قازاقستاندىق ەكى دزيۋدوشى تۋنيستە «قولا» الدى

 استانا.قازاقپارات - قازاقستاندىق سپورتشىلار عۇسمان قىرعىزبايەۆ پەن ەرلان سەرىكجانوۆ تۋنيستە وتكەن گران- پري ويىندارىندا قولا مەدال الدى.

بۇل تۋرالى قازاقستاننىڭ دزيۋدو فەدەراتسياسىنىڭ رەسمي سايتىندا جاريالاندى، دەپ حابارلايدى  baq.kz  اقپارات اگەنتتىگى. قازاقستاندىقتار ءتۋرنيردىڭ ءبىرىنشى كۇنىندە جۇلدەلى بولدى.

عۇسمان قىرعىزبايەۆ 60 كيلوگرامعا دەيىن سالماق دارەجەسىندە جارتىلاي فينالعا جەتىپ، فرانسۋز سپورتشىسى ۆيلاد حيارعا جول بەردى. كەيىن قولا ءۇشىن جەكپە- جەكتە ماروككولىق ياسين ءموۋداتيردى جەڭدى.

ەرلان سەرىكجانوۆ 66 كيلوگرامعا دەيىنگى سالماقتا ءۇشىنشى ورىن الدى. ول سوڭعى جەكپە- جەگىندە رەسەيلىك دزيۋدوشى يسا يسايەۆتى جەڭدى.

ەسكە سالا كەتەيىك، تۋنيستەگى گران- پري ويىندارى كەشە باستالدى. 21 - قاڭتاردا اياقتالادى. وعان الەمنىڭ 46 ەلىنەن 334 سپورتشى قاتىسىپ جاتىر.