ەلىمىزدە تىيىم سالىنعان ماتەريالدار مەن سايتتار انىقتالدى
2017 -جىلى ق ر ءدىن ىستەرى جانە ازاماتتىق قوعام مينيسترلىگىنىڭ ءدىن ىستەرى كوميتەتى جۇرگىزگەن ءدىني ساراپتاما جۇمىستارى بارىسىندا 4332 ماتەريالعا (ءدىني ادەبيەتتەر، ءدىني باعىتتاعى باسقا دا ماتەريالدار) زەرتتەۋ جۇمىستارى جۇرگىزىلدى.
ونىڭ ىشىندە 196 نىسانعا تەرىس قورىتىندى بەرىلدى. ءدىني ساراپتاما جۇرگىزۋدىڭ نەگىزگى مىندەتى كونستيتۋتسيا نورمالارى مەن قازاقستان رەسپۋبليكاسىنىڭ زاڭناماسىنا، ازاماتتاردىڭ قۇقىقتارى مەن بوستاندىقتارىنا تەرىس اسەر ەتەتىن زاڭبۇزۋشىلىقتاردى انىقتاپ، ولارعا ساراپتاما جۇرگىزۋ بولىپ تابىلادى. ءدىن تانۋ ساراپتاماسىنىڭ وبەكتىلەرىنە ءدىني مازمۇنداعى جانە ءدىني باعىتتاعى نىسانداردى قامتيتىن اقپاراتتىق ماتەريالدار، رۋحاني (ءدىني) ءبىلىم بەرۋ باعدارلامالارى، جارعىلىق جانە ءدىني مازمۇنداعى باسقا دا قۇجاتتار جاتادى.
بۇل رەتتە ءدىني ادەبيەتتى، ءدىني مازمۇنداعى باسقا دا اقپاراتتىق ماتەريالداردى، زاتتاردى تاراتۋ ءدىني عيماراتتاردا (قۇرىلىمداردا)، رۋحاني (ءدىني) ءبىلىم بەرۋ ۇيىمدارىندا، سونداي- اق استانا مەن رەسپۋبليكالىق ماڭىزى بار قالالاردا، وبلىستاردىڭ جەرگىلىكتى اتقارۋشى ورگاندارىمەن ارنايى بەلگىلەنگەن ستاتسيونارلىق ورىنداردا عانا رۇقسات ەتىلەدى.
ەلىمىزدە ءدىني ماتەريالدار مەن بۇيىمداردى ساۋدالاۋعا ارنالعان 257 ارنايى ورىن بار. جەكە پايدالانۋعا ارنالعان زاتتاردى قوسپاعاندا، قازاقستان رەسپۋبليكاسىنىڭ اۋماعىنا ءدىني مازمۇنداعى اقپاراتتىق ماتەريالداردى اكەلۋدى ءدىني ساراپتامانىڭ وڭ قورىتىندىسىن العاننان كەيىن عانا تىركەلگەن ءدىني بىرلەستىكتەر جۇزەگە اسىرادى. بۇدان بولەك، ءدىني راديكاليزم مەن ەكسترەميزمدى ناسيحاتتاۋعا قارسى ءىس- قيمىل ينتەرنەت- رەسۋرستاردى تالداۋ ارقىلى جۇزەگە اسىرىلادى.
ماسەلەن، 2017 -جىلى تەك ءدىن ىستەرى جانە ازاماتتىق قوعام مينيسترلىگى 10174 ينتەرنەت- رەسۋرستىڭ مازمۇنىنا ساراپتاما جۇرگىزىپ، ونىڭ ىشىندە 3555 سايتتىڭ زاڭبۇزۋشىلىق باعىتتاعى قىزمەتىن انىقتادى. زاڭبۇزۋشىلىقتار انىقتالعان سايتتار بويىنشا تەرىس ساراپتامالىق قورىتىندىلار ق ر اقپارات جانە كوممۋنيكاتسيالار مينيسترلىگىنە ءتيىستى پروتسەسسۋالدىق شەشىم قابىلداۋ ءۇشىن جىبەرىلەدى.
www.24.kz
