وزبەكستان پرەزيدەنتى اقتوبەدە قازا تاپقانداردىڭ وتباسىلارىنا كوڭىل ايتتى

استانا. قازاقپارات - وزبەكستان پرەزيدەنتى شاۆكات ميرزيەيەۆ اقتوبە وبلىسىندا اۆتوبۋس ورتىنە بايلانىستى قازا بولعانداردىڭ وتباسىلارى مەن تۋىستارىنا كوڭىل ايتتى، دەپ حابارلايدى قازاقپارات.

«2018-جىلعى 18- قاڭتاردا قازاقستان رەسپۋبليكاسى اقتوبە وبلىسى ىرعىز اۋدانىندا اۆتوبۋس ورتەنىپ، سونىڭ سالدارىنان 52 ادام قازا بولىپ، 5 ادام زارداپ شەكتى. الدىن الا مالىمەتتەر بويىنشا ولاردىڭ اراسىندا وزبەكستان ازاماتتارى دا بار. وسىعان بايلانىستى وزبەكستان پرەزيدەنتى شاۆكات ميرزيەيەۆ قايعىلى وقيعادان كوز جۇمعانداردىڭ وتباسىلارى مەن جاقىن تۋىستارىنا كوڭىل ايتتى»، - دەلىنگەن وزبەكستان پرەزيدەنتى باسپا ءسوز قىزمەتىنىڭ حابارلاماسىندا.

وسى ورايدا باسپا ءسوز قىزمەتى ش. ميرزيەيەۆتىڭ تاپسىرماسىمەن وزبەكستان پرەمەر-ءمينيسترى باسشىلىعىندا ارنايى ۇكىمەتمەتتىك كوميسسيا قۇرىلعانىن ەسكە سالىپ ءوتتى.

«ارنايى ۇكىمەتتىك كوميسسياعا قازاقستاننىڭ وكىلدەرىمەن بىرلەسە وتىرىپ، اپاتتىڭ تۋىنداۋ سەبەپتەرىن ايقىنداۋ، ەل ازاماتتارىنىڭ تۇلعاسىن تانۋ، قازا بولعاندار مەن زارداپ شەككەندەردى ەلگە جەتكىزۋ بويىنشا شارالاردى جۇرگىزۋ مىندەتتەرى جۇكتەلگەن. 18- قاڭتاردا ۇكىمەتتىك كوميسسيا مۇشەلەرىمەن ارنايى ۇشاق تاشكەنتتەن اقتوبەگە (قازاقستان) ۇشتى»، - دەلىنگەن وزبەكستان پرەزيدەنتى باسپا ءسوز قىزمەتىنىڭ مالىمەتىندە.

ايتا كەتەيىك، بۇگىندە وزبەكستان ازاماتتارىنىڭ قايعىلى قازاعا ۇشىراۋىنا بايلانىستى شاۆكات ميرزيەيەۆتىڭ اتىنا ءبىرقاتار ەلدەردىڭ باسشىلارى كوڭىل ايتۋ جەدەلحاتىن جولداپ جاتىر.

بۇدان بۇرىن حابارلانعانداي، كەشە بولعان ءورت كەزىندە 52 جولاۋشى قازا بولدى، بەس ادام امان قالدى. امان قالعاندار اقتوبە وبلىسىنداعى اۋرۋحاناعا جەتكىزىلدى. بارلىعى 57 ادام رەسەيگە بارماق بولعان.

اۆتور:  رۋسلان عابباسوۆ