استانا اكىمى الداعى ايازدى كۇندەرگە بايلانىستى قالا تۇرعىندارىن ەسكەرتتى

استانا. قازاقپارات - ەلوردا اكىمى اسەت يسەكەشيەۆ الداعى كۇندەرى تەمپەراتۋرانىڭ تومەندەۋىنە بايلانىستى قالا تۇرعىندارىن قاۋىپسىزدىك شارالارىنا نازار اۋدارۋعا شاقىردى، دەپ حابارلايدى قازاقپارات.

«قازگيدرومەتتىڭ مالىمەتتەرىنە سايكەس، كەلەسى اپتادا، ياعني 22 - قاڭتاردان باستاپ، اسىرەسە 23-26 - قاڭتار ارالىعىندا اۋا- رايى كۇرت سۋىتىپ، اۋا تەمپەراتۋراسى -35 - 40 گرادۋسقا دەيىن تومەندەۋى مۇمكىن. وسىعان بايلانىستى بارلىق قالالىق قىزمەتتەرگە، اسىرەسە ۇزدىكسىز جىلۋ ەنەرگياسىمەن قامتاماسىز ەتەتىن ەنەرگەتيكتەرگە ايازدى كۇندەرگە دايىن بولۋ ءۇشىن تاپسىرما بەردىم»، - دەپ جازدى قالا اكىمى فەيسبۋكتەگى پاراقشاسىندا.

سونىمەن قاتار بارلىق مەكتەپتەرمەن جانە بالاباقشالارمەن ءتيىستى شارالاردى جۇرگىزۋ بويىنشا ءبىلىم باسقارماسىنا ءتيىستى تاپسىرما بەرىلدى. بۇدان بولەك، قاجەت بولعان جاعدايدا كومەك كورسەتۋ ءۇشىن ءارى جەدەل ارەكەت ەتۋ تۇرعىسىندا دەنساۋلىق باسقارماسىنا مەن ىشكى ىستەر دەپارتامەنتىنە دە تاپسىرما جۇكتەلدى.

«قالالىق قىزمەتتەرمەن بارلىق ءتيىستى شارالار قابىلداناتىن بولادى. قالا تۇرعىندارىنا، قۇرىلىس، ساۋدا، كولىك جانە باسقا دا ۇيىمدارعا وسى اقپاراتتى نازارعا الىپ، ادامداردىڭ دەنساۋلىقتارى مەن ومىرلەرىن، قاۋىپسىزدىگىن قامتاماسىز ەتۋ بويىنشا بارلىق قادامداردى قاراستىرۋدى سۇرايمىن»، - دەدى اسەت يسەكەشيەۆ.

اۆتور: رۋسلان عابباسوۆ