ايازعا بايلانىستى استانادا كولىكتى وتالدىرۋ قىزمەتتەرى قىمباتتادى
اتالعان قىزمەت ءۇشىن قازىرگى كەزدە ەلورداداعى تەحنيكالىق قىزمەت كورسەتۋ ورىندارىندا شامامەن 20 مىڭ تەڭگە سۇراپ وتىر. وسى ورايدا «اۆتو 24» ت ق ك س مامانىنىڭ سوزىنە قاراعاندا، سوڭعى ەكى كۇندە كولىكتەرىن وتالدىرىپ بەرۋ كومەگىنە جۇگىنگەن ادامدار سانى كۇرت ارتۋدا.
«ءبىز قالا تۇرعىندارىنان تاپسىرىس الىپ ۇلگەرمەي جاتىرمىز. وزدەرىڭىز بايقاعانداي، مينۋس 40 گرادۋستىق سارىشۇناق ايازدا كولىكتەردىڭ وتالۋى قيىنداۋ»، - دەدى اتالعان ستانسانىڭ ارداق ەسىمدى مامانى «قازاقپارات» تىلشىسىنە بەرگەن سۇحباتىندا.
جۇرگىزۋشىلەردىڭ ايتۋىنشا، ايازعا دەيىن بۇل قىزمەتتىڭ ءتۇرى ورتاشا العاندا 5 مىڭ تەڭگە سوماسىندا بولعان، الايدا تاپسىرىس بەرۋشىلەر سان كوبەيگەننەن كەيىن، وسى قىزمەتكە باعا دا شارىقتادى.
كەيبىر تەحنيكالىق قىزمەت كورسەتۋ ستانسالارى كولىكتىڭ قوزعالتقىشىن جىلىتىپ، وتالدىرىپ بەرۋگە 10 مىڭ تەڭگە سۇراپ وتىر. ءبىراق تا ستانسا ماماندارى بوس بولماعاندىقتان، ولارعا تەلەفون شالۋ مۇمكىن بولماي تۇرعان كورىنەدى.
«استانا تۇرعىندارىنىڭ كوبىسى كولىكتەرىن ساۋدا ورتالىقتارى استىنداعى جىلى تۇراقتارعا قويدى. بۇل رەتتە ءبىر تۇنگە تۇراقتى پايدالانعان ءۇشىن ولار 1700-2000 تەڭگە ارالىعىندا تولەدى. سوندىقتان ورتالىقتارداعى تۇراقتاردا ورىن بولمادى»، - دەدى قالا تۇرعىنى بيبىگۇل تانەنوۆا.
تاجىريبەلى جۇرگىزۋشى بەيبىت سۇلتانوۆتىڭ اتاپ وتۋىنشە، كۇتىم كورگەن اۆتوكولىك كەز كەلگەن ايازدا ەكىنشى تالپىنىستان وتالۋى ءتيىس.
«ەگەر دە كولىك وتالماسا، وندا ونىڭ بولشەكتەرىنىڭ اقاۋى بار دەگەندى اڭعارتادى. ەڭ ماڭىزدى دەگەن تەتىكتەرىن ۋاقتىلى اۋىستىرماسا نەمەسە اككۋمۋلياتورى وتىرىپ قالسا، وندا كولىك ايازدى كۇندەرى جۇرمەي قالاتىنى انىق. نەگىزى، اككۋمۋلياتور شامامەن 3 جىل مەرزىمدە دۇرىس قىزمەت ەتىپ بەرەدى. مىسالى، بۇگىن كولىگىمنىڭ كۇدىك تۋعىزعان بولشەكتەرىن اۋىستىرىپ جاتىرمىن، سوندىقتان الداعى سۋىقتاردا دا اۆتوكولىگىم وتالادى دەگەن ۇمىتتەمىن»، - دەدى ول.
