نۇرسۇلتان نازاربايەۆ سولتۇستىك كورەيا باسشىلىعىن قازاقستان جولىمەن جۇرۋگە شاقىردى

نيۋ-يورك. قازاقپارات - قازاقستاننىڭ يادرولىق قارۋسىز جولى وزگە ەلدەرگە ۇلگى ءارى تاجىريبە تۇرعىسىنان كومەك بولار ەدى.

بۇل تۋرالى بۇگىن ب ۇ ۇ قاۋىپسىزدىك كەڭەسىنىڭ «جاپپاي قىرىپ-جوياتىن قارۋدى تاراتپاۋ: شارالار مەن سەنىم» تاقىرىبىنداعى وتىرىسىندا ءسوز سويلەگەن قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.

بۇگىنگى ءىس-شارا قازاقستاننىڭ ب ۇ ۇ قاۋىپسىزدىك كەڭەسىندەگى ءتوراعالىعى كەزىندەگى نەگىزگى شارا. جيىن جاھاندىق كۇن تارتىبىندەگى ەڭ وزەكتى تاقىرىپتاردىڭ بىرىنە ارنالىپ وتىر. بەيبىتشىلىك پەن قاۋىپسىزدىككە قول جەتكىزۋ جولىنداعى سەنىم شارالارى شيەلەنىستىڭ الدىن الۋ مەن ماڭىزدى جاھاندىق پروبلەمالاردى شەشۋدە نەگىزگى ءرول وينايدى. مەن بۇۇ باس اسسامبلەياسىنىڭ 47-سەسسياسىنىڭ مىنبەرىنەن ازياداعى قاۋىپسىزدىك پەن سەنىم شارالارى جونىندەگى وڭىرلىك قۇرىلىم قۇرۋ جونىندە ۇسىنىس ايتقان بولاتىنمىن. تىنىمسىز ديپلوماتيالىق جۇمىستىڭ ناتيجەسىندە بۇل مەحانيزم قۇرىلدى»، - دەدى مەملەكەت باسشىسى.

ەلباسىنىڭ ايتۋىنشا، قازىرگى تاڭدا ازياداعى ءوزارا ىقپالداستىقتىڭ جانە سەنىم شارالارى كەڭەسى وڭىردەگى 26 مەملەكەتتى بىرىكتىرىپ، جەمىستى جۇمىس ىستەۋدە.

«شيرەك عاسىردان كەيىن بۇۇ عيماراتىندا قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قازاقستان اتىنان ءسوز سويلەپ تۇرمىن. ءبىراق جەكەلەگەن ەلدەر اراسىندا دا، جاھاندىق دەڭگەيدە دە ءوزارا سەنىمدى ارتتىرۋ ماسەلەسىنىڭ ءالى دە كۇردەلى ەكەنىن جانە ونىڭ كۇننەن-كۇنگە وزەكتى بولا تۇسكەنىن ايتۋعا ءماجبۇرمىن. سەنىم شارالارى جاھاندىق قاۋىپسىزدىكتى قولداۋدىڭ، بۇكىل پلانەتا كولەمىندە بەيبىتشىلىكتى نىعايتۋدىڭ اسا ماڭىزدى ەلەمەنتى رەتىندە كۇن تارتىبىنەن تۇسپەۋى ءتيىس»، - دەدى ەلباسى.

وسى ورايدا نۇرسۇلتان نازاربايەۆتىڭ ونىڭ سەبەبىن دە ءتۇسىندىرىپ بەردى.

«بىرىنشىدەن، سەنىم شارالارى بۇكىل ادامزاتقا جاڭا جويقىن سوعىس قاتەرى تونگەن XX عاسىردىڭ ەكىنشى جارتىسىندا جاپپاي جويىلۋ قاۋپىنىڭ الدىن الۋ كەزىندە ءوزىن-ءوزى اقتادى. ب ۇ ۇ جارعىسىندا «ءبىزدىڭ باستى مىندەتىمىز ‒ كەلەر ۇرپاقتى سوعىس ورتىنەن قۇتقارۋ» دەپ جازىلعان. ب ۇ ۇ جۇيەسىندەگى شيرەك عاسىر ىشىندە مەنىڭ ەلىم قارقىندى دامۋ جولىنان ءوتتى. يادرولىق ارسەنال بويىنشا الەمدەگى ءتورتىنشى ەلدەر تاراتپاۋ جونىندەگى قوزعالىستىڭ كوشباسشىسىنا اينالدىق. يادرولىق قارۋدان جانە يادرولىق دەرجاۆا مارتەبەسىنەن باس تارتۋ ءبىزدىڭ سانالى ءارى شىنايى تاڭداۋىمىز جانە قازاقستاننىڭ بارشا حالقى قولداپ، الەمدىك قوعامداستىق لايىقتى باعاسىن بەرگەن ەرىكتى قادامىمىز بولدى»، دەدى ق ر پرەزيدەنتى.

نۇرسۇلتان نازاربايەۆ بۇگىندە ەلىمىز يادرولىق قاۋىپسىزدىك سالاسىنداعى بارلىق ىرگەلى حالىقارالىق كەلىسىمدەردىڭ قاتىسۋشىسى بولىپ وتىرعانىن باسا ايتىپ، يادرولىق قارۋى جوق مەملەكەت رەتىندەگى مارتەبەمىزدى زاڭدى تۇردە بەكىتكەنىمىزدى اتاپ ءوتتى.

«ەكىنشىدەن، ءوزارا سەنىم احۋالى حالىقارالىق ىنتىماقتاستىقتىڭ جاڭا مودەلىن قالىپتاستىرۋعا سەپتىگىن تيگىزە الادى. ماگاتەنىڭ تومەن بايىتىلعان ۋران بانكىنىڭ اشىلۋى ‒ وسى ىنتىماقتاستىقتىڭ جارقىن مىسالى ءارى ونىڭ جۇزەگە اسۋىنىڭ كورىنىسى، قازاقستان يادرولىق قارۋدى تاراتپاۋ رەجىمىن نىعايتۋعا وسىلايشا كەزەكتى ۇلەس قوستى. ۇشىنشىدەن، قازاقستاننىڭ يادرولىق قارۋسىز جولى وزگە ەلدەرگە ۇلگى ءارى تاجىريبە تۇرعىسىنان كومەك بولار ەدى»، - دەدى قازاقستان پرەزيدەنتى.

ءبىز تاۋەلسىز ەل بولىپ، مەملەكەتىمىزدى نىعايتتىق. يادرولىق قارۋدان باس تارتىپ جانە يادرولىق دەرجاۆالاردان شابۋىل جاساماۋ كەپىلدىگىن الىپ، جوعارعى بەدەلگە يە بولدىق.

«وسى رەتتە، سولتۇستىك كورەيا باسشىلىعىن ءبىزدىڭ جولىمىزبەن جۇرۋگە شاقىرامىز»، - دەدى پرەزيدەنت.

اۆتور: مارلان جيەمباي