قاراعاندى وبلىسىندا كيىم- كەشەكتى تەگىن بەرەتىن دۇكەن اشىلدى

استانا. قازاقپارات - قاراعاندى وبلىسىنىڭ ساران قالاسىندا العاشقى الەۋمەتتىك قايىرىمدىلىق دۇكەن اشىلدى. وندا زاتتاردى تومەن باعامەن نەمەسە تەگىن الۋعا بولادى، دەپ حابارلايدى قازاقپارات ءوڭىر باسشىلىعىنىڭ باسپا ءسوز قىزمەتىنە سىلتەمە جاساپ.

 «بلاگوداريۋ» دۇكەنىندە ازىرگە كىشىگىرىم ەكى ءبولىم عانا بار. بىرىنشىسىندە - قولدانىستا بولعان، ءبىراق جاعدايى جاقسى كيىمدەر. ولار مۇقتاج جاندارعا تەگىن تاراتىلادى. ال ەكىنشى بولىمدە - دۇكەننەن تومەن باعامەن ساتىپ الىنعان جاڭا زاتتار. ولاردى ساۋدا نۇكتەلەرىنىڭ يەلەرى، تاۋار ساتىلماي قالعان جاعدايدا الىپ كەلىپ وتكىزەدى. بۇل زاتتاردى كەز كەلگەن ادام ارزانعا ساتىپ الۋلارىنا بولادى. بارلىق تۇسكەن قاراجات قايىرىمدىلىققا جۇمسالادى.

 مۇنداي دۇكەندى قۇرۋ يدەياسى «دوبروۆولەتس» جاستار قوعامدىق بىرلەستىگىنىڭ جەتەكشىسى اننا پولكوۆنيكوۆادا بۇرىننان تۋىنداعان ەكەن. الايدا بۇل ءىستى باستاۋ ءۇشىن قاجەتتى عيمارات تا، ونى جالعا الۋعا قاراجات تا بولماعان.

 «قازىرگى تاڭدا ساران قالاسىنىڭ جاستار رەسۋرس ورتالىعى مەن جەرگىلىكتى كاسىپكەرلەر پالاتاسىنىڭ فيليالىنىڭ كومەگىنىڭ ارقاسىندا دۇكەندى اشۋ مۇمكىندىگى پايدا بولدى. ولار قالا اكىمشىلىگىمەن كەلىسىپ، بىزگە تەگىن تۇردە ەكى كىشىگىرىم بولمە ءبولدى. بىزگە بۇل ازىرگە جەتكىلىكتى»، - دەيدى اننا.

 «دوبروۆولەتس» بىرلەستىگىنىڭ قاراۋىندا 214 وتباسى بار. ولاردىڭ كەيبىرى دۇكەن اشىلعان العاشقى كۇندەرى قاجەتتى كيىم- كەشەكتەرىن الىپ ۇلگەرگەن.

 «بۇگىن دۇكەن ءۇشىنشى كۇن ىستەپ جاتىر. كەشە بىزگە ءتورت جانۇيا كەلدى دە، بارلىق وتباسى مۇشەلەرىنە قاجەتتى كيىم- كەشەكتەرىن تەگىن الىپ كەتتى. ارينە، ازىرگە كەلۋشىلەردىڭ بارلىعى تەگىن بولىمگە بارىپ جاتىر. الايدا، ءبىز ءوزىمىز دە سوعان باسىمدىلىق تانىتىپ وتىرمىز، وسىلاي بولارىن كۇتكەنبىز»، - دەيدى اننا پولكوۆنيكوۆا.