استاناداعى جەر اۋكتسيونىنا بلوكچەين قالاي ەنگىزىلەدى
«قازىر وسى باعىتتا ءتيىستى جۇمىستار اتقارىلىپ جاتىر. بىزدە جەر اۋكتسيوندارىنا جاۋاپتى ورگان بار. سوعان ۇسىنىسىمىزدى ەنگىزدىك. ەندى، ءتيىستى وزگەرىستەر مەن تولىقتىرۋلاردى كۇتىپ وتىرمىز. اتالعان باستاما زاڭعا قايشى كەلمەس ءۇشىن الدىمەن قولدانىستاعى ەرەجەلەرگە وزگەرىس ەنگىزۋ كەرەك. بۇنىڭ بارلىعى كۇشىنە ەنۋى ءتيىس. سوندا ءبىز ونى ءىس جۇزىندە قولدانا الامىز»، - دەدى ن. كەنجەبايەۆ قازاقپارات تىلشىسىنە بەرگەن سۇحباتىندا.
وسى ورايدا باسقارما باسشىسى جەر قاتىناستارى سالاسىنداعى بلوكچەينگە قاتىستى ءوز كوزقاراسىن جەتكىزدى. ونىڭ ايتۋىنشا، سول كەزدە ونلاين اۋكتسيوندار بولادى. "قازىر ءبىز " ءبىر تەرەزە" قاعيداتى دەيمىز عوي. سول سياقتى ونلاين رەجيم بولادى. كىسىلەردىڭ ءبارىن ءبىر جەرگە جيناپ، شاقىرۋدىڭ قاجەتى جوق. اۋكتسيونعا قاتىساتىندار ءوز ۇيلەرىندە، يا بولماسا كەڭسەلەرىندە وتىرىپ، ونلاين رەجيمدە اۋكتسيونعا قاتىسا بەرەدى"، - دەپ اتاپ كورسەتتى ن. كەنجەبايەۆ.
ايتا كەتەيىك، بۇعان دەيىن قالا اكىمى اسەت يسەكەشيەۆ جەردى ساتۋ سالاسىندا بلوكچەين تەحنولوگيالارىنىڭ ەنگىزىلەتىنى جايىندا ايتقان. «بلوكچەيننىڭ ارقاسىندا قۇجاتتار مەن ءتىزىلىمدى وزگەرتۋ ارەكەتتەرىنە، سان الۋان مانيپۋلياتسيالارعا جول بەرىلمەيدى. اۋكتسيوننان كەيىن ءبىز بلوكچەين تەحنولوگيالارىن بىردەن جەر تەلىمدەرىنە مەنشىك قۇقىعىن، جىلجىمايتىن مۇلىك پەن ۇلەسكەرلىك كەلىسىمدەردى راسىمدەۋ سالاسىندا دا قولداناتىن بولامىز. سەبەبى بيزنەستىڭ تاراپىنان ءدال وسى ماسەلەلەرگە قاتىستى ارىز- شاعىمدار كوپتەپ ءتۇسىپ جاتىر. سوندىقتان سمارت تەحنولوگيالارمەن اينالىساتىن كومپانيالارعا جاقسى مۇمكىندىك بەرىلىپ وتىر. ولار بىرلەسكەن جوبالارعا قاتىسا الادى» ، - دەدى ءا. يسەكەشيەۆ استانالىق كاسىپكەرلەرمەن بولعان كەزدەسۋدە. سول كەزدە قالا باسشىسى جاڭا ۇلگىدەگى العاشقى اۋكتسيون اعىمداعى جىلدىڭ ءبىرىنشى توقسانىندا وتەدى دەگەن بولاتىن.
