نۇرسۇلتان نازاربايەۆ ا ق ش پرەزيدەنتىمەن قانداي ماسەلەلەردى تالقىلاعانىن ايتتى
«ول جۇمىسىنا كىرىسكەن ۋاقىتتان بەرى سىرتتاي بايلانىستار بولىپ، ەكى رەت تەلەفون ارقىلى سويلەسىپ، ەر-ريادتا كەزدەستىك. جانە دە بىزدەردە قاندايدا ءبىر ءوزارا تۇسىنىستىك قالىپتاستى. مەن ونىڭ باسقا پرەزيدەنتتەرگە مۇلدەم ۇقسامايتىندىعىن ءبىلدىم. مەن ۇلكەن بۋشتان باستاپ، كلينتون، كىشى بۋش، وبامامەن كەزدەستىم. ونىڭ كەلىسسوزدەر جۇرگىزۋ مانەرى دە ەشكىمگە مۇلدەم ۇقسامايدى. بيزنەسمەن، ناقتىلىقتىڭ ادامى، بوس ءسوزدى جاقسى كورمەيدى. بۇل ماعان دا ۇنايدى. ءبىز ءبىر-بىرىمىزبەن بىردەن تۇسىنىستىك. جايلى جۇمىس جاسادىق، ەشقانداي پروبلەما بولعان جوق. قايتا تالقىلاعان ماسەلەلەر بويىنشا تىكەلەي بايلانىسىپ وتىرۋعا ۋاعدالاستىق. امەريكالىق كومپانيالارعا قازاقستاندا جۇمىس ىستەۋگە بەلگىلى مۇمكىندىك بەرىلەتىندىگىنە، قازاقستان ورتالىق ازياداعى ماڭىزدى ەل ەكەندىگىنە كەلىستىك»، - دەدى نۇرسۇلتان نازاربايەۆ.
مەملەكەت باسشىسى ا ق ش پەن قازاقستاننىڭ ستراتەگيالىق سەرىكتەستىگىن ودان ارى نىعايتۋ ماسەلەسى دونال ترامپپەن بىرگە قول قويعان بىرلەسكەن مالىمدەمەدە كورىنىس تاپقاندىعىن باسا ايتتى. ا ق ش پرەزيدەنتىمەن الەمنىڭ شيەلەنىستى نۇكتەلەرىندەگى ماسەلەلەر دە تالقىلانعانىن اتاپ ءوتتى.
«ونى سولتۇستىك كورەياداعى احۋال قاتتى الاڭداتادى. مەن سولتۇستىك كورەيا پروبلەماسىن ا ق ش، رەسەي جانە قىتاي تىزە قوسا وتىرىپ قانا شەشە الاتىندىعىن ايتتىم. باسقا شەشىمى جوق. ول مۇنىمەن كەلىستى. مەنىڭشە، ءدال وسى باعىتتا جۇمىس ىستەۋ قاجەت»، - دەدى ق ر پرەزيدەنتى.
نۇرسۇلتان نازاربايەۆ ا ق ش پرەزيدەنتىمەن يران ماسەلەسىن، يادرولىق باعدارلاماسىن توقتاتۋ كەلىسىمىن تالقىلاعانىن ايتتى.
«ترامپقا بۇل كەلىسىمدەر ۇنامايدى. ءبىراق مەن بۇل كەلىسىمنىڭ جان-جاقتى سارالانعان، قاجەتتى ەكەندىگىن، ونى الىپ تاستاۋ يراننىڭ ءوزىنىڭ باعدارلاماسىن جۇزەگە اسىرۋدى قايتا قولعا الۋىنا تۇرتكى بولاتىندىعىن، سول كەزدە سولتۇستىك كورەيا سىندى تاعى ءبىر پروبلەماعا تاپ بولاتىندىعىمىزدى تاباندى تۇردە ايتتىم. مەنىڭشە، بۇل باعىتتا جۇمىستار جۇرگىزىلەتىن بولادى»، - دەدى ەلباسى.
نۇرسۇلتان نازاربايەۆ اقش پرەزيدەنتىمەن اۋعانستان ماسەلەسى دە قاراستىرىلعاندىعىن ايتتى.
اۆتور: مارلان جيەمباي
