فۋتبولدان قازاقستان قۇراماسى ۆەنگريامەن وينايدى

استانا. قازاقپارات - فۋتبولدان قازاقستان قۇراماسى ۆەنگريامەن جولداستىق كەزدەسۋ وتكىزەدى، دەپ حابارلايدى قازاقپارات ق ر فۋتبول فەدەراتسياسىنا سىلتەمە جاساپ.

«ەكى ەلدىڭ فەدەراتسيالارى اراسىندا جولداستىق كەزدەسۋ وتكىزۋ تۋرالى كەلىسىمگە قول قويىلدى. ماتچ 23- ناۋرىز كۇنى ۆەنگريا استاناسى بۋداپەشتتە «گرۋپاما ارەنا» ستاديونىندا وتەدى»، - دەلىنگەن فەدەراتسيا سايتىندا.

بۇگىنگى كۇنى ۆەنگريا قۇراماسى فيفا رەيتينگىندە 54-ورىندا تۇر. 2016-جىلعى ەۋروپا چەمپيوناتىنىڭ توپتىق كەزەڭىندە ءبىرىنشى ورىن الدى. 1/8-اينالىمدا بەلگيا قۇراماسىنا ەسە جىبەردى.

وتكەن جىلدىڭ كۇزىنەن باستاپ ۆەنگريا قۇراماسىن بەلگيالىق مامان جورج لەكەنس جاتتىقتىرادى. ول تۋنيس، الجير جانە بەلگيا ۇلتتىق قۇرامالارىن جاتتىقتىرعان. سونىمەن قاتار 68 جاستاعى باپكەر بەلگيالىق «اندەرلەحت»، «بريۋگگە»، «گەنت»، «لوكەرەن»، تۇركيالىق «ترابزونسپور» جانە گوللانديالىق «رودا» كلۋبتارىندا دا ەڭبەك ەتتى.

قازىرگى ۆەنگريا قۇراماسىنان بالاج دجۋدجاك، تاماش پريشكين، ادام سالاي جانە باسقالارىن اتاپ كورسەتۋگە بولادى.

«ءبىزدىڭ كوماندا ءۇشىن سوڭعى ەۋروپا چەمپيوناتىنىڭ باستى سەنساتسياسىنا اينالعان ۆەنگريا قۇراماسىمەن ويناۋ وتە قىزىقتى بولماق. وتكەن عاسىردىڭ ورتاسىندا ۆەنگريا فۋتبولى ەۋروپا مەن الەمدە ەڭ مىقتى ۇجىمداردىڭ ءبىرى سانالدى. ۆەنگريا فۋتبولى قازىرگى تاڭدا جاڭا دەڭگەيگە شىعىپ كەلەدى. ونى ۇلتتىق قۇرامانىڭ ناتيجەلەرىنەن بايقاۋعا بولادى. ءبىزدىڭ كوماندا وڭ ناتيجەگە قول جەتكىزىپ، جانكۇيەرلەرگە قۋانىش سىيلاسا ەكەن دەيمىن»، - دەدى قازاقستان فۋتبول فەدەراتسياسىنىڭ باس حاتشىسى ازامات ايتقوجين.

ەسكە سالا كەتەيىك، 2014-جىلى قوس قۇراما جولداستىق كەزدەسۋ وتكىزگەن بولاتىن. بۋداپەشتتە وتكەن ويىن الاڭ يەلەرىنىڭ جەڭىسىمەن اياقتالعان ەدى.