ەلىمىزدە العاش رەت پاستەرلەنگەن تۇيە ءسۇتى شىعارىلا باستادى
جاڭا اشىلعان زاۋىت ونىمىنە كورشى رەسەيدەن سۇرانىس كوپتەپ ءتۇسىپ جاتىر. ەندى الداعى ايدان باستاپ ەلىمىزدە وندىرىلگەن تۇيە ءسۇتى رەسەي نارىعىنا جول تارتادى.
«سەبەبى سيىرعا قاراعاندا تۇيە ءسۇتىنىڭ ەمدىك قاسيەتى مول، قۇرامىندا قاتەرلى ىسىككە قارسى تۇراتىن ءتۇرلى دارۋمەندەر بار»، - دەيدى ماماندار.
اسحاتجان ىبىراي، زاۋىت ديرەكتورى:
- ەلىمىزدە تۇيەنىڭ ءسۇتىن وڭدەپ، شۇبات شىعاراتىن كاسىپورىندار بولعانىمەن، ولار تۇيە ءسۇتىن تابيعي كۇيدە ۇسىنبايدى ەكەن. ال بۇگىندە الەم ەلدەرى مىڭ ءبىر دەرتكە شيپا دەپ وسى تۇيە ءسۇتىن تۇتىنۋعا كوشىپ جاتىر. سوندىقتان دا اعارعاننىڭ وسى تۇرىنە باسىمدىق بەرىپ وتىرمىز. قازىر ونىمدەرىمىز وڭىردەگى ساۋدا نۇكتەلەرىندە ساتىلىپ جاتىر. الداعى ناۋرىز ايىنان باستاپ اقتوبە، اتىراۋ جانە باتىس قازاقستان وبلىستارىنا جىبەرەمىز.
جوبانى جۇزەگە اسىرۋعا 600 ميلليون تەڭگە جۇمسالىپتى. زاۋىت وزىق ۇلگىدەگى قوندىرعىلارمەن جابدىقتالعان. ءونىمنىڭ ساپاسىن تەكسەرەتىن ارنايى زەرتحانا دا ىسكە قوسىلدى. 35 تۇرعىن تۇراقتى جۇمىسقا قابىلداندى. ماماندار جاڭا تەحنولوگيانى مەڭگەرۋ ءۇشىن الدىن الا وقىپ، قايتا دايارلىقتان وتكەن.
زاميرا بەكتۇرعانوۆا، زاۋىت وپەراتورى:
- مەن وسى زاۋىتقا جاقىندا جۇمىسقا كىردىم. زاۆودىمىز بارلىعى اۆتوماتتاندىرىلعان. مەن سول جەردە وپەراتور بولىپ جۇمىس جاسايمىن. مىنا اپپاراتتىڭ كومەگىمەن تۇيەنىڭ سۇتىنەن يوگۋرت، ايران، سمەتانا ءبارىن شىعارامىز.
تۇيە ءسۇتىن وندىرەتىن كاسىپورىننىڭ اشىلۋى ماڭعىستاۋدا ويسىل قارا تۇقىمىن كوبەيتىپ، تۇيە شارۋاشىلىعىن دامىتۋعا دا جاڭا سەرپىن بەرمەك. ەڭ باستىسى، مالىنىڭ ءسۇتىن قايدا وتكىزەرىن بىلمەي، ابدەن قينالعان شارۋالاردىڭ ماسەلەسى شەشىلدى. قازىر ءوڭىردىڭ 25 ەلدى مەكەنىندە تۇيە ءسۇتىن قابىلدايتىن بولىمشە اشىلدى. ماماندار ءسۇتتى تەكسەرىپ، قابىلداپ العان سوڭ، ارنايى ءسۇت تاسيتىن كولىكتەرمەن تىكەلەي زاۋىتتا جەتكىزەدى.
www.24.kz
