «سەزام» قورىنىڭ ديرەكتورى قايرات بايانوۆ ەرلان بىلالگە اقشانى قالاي بەرگەنى تۋرالى ايتىپ بەردى.

«سەزام» ديرەكتورى ەڭ العاش رەت سوتتالۋشىمەن 2017 -جىلدىڭ قازانىندا كەزدەسكەن. سول كەزدەسۋ بارىسىندا سىياقى كولەمى تۋرالى ۋاعدا بولعان. بايانوۆ بىلالگە 1,5 ميلليون تەڭگە كولەمىندە اقشانى ءبولىپ-ءبولىپ بەرۋى ءتيىس بولعان.

«سوما تۋرالى سويلەسپەدىك. ول (ەرلان ءبىلال - اۆت. ) 1,5 ميلليون تەڭگەنى مەڭزەدى. جارايدى، كورەيىك دەدىم»، - دەدى بايانوۆ.

كەيىنىرەك بايانوۆ تەرگەۋ ورىندارىمەن بىرگە جۇمىس جاساي باستاعان.

العاشقى 600 مىڭ تەڭگەنى بايانوۆ كونۆەرتكە سالىپ 3 -قاڭتارعا دەيىن بەرگەن. ءبىراق ءبىلال اقشانى تەزىرەك بەرۋىن سۇراپ، قايتا-قايتا مازالاعان.

قالعان 900 مىڭ تەڭگەنى بايانوۆ 4 -قاڭتاردا بەرۋى ءتيىس بولدى. كۋاگەر بايانوۆ 600  مىڭ تەڭگەنى قايتارۋعا نيەتتى ەكەنىن ايتتى.

بۇعان دەيىن كۋاگەر بولىپ كەلگەن «سەزام» قورىنىڭ ديرەكتورى قايرات بايانوۆ ازاماتتىق ارىزدانۋشى بولۋعا نيەت بىلدىرگەن ەدى. وعان ءبىلالدىڭ قورعاۋشىسى مەن مەملەكەتتىك ايىپتاۋشى قارسى شىعىپ، بۇل ىستە تەك مەملەكەت جاپا شەگۋشى ەكەندىگىن جەتكىزدى.

ءىس ماتەريالدارىنا قاراعاندا، ەرلان ءبىلال «سەزام» قايىرىمدىلىق شىعارماشىلىق قورىنىڭ باسشىسى قايرات بايانوۆتان 1,5 ميلليون تەڭگە كولەمىندە پارا الماق بولعان. بۇل قارجىعا تەاتر عيماراتىندا بالالارعا ارنالعان قويىلىم ءوتۋى ءتيىس بولاتىن.

الدىڭعى سوت وتىرىسىندا ەرلان ءبىلال 600 مىڭ تەڭگەنى قارىزعا تاراتىپ تاستاعانىن ايتقان ەدى.

ەسكە سالا كەتەيىك، الماتىدا م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى، بەلگىلى اكتەر ەرلان ءبىلال 1,5 ميلليون تەڭگە كولەمىندە پارا الىپ جاتقان جەرىنەن ۇستالعان بولاتىن.

گۇلميرا عوسمانالي