ەلباسى ميحايل بوچارنيكوۆتى «دوستىق» وردەنىمەن ماراپاتتادى
مەملەكەت باسشىسى قازاقستانداعى ديپلوماتيالىق ميسسياسىنىڭ اياقتالۋىنا بايلانىستى رەسەي فەدەراتسياسىنىڭ ەلشىسى م. بوچارنيكوۆپەن كەزدەستى.
نۇرسۇلتان نازاربايەۆ م. بوچارنيكوۆتىڭ قازاقستان مەن رەسەي اراسىنداعى قارىم-قاتىناستى نىعايتۋعا قوسقان ۇلەسىن ەرەكشە اتاپ ءوتىپ، ونىڭ قازاقستانداعى ديپلوماتيالىق قىزمەتىنە ريزاشىلىق ءبىلدىردى.
- ءسىز رەسەيدىڭ قازاقستانداعى ەلشىسى رەتىندە 11 جىل قىزمەت اتقاردىڭىز. بۇل جىلدار ىشىندە قازاقستان مەن رەسەي اراسىنداعى قارىم-قاتىناس نىعايدى. ءبىز ديپلوماتيالىق بايلانىستارىمىزدىڭ 25 جىلدىعىن اتاپ وتتىك. ءوڭىرارالىق ىنتىماقتاستىعىمىز دامىپ، جوعارى دەڭگەيدەگى ساپارلار مەن كەزدەسۋلەرىمىز جيىلەي ءتۇستى. ءبىزدىڭ سەرىكتەستىگىمىز - مەملەكەتارالىق قارىم-قاتىناستىڭ جارقىن مىسالى، - دەدى قازاقستان پرەزيدەنتى.
مەملەكەت باسشىسى ەكى ەلدىڭ حالىقارالىق ارەنادا تابىستى ىقپالداستىق ورناتقانىن ايتتى.
- ءبىز حالىقارالىق دەڭگەيدە ءبىر-ءبىرىمىزدى قولدايمىز. ا ق ش- قا ساپارىم كەزىندە رەسەي مەن امەريكا اراسىنداعى قارىم-قاتىناس ماسەلەسىنە زور ءمان بەردىم، - دەدى نۇرسۇلتان نازاربايەۆ.
ميحايل بوچارنيكوۆ ەكى ەل اراسىنداعى قارىم-قاتىناستاردىڭ جوعارى دەڭگەيدە دامىپ كەلە جاتقانىن ايتىپ، قازاقستاننىڭ جاھاندىق قاۋىپسىزدىكتى نىعايتۋ ىسىندەگى بەلسەندى قىزمەتىنە توقتالدى.
- قازاقستاندا 11 جىلدان استام اتقارعان قىزمەتىم بارىسىندا ەلدەرىڭىزگە دەگەن ريزاشىلىق سەزىمىم ارتا ءتۇستى. قازاقستاننىڭ ب ۇ ۇ قاۋىپسىزدىك كەڭەسىنە مۇشە بولۋى جانە بۇل ورگانعا ءتوراعالىق ەتۋى حالىقارالىق بەيبىتشىلىك پەن قاۋىپسىزدىكتى قامتاماسىز ەتۋ ىسىندەگى ەلدەرىڭىزدىڭ ماڭىزدىلىعىن كورسەتىپ وتىر، - دەدى رەسەي فەدەراتسياسىنىڭ قازاقستانداعى ەلشىسى.
سونىمەن قاتار م. بوچارنيكوۆ ەكى ەلدىڭ ەۋرازيالىق ەكونوميكالىق وداق اياسىنداعى ىنتىماقتاستىعىنىڭ ناتيجەلەرى مەن الداعى پەرسپەكتيۆالارىن اتاپ ءوتتى.
كەزدەسۋ سوڭىندا نۇرسۇلتان نازاربايەۆ م. بوچارنيكوۆتى «دوستىق» وردەنىمەن ماراپاتتادى.
