ەلباسى جەكسەنبەك ەركىمبەكوۆتىڭ قايتىس بولۋىنا بايلانىستى كوڭىل ايتتى

استانا. قازاقپارات - ەلباسى نۇرسۇلتان نازاربايەۆ جەكسەنبەك ەركىمبەكوۆتىڭ قايتىس بولۋىنا بايلانىستى تۋعان- تۋىسقاندارى مەن جاقىندارىنا كوڭىل ايتۋ جەدەلحاتىن جولدادى.

بۇل تۋرالى اقوردانىڭ باسپا ءسوز قىزمەتى حابارلايدى.

قازاقستان پرەزيدەنتى كورنەكتى مەملەكەت قايراتكەرى جەكسەنبەك ەركىمبەكوۆتىڭ تۋعان- تۋىسقاندارى مەن جاقىندارىنا كوڭىل ايتتى.

«جەكسەنبەك ەركىمبەكوۆ بەلگىلى مۋزىكانت جانە مادەنيەت پەن ونەر سالاسىنىڭ تالانتتى ۇيىمداستىرۋشىسى ەدى. ول ون جىلدان استام ەلىمىزدىڭ مادەنيەت مينيسترلىگىن باسقارىپ، ۇلتتىق مادەنيەتىمىز بەن ونەرىمىزدىڭ دامۋىنا زور ۇلەس قوستى»، - دەلىنگەن جەدەلحاتتا.

نۇرسۇلتان نازاربايەۆ جەكسەنبەك ەركىمبەكوۆتىڭ ەڭبەگى مەن جارقىن بەينەسى قازاقستاندىقتاردىڭ جۇرەگىندە ءاردايىم ساقتالاتىنىنا سەنىم ءبىلدىردى.

***

ج. ەركىمبەكوۆ 1930 -جىلى 5 - قاڭتاردا الماتى وبلىسى، ەسكەلدى اۋدانى، بيعاش اۋىلىندا دۇنيەگە كەلگەن.

جەكسەنبەك ەركىمبەكوۆ الماتى مەملەكەتتىك كونسەرۆاتورياسىن دومبىراشى- ديريجەر ماماندىعى بويىنشا ءبىتىرىپ، قازاق راديو كوميتەتىنىڭ جانىنداعى ۇلت- اسپاپتار وركەسترىندە، قۇرمانعازى اتىنداعى حالىق اسپاپتار وركەسترىندە دومبىراشى بولدى. ول قۇرمانعازى وركەسترى قۇرامىندا بۋحارەست قالاسىنداعى دۇنيەجۇزىلىك جاستار مەن ستۋدەنتتەردىڭ 4 - فەستيۆالىنە قاتىسىپ، التىن مەدالمەن ماراپاتتالدى»، - دەلىنگەن حابارلامادا.

1956-1958 -جىلدارى الماتى حورەوگرافيا ۋچيليشەسىنىڭ ديرەكتورى، قازاق راديوسى مۋزىكا رەداكسياسىنىڭ كوركەمدىك جەتەكشىسى، قازاق ك س ر- ءى ءان- بي ءانسامبلىنىڭ ديرەكتورى، 1959-1961 -جىلدارى قازاقستان كوممۋنيستىك پارتياسى ورتالىق كوميتەتىنىڭ مادەنيەت سەكتورىنىڭ مەڭگەرۋشىسى، 1961-1966 -جىلدارى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ديرەكتورى قىزمەتتەرىن اتقاردى.

1966-1976 -جىلدارى قازاق ك س ر- ءى مادەنيەت مينيسترلىگىندە ونەر باسقارماسىنىڭ باستىعى، ءمينيستردىڭ ورىنباسارى، 1976-1987 مادەنيەت ءمينيسترى بولىپ قىزمەت ەتتى.

جەكسەنبەك ەركىمبەكوۆ قازاق ك س ر- ءنىڭ مادەنيەت ءمينيسترى بولىپ قىزمەت اتقارعان كەزىندە مادەنيەت سالاسىنىڭ كادرلار دايارلاۋ دەڭگەيى ايتارلىقتاي ءوسىپ، انسامبلدەر مەن وركەسترلەر قۇرىلدى، جاڭا تەاترلار، فيلارمونيالار، كىتاپحانالار، مادەني ورتالىقتار، جىلجىمالى اۆتوكلۋبتار جانە اۆتومۋزەيلەر اشىلدى.

الماتى قالاسىندا رەسپۋبليكا سارايى، م. اۋەزوۆ اتىنداعى جانە م. لەرمونتوۆ اتىنداعى تەاترلاردىڭ عيماراتتارى سوعىلىپ، الماتى حورەوگرافيالىق ۋچيليشەسى، ك. بايسەيىتوۆا اتىنداعى جانە ا. جۇبانوۆ اتىنداعى دارىندى بالالار مۋزىكا مەكتەپتەرىنىڭ، پ. چايكوۆسكي اتىنداعى الماتى مۋزىكا ۋچيليشەسىنىڭ جاتاقحاناسىمەن بىرگە جاڭا عيماراتتارى بوي كوتەرىپ، ورتالىق كونتسەرت زالى، ۇلتتىق مۋزەي، ءا. قاستەيەۆ اتىنداعى مۋزەي اشىلدى. ەلىمىز بويىنشا جالپى سانى 200-گە جۋىق مادەنيەت مەكەمەلەرى قۇرىلدى.

بۇدان باسقا، جەكسەنبەك ەركىمبەك ۇلى قۇرمانعازى اتىنداعى قازاق ۇلتتىق كونسەرۆاتورياسىنىڭ قۇرمەتتى پروفەسسورى، قازاق ك س ر- ءى جوعارعى كەڭەسىنىڭ دەپۋتاتى بولدى.

جەكسەنبەك ەركىمبەك ۇلى ەركىمبەكوۆتىڭ ەڭبەگى مەملەكەتتىك جوعارى ناگرادالارمەن ماراپاتتالدى. ول 2 رەت «قۇرمەت» وردەنى جانە بىرنەشە مەدالدارمەن ماراپاتتالعان.