قازاقستانداعى جومارت ادامدار وزدەرىن جاريا ەتكەندى قالامايدى
دەپ حابارلايدى قازاقپارات.
«جالپى العاندا، بىزدە قايىرىمدىلىق اۋقىمى ايتارلىقتاي ۇلكەن دەڭگەيدە، ياعني وسىمەن بيزنەسمەندەر جانە باسقا دا كوپتەگەن ادامدار وسىمەن بەلسەندى اينالىسادى. ءبىراق جاساعان قايىرىمدىلىق شارالارى تۋرالى جۇرتشىلىققا جاريالاعاندى قالامايتىن ادامدار دا كوپتەپ كەزدەسەدى. سوندىقتان بۇل باعىتتا تۋرا ستاتيستيكانى جۇرگىزۋ قيىنداۋ»، - دەدى نۇرجان التايەۆ ماجىلىستە تىلشىلەر ساۋالىنا جاۋاپ بەرۋ كەزىندە.
ايتا كەتەيىك، بۇگىن پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى. بۇل قۇجاتتا «قايىرىمدىلىق تۋرالى» زاڭىنا تۋعان جەردى قولداۋ ءۇشىن قايىرىمدىلىق جاساۋ ءتارتىبىن رەتتەيتىن تۇزەتۋلەر ەنگىزۋ جولىمەن مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن ىسكە اسىرۋ ەسكەرىلگەن.
اۆتور: رۋسلان عابباسوۆ
