مەملەكەتتىك قىزمەتشىلەرگە دىنگە قاتىستى قانداي شەكتەۋلەر قويىلادى

استانا. قازاقپارات - ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ جاڭا زاڭ جوباسىنداعى ءدىن مەن مەملەكەتتىك قىزمەتشىلەرگە قاتىستى تالاپتاردى ايتىپ بەردى، دەپ حابارلايدى قازاقپارات ءتىلشىسى.

«ۇسىنىلىپ وتىرعان زاڭ جوباسىنا سايكەس، مەملەكەتتىك قىزمەتشىلەرىنە تەك ءۇش شەكتەۋ قويىلادى. بىرىنشىدەن، ولار وزدەرىنىڭ قىزمەتتىك مۇمكىندىكتەرىن ءدىني بىرلەستىكتەردىڭ مۇددەسى ءۇشىن پايدالانۋعا بولمايدى. ەكىنشىدەن، وزگە تۇلعالاردى ءدىني بىرلەستىكتەردىڭ قىزمەتىنە قاتىسۋىنا ماجبۇرلەي المايدى، ۇشىنشىدەن، مەملەكەتتىك قىزمەتشىلەر ءدىني بىرلەستىكتەردىڭ قۇرىلتايشىسى نەمەسە باستاماشىسى، مۇشەسى بولا المايدى. ال بيۋدجەتتەن قارجىلاندىرىلاتىن مەكەمەلەردىڭ قىزمەتشىلەرىنە اتالعان ءۇش شەكتەۋدىڭ ەكەۋى عانا قولدانىلادى»، - دەدى ن. ەرمەكبايەۆ ماجىلىستە تىلشىلەرگە بەرگەن سۇحباتىندا.

بۇدان بولەك، مينيستر زاڭ جوباسىنىڭ نورماسىنا سايكەس، 16 جاسقا تولماعان بالالار ءدىني جورالعىلارعا، جيىندارعا تەك اتا- اناسىمەن نەمەسە جاقىن تۋىستارىمەن عانا بارا الاتىنىن جەتكىزدى.

 ايتا كەتەيىك، بۇگىن پارلامەنت ماجىلىسىندە «ق ر كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭ جوباسى تانىستىرىلدى.

اۆتور: رۋسلان عابباسوۆ