قىز- كەلىنشەكتەر نەسيەسىن وتەۋ ءۇشىن انالىق بەزىن تاپسىرۋدا - سالتانات بايقوشقاروۆا

استانا. قازاقپارات - قازاقستاندا ءوز ەركىمەن انالىق جاسۋشالارىن دونورعا تاپسىراتىن قىز- كەلىنشەكتەر از. سول سەبەپتى جاساندى ۇرىقتاندىرۋعا كەلەتىن ايەلدەرگە دونور جاسۋشالارى تابىلماي جاتادى،

 دەپ حابارلايدى قازاقپارات ءتىلشىسى.

قازاقستانداعى جاساندى ۇرىقتاندىرۋدىڭ اۆتورى، بيولوگيا عىلىمدارىنىڭ دوكتورى سالتانات بايقوشقاروۆانىڭ ايتۋىنشا، ەلىمىزدە بالا تۋاتىن ۋاقىتتى وتكىزىپ العان قىز- كەلىنشەكتەر كوپ. بۇدان بولەك، سانالۋان سىرقاتتاردان كەيىن بالا كوتەرە المايتىندار دا از ەمەس.

«بىزگە 40-تان اسقان ايەلدەر كەلەدى. بالاسى اپاتتان، بولماسا، اۋرۋدان قايتىس بولعان انالار دا بار. ولار قايعىرىپ، ۇزاق ءجۇرىپ قالادى. اۋرۋ- سىرقاتىن ەمدەپ ءجۇرىپ قالاتىندار دا بار. ونداي ايەلدەردىڭ انالىق بەزى (يايتسەكلەتكا) از بولادى. ولار تەك دونورلىق جاسۋشالارمەن عانا بالا كوتەرە الادى. جاقىن اپا- سىڭىلەرى دە ءوز انالىق جاسۋشالارىن بەرۋگە كوپ كەلىسە بەرمەيدى. ويتكەنى دونورلىق جاسۋشالاردى الۋ ءۇشىن كوپ پرەپاراتتار ەگۋ كەرەك. ادام اعزاسىنا ۇلكەن سالماق تۇسەدى. وسىنداي جاعدايدا دونورلىق جاسۋشالاردى تابۋ قيىن»، - دەيدى س. بايقوشقاروۆا.

عالىمنىڭ ايتۋىنشا، بۇگىندە انالىق جاسۋشالاردى ساقتايتىن كرەوبانك بار. ءبىراق ونى كەڭەيتۋ كەرەك. سەبەبى دونورلىق جاسۋشالاردىڭ تاپشىلىعى بارىنشا بايقالادى.

«مىسالى، امەريكادا دونورلىق جاسۋشالاردى كۇيەۋگە تيمەگەن، بالا تۋماعان 20 جاستاعى بويجەتكەندەردەن الادى ەكەن. امەريكالىق پروفەسسور كوللەدج «ستۋدەنتتەرىنەن الامىز» دەيدى. ولار 10 مىڭ دوللار بەرەدى ەكەن. بىزدە ونداي اقشانى كىم بەرەدى؟ وندا ەلدىڭ ءبارى جۇمىستى قويىپ، دونور بولادى عوي. بىزدە كوپ بولسا، 200-300 مىڭ تەڭگە. سول ءۇشىن اقشا الامىز دەپ بارادى. ويتكەنى نەسيەسىن جابۋ كەرەك. بالاسىنا بىردەڭە اپەرۋ كەرەك. نەگىزى، دونورعا ءبارى بىردەي كەلە بەرمەيدى»، - دەپ اتاپ كورسەتتى س. بايقوشقاروۆا.

ونىڭ ويىنشا، بۇگىندە انالىق جاسۋشالاردى تاپسىراتىنداردى قاتاڭ ىرىكتەۋدى قولعا الۋ قاجەت. قازىرگى كەزدە ءبىر بالا تۋعان ايەلگە عانا دونور بولۋعا رۇقسات بار. وعان قوسا، تەك جاس كەلىنشەكتەر عانا انالىق جاسۋشىلارىن تاپسىرسا، سان الۋان تۇسىنىسپەۋشىلىكتەردىڭ الدىن الۋعا بولادى.

 جالپى، بۇگىندە قازاقستاندا انالىق جاسۋشالاردى تاپسىرۋ دا، سالۋ دا قۇپيا تۇردە جۇرگىزىلەدى. وندايدا جاسۋشانى تاپسىراتىن جانە الاتىن ادام ءبىر- ءبىرىن بىلمەيدى.

 ايتا كەتەيىك، بۇگىن استانادا وتكەن كونفەرەنسيا اياسىندا س. بايقوشقاروۆا جاساندى ۇرىقتاندىرۋدى بارىنشا ارزانداتۋعا بولاتىنىن جەتكىزدى.

اۆتور: ارمان اسقاروۆ