ساۋىتبەك ابدراحمانوۆ: ب ۇ ۇ- نىڭ ەڭ بەدەلدى ورگانىنا قازاق ءتىلى تۇڭعىش رەت شىقتى

استانا. قازاقپارات - قازاقستان پرەزيدەنتى نۇرسۇلتان نازاربايەۆتىڭ ب ۇ ۇ قاۋىپسىزدىك كەڭەسىندە قازاق تىلىندە سويلەۋى - قازاق ءتىلىنىڭ تاعى ءبىر بەلەسى. استانادا وتكەن «ەلباسى جولداۋى: جاڭا جاھاندىق كەزەڭدەگى قازاق ءتىلى» اتتى دوڭگەلەك ۇستەلدە پارلامەنت ءماجىلىسىنىڭ دەپۋتاتى وسىنداي پىكىر ءبىلدىردى،

دەپ حابارلايدى «قازاقپارات» ح ا ا ءتىلشىسى.

«كەشە 18 - قاڭتار - ءبىزدىڭ ءتىلىمىز ءۇشىن تاعى ءبىر ايتۋلى كۇن بولدى. 2015 -جىلدىڭ قاراشا ايىندا ءبىرىنشى رەت ب ۇ ۇ مىنبەرىنە قازاق ءتىلى كوتەرىلگەن بولاتىن. كەشە سول ب ۇ ۇ- نىڭ ەڭ قۋاتتى، بەدەلدى ورگانى - قاۋىپسىزدىك كەڭەسىنە ءبىرىنشى رەت قازاق ءتىلى شىقتى. بۇل دا ءبىزدىڭ ءتىلىمىزدىڭ بەلەسى دەپ ويلايمىن. 2015 -جىلعى ەلباسىنىڭ ب ۇ ۇ مىنبەرىندە سويلەگەن سوزىنە بايلانىستى ايتقىم كەلەدى: العاشقى ساتتەردە جارتى مينۋتتاي ما، 20 سەكۋندتاي ما ءبىر جاعداي بولدى. ويتكەنى، اۋدارما باستالعان جوق. ول جەردەگى اۋدارماشىلار التى تىلدە سويلەپ، اۋدارۋعا بەيىمدەلگەن. ولارعا قازاق تىلىندە سويلەپ تۇرعان ادامنىڭ ءسوزىن اعىلشىن تىلىنە اۋدارىپ، ولار اعىلشىن تىلىندە تىڭداپ، باسقا يسپان، نەمىس تىلدەرىنە كوشۋگە ءماجبۇر بولدى. بۇل قازاق تىلىنە قاتىستى جاڭالىق بۇكىل الەمدىك باسپا ءسوزدىڭ نازارىن اۋدارتتى دەسە دە بولادى»، - دەدى ساۋىتبەك ابدراحمانوۆ.

دەپۋتات العاشقى جارتى مينۋت بويى سينحروندى اۋدارمانىڭ جاسالماعانى، ءبىر جاعىنان جاقسى بولعانىن، سول فاكتىگە جۇرت ەرەكشە نازار اۋدارعانىن اتاپ ءوتتى.

ساۋىتبەك ابدراحمانوۆ سونىمەن بىرگە، قازاقستانداعى باسقا ۇلتتاردىڭ لاتىن الىپبيىنە كوشۋدى قولداۋى ەلىمىزدىڭ بىرلىگىن كورسەتەتىنىن جەتكىزدى.

«وسى تىلگە، ونىڭ ىشىندە قازاق جازۋىنىڭ لاتىنعا اۋىسۋىنا بايلانىستى پارلامەنتتە قازاقستان حالقى اسسامبلەياسى دەپۋتاتتىق توبىنىڭ جەتەكشىسى رەتىندە ءبىزدىڭ اعايىندارعا وي تۇرتكى رەتىندە ءبىر پىكىر ايتىپ ەدىم. سونداعى ازاماتتار بۇل پىكىرگە وتە ۇلكەن تۇسىنىستىكپەن قارادى. اتاپ ايتقاندا، جانىمدا وتىرعان فاحريددين قاراتايەۆ، شايماردان نۋرۋموۆ «ءبىز قازاق تىلىمەن بىرگە تىنىستايمىز. ءبىزدىڭ ءتىلىمىز دە، ءدىلىمىز دە ءبىر. ءبىز قازاق اعايىندارمەن بىرگە لاتىنعا كوشەمىز» دەپ وتىر. بۇل مەنىڭشە، ءبىزدىڭ ەلىمىزدىڭ بىرلىگىن، اعايىننىڭ اۋىزبىرشىلىگىن كورسەتەتىن وتە جاقسى شەشىم دەپ ويلايمىن. وسىعان رازىلىعىمىزدى ايتقىمىز كەلەدى»، - دەپ ءتۇيدى ساۋىتبەك ابدراحمانوۆ.

ەسكە سالا كەتسەك، اتالعان دوڭگەلەك ۇستەلدە قازاق تىلىندەگى ەنتسيكلوپەديالىق، وقۋ- ادىستەمەلىك، عىلىمي، انىقتامالىق، تانىمدىق مازمۇندا قىرىققا جۋىق كىتاپتىڭ تۇساۋكەسەرى وتكەن بولاتىن. اتاپ ايتقاندا، «احمەت بايتۇرسىن ۇلى» ەنسيكلوپەدياسى، «قازاق ءسوزى» قازاق ءتىلىنىڭ بەلسەندى لەكسيكا- گرامماتيكالىق مينيمۋمىنىڭ ادىستەمەلىك كەشەنى، «وقۋ قۇرالى + مۋلتيمەديالىق باعدارلاماسى (س د ديسك)»، «قازاق ءسوزى» قازاق ءتىلىنىڭ بەلسەندى لەكسيكا- گرامماتيكالىق مينيمۋمىنىڭ ادىستەمەلىك كەشەنى سەكىلدى تۋىندىلار وقىرمانعا جول تارتتى.

 سونىمەن بىرگە، قازاقستانداعى كىتاپحانالاردىڭ سورەلەرى «ۋكراين ءتىلىن وقىتۋعا ارنالعان وقۋ- ادىستەمەلىك قۇرال»، «بالالارعا بازارلىق» (انا ءتىلىن ۇيرەتۋ قۇرالدارى)، «ءسوز سىنى»، «الاش قوزعالىسى» جيناعى، «الاش قوزعالىسى. بالالارعا ارنالعان انىقتامالىق»، «ادىستەمە الەمىندە» (عىلىمي- ادىستەمەلىك جيناق)، «استاناعا قوش كەلدىڭىز! تىلدەسكىش» كىتابىنىڭ يسپان- قىتاي- اراب- اعىلشىن تىلدەرىنە ارنالعان نۇسقالارىمەن ت. س. س كىتاپتارمەن تولىقتى.

اۆتور: ايان بەكەن ۇلى