ايەلىن وزگە دىنگە كىرگەن دەپ پىشاقتاعان شىمكەنتتىك سوتتالدى
قاراتاۋ اۋداندىق سوتى حايروللا نارمەتوۆتى قىلمىستىق كودەكستىڭ 106-بابى 1-بولىگى («قاساقانا اۋىر دەنە جاراقاتىن سالۋ») بويىنشا كىنالى دەپ تانىپ، ءۇش جىلعا باس بوستاندىعىنان ايىردى.
ايتا كەتەيىك، سوتتىڭ سوڭعى وتىرىسىندا ايىپتالۋشىنىڭ ايەلى ۋميدا نارمەتوۆا وزىنە پىشاق جاراقاتىن سالعان كۇيەۋىن پەرزەنتتەرى ءۇشىن كەشىرەتىنىن ايتقان بولاتىن.
ءوز كەزەگىندە سوتتالۋشىنىڭ ءوزى جاساعان ارەكەتىنە وكىنەتىنىن جەتكىزدى. ءارى ايەلى مەن ونىڭ اناسىنان كەشىرىم سۇرادى. الايدا قاراتاۋ اۋداندىق سوتىنىڭ سۋدياسى ەرماحان راحمانبەردى پىشاق سالعان تۇرعىنعا تۇزەۋ مەكەمەسىندە جازاسىن وتەۋ تۋرالى ۇكىم شىعاردى.
ەسكە سالايىق، سايرام اۋدانىنىڭ تۇرعىنى حايروللا نارمەتوۆ ايەلىن پىشاقتاپ تاستاعان سوڭ، قانعا بويالعان پىشاعىن كورسەتىپ الەۋمەتتىك جەلىگە سالعان ەدى. ول ءتىپتى «ايەلىمدى باسقا دىنگە وتكەنى ءۇشىن ءولتىردىم» دەپ مالىمدەگەنى بەلگىلى. وسىدان كەيىن اۋىر جاراقات العان ايەلى اۋرۋحانانىڭ جانساقتاۋ بولىمىنە ءتۇسىپ، امان قالدى.
