قىستا اياق كيىمدى قۇتقاراتىن ازىق- تۇلىكتەر
كوفەنىڭ قويۋۋى. ەگەر قوڭىر ءتۇستى كۇدەرى اياق كيىمىڭىز بولسا، ونى كوفە قويۋىمەن سۇرتۋگە بولادى. ول كەپكەن كەزدە قۇرعاق شەتكانىڭ كومەگىمەن كوفەمەن قوسا لاستىقتى بىرگە ءسۇرتىپ شىعاسىز.
پياز . پيازدى ۇككىشتەن وتكىزىپ، ونىڭ سۋىنا جۇمساق مايلىقتى سۋلاپ، ەتىكتى سۇرتەسىز. ليمون . بۇل ءتۇرلى ءتۇستى بىلعارى ەتىكتى داقتاردان جىلدام ءارى وڭاي تازارتاتىن ءادىس. ليموندى ەكىگە ءبولىپ، سۋىن شىعاراسىز. سول سۋعا داكەنى سۋلاپ، ەتىكتى سۇرتەسىز.
ءسۇت. اق ەتىكپەن كوشەگە ءبىر ءجۇرىپ شىققاننان كەيىن وعان داقتار پايدا بولادى. ونى كەتىرۋ ءۇشىن ءسۇتتى قولدانىڭىز. قارا ەتىكتى ەمەس تەك قانا اق ەتىكتى سۇتپەن سۇرتكەن ءجون. ءسۇت پەن پياز بۇل ارالاس ءادىس لاكتى اياق كيىمدەرگە جاقسى كومەكتەسەدى. لاكتى اياق كيىمگە ەتىككە ارنالعان كرەم قولدانساڭىز، ول ءوزىنىڭ جىلتىراۋىن كەتىرەدى. لاكتى اياق كيىمدى الدىمەن سۇتپەن، سودان سوڭ كەسىلگەن پيازبەن ءسۇرتىڭىز. سوڭىنان تازا جۇمساق داكەمەن ءسۇرتىپ شىعاسىز.
كارتوپ ۇنى. كۇدەرى اياق كيىم نازىك بولىپ كەلەتىندىكتەن، تەز لاستانادى. كەشكىلىك كۇدەرى اياق كيىمگە تالك، بالالار سەپپەسىن نەمەسە كارتوپ ۇنىن سەۋىپ تاستاڭىز. ەرتەڭگىسىن شەتكامەن ەتىكتى ۇنتاق قالدىعىنان تازارتىپ شىعاسىز.
اس سوداسى. بىلعارى اياق كيىمدەگى ازداپ قىرىلعاندى كەتىرۋگە اس سوداسى كومەكتەسەدى. تازا داكەنى الدىمەن سۋعا، سودان سوڭ سوداعا باتىرىپ، قىرىلعان جەردى ءسۇرتىڭىز. ودان كەيىن سوداسىز ىلعال داكەمەن تاعى دا ءسۇرتىپ شىعىڭىز. سوڭىندا قۇرعاتىڭىز. ول ازداپ قىرىلعانعا كومەكتەسۋى ءتيىس، ەگەر ەسكى ەتىك بولسا، ءتۇرلى ءتۇستى كرەم قولدانعان ءجون.
وسىمدىك مايى. بۇرىن دۇكەندەردە ەتىكتى قورعايتىن سپرەيلەر ساتىلعان جوق. سوندىقتان ەتىكتى وسىمدىك مايىمەن ءسۇرتىپ، جىلتىراتىپ قوياتىن. ول ەتىكتىڭ ءتۇرىن كەلتىرۋمەن قاتار، كوشەدەگى لاس سۋدان دا قورعايدى.
سىركە سۋى سىركەنى سۋمەن تەڭ ۇلەستە ارالاستىرىڭىز. وعان داكەنى سۋلاپ، ەتىكتى وكشەسىمەن قوسا ءسۇرتىپ شىعىڭىز. ونى كەشكىلىك جاساعان ءجون. بۇل ەرىتىندىمەن ەتىكتە پايدا بولعان اق داقتاردى دا كەتىرۋگە بولادى.
Massaget.kz
