شاڭعى: پولتورانين الەم كۋبوگى كەزەڭىندە جەڭىسكە جەتتى

ورال. قازاقپارات - قازاقستاندىق شاڭعىشى الەكسەي پولتورانين سلوۆەنيادا ءوتىپ جاتقان الەم كۋبوگى كەزەڭىندە جەڭىمپاز اتاندى، دەپ حابارلايدى «قازاقپارات» ءتىلشىسى.

ا. پولتورانين ءوزىنىڭ وڭ جامباسىنا كەلەتىن كلاسسيكالىق ادىسپەن 15 كيلومەتر قاشىقتىقتا جارىسۋدان قامشى سالدىرماي، مارەگە ءبىرىنشى بولىپ جەتتى. ەكىنشى ورىن العان نورۆەگيالىق يوحاننەس حوەسفلەت كلەبو الەكسەيدەن 13,2 سەكۋندقا قالىپ قويدى. ا. پولتورانيننەن 42,8 سەكۋندقا كەيىن كەلگەن شۆەتسيالىق كاللە حالۆارسسون ۇزدىك ۇشتىكتى تۇيىندەدى.

ايتا كەتەيىك، بۇل - قازاقستاندىق شاڭعىشىنىڭ پحەنچحان قالاسىندا وتەتىن قىسقى وليمپيادا قارساڭىندا ماۋسىمدىق جارىستارداعى ءتورتىنشى جۇلدەسى. بۇدان بۇرىن ول 17- جەلتوقسان كۇنى يتاليانىڭ توبلاح قالاسىندا الەم كۋبوگى كەزەڭىندە 15 كيلومەتر قاشىقتىقتا كلاسسيكالىق تاسىلمەن ىزگە ءتۇسىپ جارىسۋدا قولا جۇلدەگەر اتانسا، جاڭا جىل الدىندا لەنتسەرحايدەدە (شۆەيتساريا) «تۋر دە سكي» كەزەڭىندە كلاسسيكالىق ادىسپەن 15 كيلومەتر قاشىقتىقتا جۇگىرۋدە مارەگە ەكىنشى بولىپ جەتكەن بولاتىن. سوسىن يتاليانىڭ ۆال- دي- فەممە قالاسىندا 6 قاڭتار كۇنى «تۋر دە سكي» كەزەڭىندە 15 كيلومەتر قاشىقتىقتا كلاسسيكالىق ادىسپەن كوپشىلىك جارىستا تالاي مىقتىنى ارتقا قالدىرىپ، چەمپيون اتانعان ەدى.

ءسويتىپ الەكسەي پولتورانين قىسقى وليمپياداعا دايىندىعى جاقسى ەكەندىگىن كورسەتۋدە. ارينە، ەڭ باستى ماقسات تا ءتورت جىلدا ءبىر رەت وتەتىن ايتۋلى دودادا توپ جارۋ ەكەندىگى بەلگىلى.

اۆتور: ەلجان ەرالى