پرەمەر-مينيستر ايازعا قاتىستى: قىزمەتكەرلەردى جۇمىستا ۇزاق ۇستاماڭىزدار

استانا. قازاقپارات - ۇكىمەتتىڭ بۇگىنگى وتىرىسى باستالماي تۇرىپ ق ر پرەمەر-ءمينيسترى باقىتجان ساعىنتايەۆ قاتتى ايازعا بايلانىستى ءبىرقاتار مىندەتتەردى جۇكتەدى، دەپ حابارلايدى قازاقپارات ءتىلشىسى.

«كەشەدەن بەرى ەلىمىزدىڭ ءبىرقاتار وڭىرلەرىندە كۇن رايى قاتتى سۋىپ كەتتى. سينوپتيكتەردىڭ بولجامى بويىنشا كۇشتى اياز تاعى دا بىرنەشە تاۋلىككە سوزىلادى. قازىردىڭ وزىندە ەلىمىزدىڭ التى وڭىرىندە اۋا تەمپەراتۋراسى -30 بەن -40 اراسىندا. وسىنداي ۇسكىرىك اياز ەلىمىزدىڭ وڭتۇستىگىندەگى ءتورت وڭىرىندە بولادى دەگەن بولجام بار»، - دەپ اتاپ كورسەتتى ب. ساعىنتايەۆ.

وسىعان بايلانىستى ۇكىمەت باسشىسى وبلىس اكىمدەرىنە جىلۋ ورتالىقتارىنىڭ جۇمىسىن، سونىڭ ىشىندە شاعىن قالالارداعى جىلىتۋ قازاندىقتارىنىڭ جۇمىسىن قاتاڭ باقىلاۋعا الۋدى تاپسىردى. اسىرەسە، اۋرۋحانا، مەكتەپ، بالاباقشالار سياقتى الەۋمەتتىك نىساندارعا ەرەكشە نازار اۋدارىلۋى قاجەت. «ءبىلىم بەرۋ ۇيىمدارىندا ساباقتىڭ بولمايتىنى تۋرالى حالىقتى دەر كەزىندە حاباردار ەتىڭىزدەر. قوعامدىق كولىك كەستە بويىنشا جۇمىس ىستەۋى كەرەك. كەزەكشىلىكتىڭ ناقتى ءتارتىبى بولۋى شارت. قازىرگى جاعدايعا بايلانىستى «102» ديسپەتچەرلىك قىزمەتى ۇزدىكسىز جۇمىس ىستەۋى ءتيىس. ىشكى ىستەر مينيسترلىگى اۆتوجولداردى باقىلاپ، كەرەك كەزدە بارلىق كولىك قۇرالدارىنىڭ قوزعالىسىنا شەكتەۋ قويۋ تۋرالى شەشىمدى دەر كەزىندە قابىلداۋى شارت»، - دەدى ۇكىمەت باسشىسى.

سونداي-اق، اكىمدىكتەر كولىك جۇرگىزۋشىلەرى مەن جولاۋشىلاردى جىلىتۋعا ارنالعان جىلجىمالى بەكەتتەردىڭ جۇمىسىن ۇيىمداستىرۋى ءتيىس. سول جەردە ىستىق تاماق بەرىلۋى شارت. «مەملەكەتتىك ورگاندار مەن جەكە مەنشىك ۇيىمداردىڭ باسشىلارىنا ايتارىم، ءوز قىزمەتكەرلەرىڭىزدى جۇمىستا ۇزاق ۇستاماڭىزدار. مۇمكىن بولسا، بارلىق قىزمەتكەرلەردى ۇيگە دەيىن جەتكىزۋدى ۇيىمداستىرىڭىزدار»، - دەپ اتاپ كورسەتتى ب. ساعىنتايەۆ.