استانادا العاش رەت «مۇز موتوسيكلدەرى» جارىسى وتەدى
قازاقستاننىڭ اۆتوموتوسپورت فەدەراتسياسى استانادا 2018 -جىلى مۇز ۇستىندەگى سپيدۆەيدەن حالىقارالىق موتوسيكل فەدەراتسياسى (FIM) تاراپىنان جەكەلەي الەم چەمپيوناتىنىڭ 1- فينالىن وتكىزۋگە دايىندىق جۇمىستارىن جۇرگىزەدى.
اتالمىش جارىس 2018 -جىلدىڭ 3-4 -اقپانىندا ەلورداداعى الاۋدىڭ مۇز سارايىندا وتەدى. ايتا كەتەرلىگى، 2018 -جىلعى ماۋسىمنىڭ العاشقى بەس فينالىنىڭ ءبىرىنشى كەزەڭىن قازاقستاننىڭ استاناسىندا وتكىزۋدى سەنىپ تاپسىردى. ال قالعان باسقا فينالدار ءداستۇرلى تۇردە رەسەيدە، گوللانديادا جانە گەرمانيادا وتەدى.
ايتا كەتۋ كەرەك، قازاقستان مۇز ۇستىندەگى سپيدۆەيدەن جەكەلەي الەم چەمپيوناتىنىڭ كەزەڭدەرىن وتكىزۋدە كوپ تاجىريبە جيناقتادى. اتاپ ايتقاندا، سوڭعى ءۇش جىلدا الماتىداعى «مەدەۋ» جاساندى مۇز ايدىنىندا جارىس ءوتتى.
استاناداعى الاۋ مۇز سارايىندا الەمدىك دەڭگەيدەگى جارىستار وتكىزۋ بويىنشا دايىندىق جۇمىستارى جۇرگىزىلدى. حالىقارالىق موتوتسيكل فەدەراتسياسىنىڭ (FIM) ارنايى كوميسسياسى جەكەلەي الەم چەمپيوناتىنىڭ فينالىنا ارنالعان ارەنانى جانە بارلىق قاجەتتى ينفراقۇرىلىمدى تەكسەردى. كوميسسيا جەتەكشىسى دايىندىق دەڭگەيى FIM تالابىنا سايكەس ەكەنىن جانە فەدەراتسيا وكىلدەرى وسى كەزەڭدە قازاقستاندىق ۇيىمداستىرۋشىلاردىڭ جۇمىسىنا قاناعاتتانعانىن اتاپ ءوتتى.
«استانا جارىستارىمىزدى العاش رەت وتكىزگەلى جاتىر، - دەپ اتاپ ءوتتى FIM حالىقارالىق موتوتسيكلدىك فەدەراتسياسىنىڭ تراسسالىق كوميسسياسىنىڭ ديرەكتورى ارماندو كاستانيا. - ايتۋ كەرەك، سوڭعى جىلدارى قازاقستاننىڭ استاناسى ءىرى حالىقارالىق ءىس- شارالاردى، سونىڭ ىشىندە سپورتتىق جارىستاردى وتكىزۋدە مول تاجىريبە جيناقتادى.
قازاقستان رەسپۋبليكاسىنىڭ اۆتوموتوسپورت فەدەراتسياسى الماتىداعى «مەدەۋ» مۇز ايدىنىندا ءبىزدىڭ جارىستارىمىزدىڭ ءۇش تابىستى فينالىنا يە بولدى جانە استاناداعى جارىس جوعارى دەڭگەيدە وتەتىنىنە سەنىمدىمىز. ءبىز استاناداعى جارىستارعا دايىندىق دۇرىس باعىتتا ءجۇرىپ جاتقانىنا كوزىمىز جەتتى. ستاديون بارلىق قاجەتتى تالاپتارعا جاۋاپ بەرەدى».
قازاقستاندىق ۇيىمداستىرۋشىلار استانادا وتەتىن مۇز گلادياتورلارىنىڭ جارىستارىنا كورەرمەندەردىڭ ۇلكەن قىزىعۋشىلىعى بولاتىنىن ايتىپ وتىر. ويتكەنى بۇل جارىستىڭ فۋتبولدان نەمەسە حوككەيدەن كەم تۇسپەيتىنىن ايتادى.
«استاناداعى ەڭ جاقسى مۇز ايدىنىندا ۇيىمداستىرىلىپ وتىرعان الەم چەمپيوناتىنىڭ جارىسى كورەرمەندەردىڭ اسا قىزىعۋشىلىعىمەن وتەدى دەپ ەسەپتەيمىز، - دەگەن ق ر اۆتوموتوسپورت فەدەراتسياسىنىڭ پرەزيدەنتى مارات ابىقايەۆ.
- مەدەۋدە وتكەن ءۇش جىلدىق جارىستىڭ قورىتىندىسى بويىنشا استاناداعى وتكەلى جاتقان الەمدىك چەمپيوناتتىڭ اقتىق كەزەڭدەرىنىڭ جالعاسىنىڭ ءوتۋى - قازاقستاننىڭ وسى دەڭگەيدەگى جارىستار وتكىزىپ، حالىقارالىق موتوتسيكل فەدەراتسياسى FIM تاراپىنان سەنىمگە يە بولعاندىعىنىڭ دالەلى. بۇل بەدەلدى جارىستىڭ ءبىزدىڭ ەلوردادا ءوزىنىڭ جيىرماسىنشى جىلدىعىندا وتكىزىلەتىندىگىنە ماقتانامىز».
سونىمەن قاتار، 2018 -جىلى وتەتىن مۇز ۇستىندەگى سپيدۆەيدەن الەم چەمپيوناتى بەس كەزەڭدە وتكىزىلەدى. ءبىرىنشى جانە ەڭ بەدەلدى جۇلدەلەر استانا قالاسىندا وتەدى، سودان كەيىن رەسەي فەدەراتسياسى، گەرمانيا جانە نيدەرلاندىدا باستالادى. كوماندالىق الەم چەمپيوناتى 2018 -جىلى رەسەيدىڭ شادرينسك قالاسىندا وتەدى.
