قىتايداعى قانداسىمىز جاڭا فيلم ءتۇسىرىپ جاتىر - شەتەلدەگى قازاق ءتىلدى ب ا ق- قا شولۋ
التايدا ادامزاتتىڭ بايىرعى قار شاڭعى مەكەنىن مەرەكەلەۋ كۇنىنە ارنالعان كونسەرت ءوتتى - «اعاجاي- التاي» پورتالى
ق ح ر شىڭجاڭ ولكەسىنىڭ التاي قالاسىندا XII كەزەكتى ادامزاتتىڭ بايىرعى قار شاڭعى مەكەنىن ەسكە الۋ كۇنىنە ارنالعان كونسەرت ءوتتى، دەپ حابارلايدى «اعاجاي- التاي» اقپاراتتىق پورتالى.
ۇلتىمىزدىڭ ءداستۇرلى مادەنيەتىن ۇلىقتاعان مەرەكەلىك كونسەرتتىك قويىلىمعا التاي جەرىنىڭ ءتورت ماۋسىمىنداعى تىرشىلىك ءومىر سالتى، اسەم تابيعات كورىنىسى ارقاۋ بولعان. سونداي- اق، كونسەرتتىك كەشتە قازاقتىڭ ۇلتتىق بيلەرى، ءانى مەن كۇيى ورىندالىپ كورەرمەننىڭ ەرەكشە ىقىلاسىنا بولەندى.
ەسكە سالا كەتەيىك، التايداعى بايىرعى قار شاڭعى بەينەلەنگەن جارتاس سۋرەتىن زەرتتەگەن عالىمدار، ونى 10 مىڭ جىلدىڭ الدىنداعى جادىگەر رەتىندە مويىندادى. وسىدان كەيىن 2007 -جىلى «التاي تاۋى ەڭ بايىرعى قار شاڭعى مەكەنى» دەپ گيننەستىڭ رەكوردتار كىتابىنا ەنگىزىلدى. بۇنى شاڭحايداعى گيننەس رەكوردتار كىتابىنا تىزىمدەيتىن شتابتىڭ بولىمشەسى تىركەدى. 2008 -جىلى مەملەكەت التاي تاۋى سىلەمدەرىن «ادامزاتتىڭ بايىرعى قار شاڭعى مەكەنى» دەپ اتادى. سوندىقتان دا، التاي اۋماعىندا قاڭتاردىڭ 16-سى كۇنى «بايىرعى قار شاڭعىسىنىڭ پايدا بولعان كۇنى» دەپ بەلگىلەنگەن. ونى جىل سايىن ەسكە ءتۇسىرىپ، ارنايى شارالار وتكىزىلىپ وتىرادى.
موڭعولياعا كەلەتىن شەتەلدىكتەردىڭ 2,7 پايىزى قازاقستاندىقتار - kaznews.mn
موڭعوليا ستاتيستيكا كوميتەتىنىڭ دەرەگىنشە، ەلگە شەتەلدەن كەلەتىن قوناقتار سانى جىل سايىن كوبەيىپ كەلەدى، دەپ جازادى KAZNEWS اقپاراتتىق پورتالى.
«2017 -جىلى شەتەلدەن 5,9 ميلليون قوناق شەكارا اسقان. بۇل كورسەتكىش 2016 -جىلعى ەسەپتەن 513,1 مىڭعا ارتىق، ياعني 9,4 پايىزعا وسكەن. موڭعولياعا ەڭ كوپ كەلەتىن ەلدەردەن 37,2 پايىزىن ق ح ر، 20,3 پايىزىن رەسەي فەدەراتسياسى، 14,1 پايىزىن وڭتۇستىك كورەيا، 4,3 پايىزىن جاپونيا، 3,3 پايىزىن ا ق ش جانە 2,7 پايىزىن قازاقستان رەسپۋبليكاسىنىڭ ازاماتتارى، ال 18,1 پايىزىن وزگە مەملەكەتتەردىڭ ازاماتتارى يەلەنۋدە. ال، 2017 -جىلى 2,4 ميلليون موڭعوليالىق شەتەل اسقان بولسا، ولاردىڭ 1,8 ميلليونى جەكە شارۋاسىمەن بارعان»، - دەپ حابارلايدى دەرەككوز.
قىتاي قازاقتارى جاڭا فيلم ءتۇسىرىپ جاتىر - «جەنمين جيباو» (People Daily)
قىتاي حالىق رەسپۋبليكاسى ىلە قازاق اۆتونوميالى وبلىسىنداعى كورىكتى نارات جايلاۋىندا قازاق تۇرمىسىن ارقاۋ ەتكەن «دەڭشىنىڭ كىناسى» اتتى جاڭا فيلم ءتۇسىرىلىپ جاتىر، دەپ حابارلايدى People Daily جاڭالىقتار سايتى.
اتالعان دەرەككوزدىڭ جازۋىنشا، بولاشاق قازاق كينوسىنا قوسىلاتىن تىڭ تۋىندىنىڭ رەجيسسەرى قىتايدا تۇراتىن قانداسىمىز قايسار قابدولدا ۇلى. ول وتكەن جىلى ماۋسىم ايىندا «تۇڭعيىق» اتتى فيلمىن كورەرمەن نازارىنا ۇسىنعان. وسى جولى جاڭا تۋىندىنىڭ بارىنشا ساپالى دەڭگەيدە ءتۇسىرىلۋى ءۇشىن، قىتايداعى مىقتى رەجيسسەر، مونتاجداۋشى جاڭي فاندى بىرلەسە جۇمىس جاساۋعا شاقىرعان. كەلەشەكتە بۇل فيلمدى حالقارالىق كينو فەستيۆالدارىنا ۇسىنۋ جوسپارلانىپ وتىر.
«اتالعان فيلمنىڭ باس كەيىپكەرلەرىنىڭ ءرولىن سومداعان قىتايداعى كوپتەگەن كينولارعا ءتۇسىپ جۇرگەن بەلگىلى قازاق اكتەرى مۇحتار تىلەۋعازى ۇلى مەن جاس تالانتتى اكتەر ايبول مۇراتبەك ۇلى. تۋىندىدا قاراپايىم اۋىل تۇرعىنى مەن جوعارى وقۋ ورنىن جاڭا بىتىرگەن ستۋدەنتتىڭ اراسىنداعى جاراستىق پەن قايشىلىق اينالاسىندا ءوربيدى. تاعدىر، تالعام، ۇقساماعان تۇرمىستىق دەڭگەي اياسىنداعى ادامنىڭ جان دۇنيەسىندە بولاتىن ءتۇرلى مىنەزدىك تولقىنىستار بەينەلەنەدى. ايتار ويى تىڭ مازمۇنعا قۇرىلعان فيلم كورەرمەن كوزايىمىنا ءساتتى ۇسىنىلىپ جاتسا، قازاقشا كوركەم فيلمنىڭ قاتارى مولايىپ، قازىناسى تولىعا تۇسەرى ءشۇباسىز»، - دەپ حابارلايدى kazakh.people.com سايتى.
«قىز جىبەك» قويىلىمى تامساندىردى - ت ر ت
قازاقتىڭ 500 جىلدىق داستانى قىز جىبەكتىڭ جەلىسىمەن دايىندالعان ميۋزيكل ەۋروپاداعى قويىلىمداردان كەيىن قازاقستاننىڭ باس قالاسى استانادا ءبىرىنشى رەت ساحنالاندى، دەپ حابارلايدى تۇركيا راديو تەلەديدار پورتالى.
قازاقتاردىڭ دالا تۇرمىسى، ماحاببات جانە تۇرمىس- سالت داستۇرلەرى سينتەزدەلىپ كورسەتىلگەن قويىلىم كورەرمەندەردەن جوعارى باعا الدى. «Astana Musical» تەاترىنىڭ ەتنو- فولكلورلىق ميۋزيكلى قازاقستان كونسەرتتىك زالىندا ساحنالاندى. قىز جىبەك پەن تولەگەننىڭ حيكاياسىن باياندايتىن قويىلىمدا 60-قا تارتا اكتەر وينايدى. قويىلىمنىڭ كوركەمدىك جەتەكشىسى اسحات ماەميروۆ» دەپ جازادى پورتال.
قىتايداعى قانداسىمىز تەرى شاڭعىنى جاساۋ تاجىريبەسىمەن ءبولىستى - «جەنمين جيباو» (People Daily)
قىتايدىڭ التاي ايماعىندا تۇراتىن قانداسىمىز سىلامبەك ساعىنىش ۇلى قازاقتىڭ بايىرعى تەرى شاڭعىسى قالاي جاسالاتىنىن ايتىپ بەردى، دەپ حابارلايدى «حالىق گازەتى» سايتى.
اتالعان ب ا ق- تىڭ جازۋىنشا، ۇلتتىق قۇندىلىعىمىزدى ۇلىقتاپ جۇرگەن قانداسىمىز سىلامبەك ساعىنىش ۇلى التايدىڭ لاستى كەنتىنىڭ نوعايتى دەگەن اۋىلىندا تۇرادى. بيىل پايعامبار جاسىنان اسقان قانداسىمىز ءالى دە كونە مۇرامىزدىڭ وتىن وشىرمەي جالعاستىرىپ كەلە جاتقانىن، سونداي- اق، ارنايى شاكىرت تاربيەلەپ جۇرگەنىن ايتادى. وڭىردە تەرى شاڭعى جاساۋدا ودان اساتىن شەبەر جوق. 2010 -جىلى شىنجاڭ ولكەلىك مادەنيەت باسقارماسى سىلامبەك ساعىنىش ۇلىنا «شىنجاڭنىڭ ماتەريالدىق ەمەس مۇراسى تەرى شاڭعى جاساۋدىڭ مۇراگەرى» دەگەن رەسمي اتاق بەرگەن.
«تەرى شاڭعى جاساۋدى اكەمنەن ۇيرەندىم. العاشقى تەرى شاڭعىمدى 15 جاسىمدا جاسادىم. ءبىز ءۇشىن بۇل قار شاڭعىسى تاپتىرمايتىن كولىك قۇرالىمىز بولدى. التايدىڭ قىسى ۇزاق، قارى قالىڭ بولادى. بۇرىندارى كولىك قاتىناس قولايسىز بولعاندىقتان جەرگىلىكتى تۇرعىندار وسى تەرى شاڭعىنى كەڭ پايدالانعان. اڭشىلار مەن شارۋالاردىڭ نەگىزگى كولىگى بولعان. شاڭعىنىڭ وزەگىن قاراعاي مەن قايىڭ اعاشىنان جاساپ، سىرتىن جىلقى سيراعىنىڭ تەرىسىمەن قاپتايدى. ورنىنان قوزعالىپ، ەكپىن الۋ ءۇشىن ءبىر تاياقتى عانا قولدانعان. باسقا قار شاڭعىعا قاراعاندا، تەرىدەن جاسالعان قار شاڭعىنىڭ وزىندىك ەرەكشەلىگى بار: تاۋعا شىققاندا تەرى جۇنىنە قارسى باعىتتا بولعاندىقتان، ۇيكەلىس كۇشىن ارتتىرىپ، قار بەتىنە جابىسىپ، بيىكتەن ارتقا سىرعىپ كەتۋدى ساقتايدى. تاۋدان تومەن سىرعاناعاندا جىعىلعان تەرى جۇنىنە باعىتتاس بولعاندىقتان، ۇيكەلىس ازايىپ، جىلدامدىعى باسقا قار شاڭعىلاردان تەز بولادى»، - دەيدى تەرى شاڭعى جاساۋدىڭ مۇراگەرى سىلامبەك ساعىنىش ۇلى.
بايان- ولگەي باسەكەگە قابىلەتتىلىك رەيتينگىندە 10- ورىندى ساقتاپ قالدى - kaznews.mn
موڭعوليانىڭ ەكونوميكالىق باسەكەگە قابىلەتتىلىكتى زەرتتەۋ ورتالىعى 2017 -جىلعا ارنالعان ايماقتاردىڭ (وبلىستاردىڭ) باسەكەگە قابىلەتتىلىك جونىندەگى ەسەبىن جاريالادى، دەپ حابارلايدى KAZNEWS اقپاراتتىق پورتالى.
«زەرتتەۋ ناتيجەسىنە سايكەس، موڭعوليانىڭ 21-ايماعىنان بايان- ولگەي 10- ورىنعا يە بولعان. بۇل ايماق (وبلىس) 2016 -جىلعى رەيتينگتە تاعى دا 10- ورىننان كورىنگەن بولاتىن. رەيتينگ بويىنشا بايان- ولگەي باتىس وڭىردە كوش باستاپ تۇر. دەسە دە، ايماق الەۋمەتتىك جانە نەگىزگى ينفراقۇرىلىم سالاسىنا، ىشكى جالپى ءونىمدى ارتتىرۋ، اكىمشىلىكتە كەزدەسەتىن كەدەرگىلەردى جويۋ، حالىقتى جۇمىسپەن قامتۋ سەكىلدى وزەكتى سالالارعا باسا نازار اۋدارعانى ءجون. 2012 -جىلدان بەرى بۇل رەيتينگتە ورحون ايماعى كوش باستاپ كەلەدى»، - دەپ حابارلايدى ايماقتىق ب ا ق.
الماتىدا كليماتتىق وزگەرىستەر تاقىرىبىنداعى ورتاازيالىق كونفەرەنسيا وتەدى - «فارس» اقپارات اگەنتتىگى
قازاقستاننىڭ ۇيىمداستىرۋىمەن الماتى قالاسىندا كليماتتىق وزگەرىستەر تاقىرىبىنداعى ورتاازيالىق كونفەرەنتسيا وتەدى، دەپ حابارلايدى parstoday اقپارات اگەنتتىگى.
Fars اقپارات اگەنتتىگىنىڭ حابارلاۋى بويىنشا، كونفەرەنتسيانى وتكىزۋدەگى ماقسات ايماقتىق ديالوگقا كومەكتەسۋ، كليماتتىق وزگەرىستەرگە بەيىمدەلۋ تۋرالى ءبىلىم جانە ماعلۇماتتارمەن الماسۋ، حالىقارالىق، ايماقتىق جانە ۇلتتىق مۇددەلى تاراپتار اراسىندا ورتاق شارالار ۇيىمداستىرۋ مۇمكىندىكتەرىن ۇيرەتۋ، تۇراقتى كليمات سالاسىندا ورتاق پەرسپەكتيۆا قۇجاتىن دايىنداۋ بولىپ تابىلادى.
بۇل كونفەرەنتسيادا مەملەكەتتىك جانە مەملەكەتتىك ەمەس ورگاندار، عىلىمي ورتالار، حالىقارالىق سەرىكتەستەر، جان- جاقتى دامۋ بانكتەرى جانە كليماتتىق وزگەرىستەر سالاسىندا، اسىرەسە وعان بەيىمدەلۋ بويىنشا جۇمىس جاسايتىن ازاماتتىق ۇيىمداردىڭ 150-دەن استام وكىلى باس قوسادى. مۇنىمەن قوسا، اتالمىش كونفەرەنتسيا حالىقارالىق جانە ايماقتىق ساراپشىلار مەن كليماتتىق وزگەرىستەر سالاسىنداعى ماماندارعا وسى سالادا ءبىلىم مەن ماعلۇماتتارمەن الماسۋعا مۇمكىندىك بەرەدى.
اۆتور: باقىتجول كاكەش
