نيۋ- يوركتىڭ ەڭ ۇزدىك پوليتسەيى ديماش نيازبەكوۆ تۋعان جەرى قازىعۇرتتا بولدى
وزگە ەلدە جۇرسە دە قازاقي قاسيەتىنەن ايىرىلماعان ءتارتىپ ساقشىسىنا اۋدان تۇرعىندارى ەرەكشە قۇرمەت كورسەتتى، دەپ حابارلايدى قازاقپارات ءتىلشىسى.
اۋداندىق مادەنيەت ۇيىندە وتكەن كەزدەسۋدە سپورتشى پوليتسەي جاستاردىڭ سۇراعىنا جاۋاپ بەردى. ءوزى تۋرالى بايانداپ كەتتى. ديماشتىڭ سوزىنشە، ول شىمكەنت قالاسىندا دۇنيەگە كەلگەنىمەن، اكەسى يسماتتىڭ تۋىپ وسكەن جەرى - قازىعۇرت اۋدانىنىڭ اتبۇلاق اۋىلى. 13 جاسىندا اتا- اناسى وتباسىمەن مۇحيت اسىپ، شەتەلدە ءومىر سۇرۋگە شەشىم قابىلدايدى. امەريكاداعى العاشقى جىلدار جەرلەسىمىزگە وڭاي سوقپاعان. دەگەنمەن، ومىرگە دەگەن قۇشتارلىق، جەڭىسكە ۇمتىلۋدىڭ ارقاسىندا 2 جىلدىڭ ىشىندە اعىلشىن ءتىلىن تولىق مەڭگەردى. كەيىن پوليتسيا اكادەمياسىنا ءتۇسىپ، ءتارتىپ ساقشىسى اتاندى. قىسقا ۋاقىت ىشىندە ۇلگىلى جۇمىسىنىڭ ارقاسىندا الدىڭعى قاتارلى پوليتسەي اتانىپ ۇلگەردى. بىلتىر ەسىرتكى ساتاتىن قىلمىستىق توپتىڭ سەركەسىن قۇرىقتاپ، نيۋ- يورك قالاسىنىڭ 2017 -جىلعى ۇزدىك پوليتسەيى اتاندى. ديماش نيازوۆ لوس- اندجەلەستە نۇرلان قوياانبايەۆتىڭ ۇسىنىسىمەن «بيزنەس پو- كازاحسكي ۆ امەريكە» كينوسىنىڭ تۇسىرىلىمىنە دە قاتىسقان. سونىمەن قاتار، ول كاسىپقوي بوكسپەن اينالىسادى. بۇگىنگە دەيىن 13 كەزدەسۋ وتكىزىپ، بارلىعىندا جەڭىمپاز بولعان. كەزدەسۋ بارىسىندا پوليتسەي جاس بوكسشىلارعا شەبەرلىكتى شىڭداۋ ساباعىن دا ءوتتى.
«كەزدەسۋ ماعان وتە قىزىقتى جاعىمدى اسەر قالدىردى. اسىرەسە جاستاردىڭ سپورتقا قۇشتارلىعى مەنى قۋانتتى. كوبىسى اعىلشىن ءتىلىن بىلەدى ەكەن. بۇل وتە قۇپتارلىق جاعداي. سەبەبى الەمدىك قارىم قاتىناس ءتىلى بولعاندىقتان وسى ءتىلدى بىلگەن جاقسى. قازىعۇرت اۋىلى كىشكەنتاي بولعانىمەن مۇندا بولاشاقتا ەلدىڭ اتىن شىعارىپ نامىسىن قولدايتىن تالانتتى جاستار كوپ ەكەن. ولار ءوز ماقساتىنا جەتەتىنىنە سەنىمدىمىن. امەريكادا قازاقتار كوپ، دەگەنمەن مۇنداعىداي ءبىرىن ءبىرى جاقسى قولداي بەرمەيدى» ، - دەيدى ا ق ش پوليتسەيى.
مۇحيتتىڭ ارعى جاعىنان اتا مەكەنىن اڭساپ كەلگەن ديماش نيازوۆقا قازىعۇرتتىقتار قامشى ۇستاتتى. تۋعان جەردىڭ سازى ەسىنەن شىقپاسىن دەپ دومبىرا سىيلادى. ابىز اقساقال يسا تەلىكبايەۆ اق باتاسىن بەردى.
اۆتور: اينۇر اقبايەۆا
