قازاقستاندا ۋاقىتشا تىركەۋدى تەلەفون حابارلاماسى ارقىلى ۇزارتۋ قىزمەتى ەنگىزىلەدى

استانا. قازاقپارات - «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسشىسى ابىلايحان وسپانوۆ جاڭا قىزمەتتىڭ ىسكە قوسىلاتىنى تۋرالى مالىمدەدى، دەپ حابارلايدى قازاقپارات ءتىلشىسى.

ونىڭ سوزىنە قاراعاندا، جاقىندا ۋاقىتشا تىركەۋدى SMS- حابارلاما ارقىلى ۇزارتۋ قىزمەتى ەنگىزىلەدى. اتالعان شەشىم ۆەدومستۆوارالىق كوميسسيانىڭ كەزەكتى وتىرىسىندا قابىلداندى.

«ۋاقىتشا تىركەۋدىڭ اياقتالۋىنا ءبىر كۇن قالعاندا تىركەۋدى ۇزارتۋ تۋرالى SMS- حابارلاما جىبەرىلەدى. ادام ءوز كەلىسىمىن بەرسە، ۋاقىتشا تىركەۋ ۇزارتىلادى. بۇدان بولەك، ءدال سونداي حابارلاما ءۇيدىڭ يەسىنە دە جىبەرىلەدى. ول دا ۋاقىتشا تىركەۋدى ۇزارتۋعا ءوز كەلىسىمىن بەرۋى كەرەك. اقپاراتتىق بازادا ءۇي يەسىنىڭ مەنشىك قۇقىعى راستالعاننان كەيىن ۋاقىتشا تىركەۋ اۆتوماتتى تۇردە ۇزارتىلادى»، - دەپ جازدى ا. وسپانوۆ Facebook جەلىسىندەگى جەكە پاراقشاسىندا.

ايتا كەتەيىك، جاڭا قىزمەتتى پايدالانۋ ءۇشىن ۋاقىتشا تىركەۋدى ۇزارتاتىن ادام دا، ءۇيدىڭ يەسى دە موبيلدى ازاماتتار بازاسىندا تىركەلۋى ءتيىس. ال جەكە سايكەستەندىرۋ ءنومىرىن موبيلدى تەلەفونمەن بايلانىستىرۋدى Egov پورتالىنىڭ جەكە كابينەتىندە، ءيا بولماسا، كەز كەلگەن حالىققا قىزمەت كورسەتۋ ورتالىعىندا جاساپ الۋعا بولادى.