جەكەشەلەندىرۋ: قانشا كاسىپورىن ساتىلدى

استانا. قازاقپارات - ۇكىمەتتىڭ بۇگىنگى وتىرىسىندا ق ر قارجى ءمينيسترى باقىت سۇلتانوۆ جەكەشەلەندىرۋ شارالارى بويىنشا ەسەپ بەردى، دەپ حابارلايدى قازاقپارات ءتىلشىسى.

ءمينيستردىڭ سوزىنە قاراعاندا، جەكەشەلەندىرۋدىڭ كەشەندى جوسپارى 904 نىساندى قامتيدى. «اتالعان نىسانداردىڭ  876 سى تۋرالى تولىق اقپارات gosreestr.kz سايتىنا شىعارىلدى. بۇل تىزىمگە قايتا قۇرىلاتىن جانە قايتا تىركەۋدەن وتەتىن 28 رەسپۋبليكالىق مەنشىك نىسانى ەنگىزىلگەن جوق. ولار - اپاتتار مەديتسيناسى جانە تەمىرجول گوسپيتالدارى. ءبىراق ەكونوميكانى جاڭعىرتۋ ماسەلەلەرى جونىندەگى مەملەكەتتىك كوميسسيانىڭ شەشىمىنە سايكەس، اتالعان اكتسيونەرلىك قوعامدار قايتا قۇرىلۋعا جاتادى»، - دەپ اتاپ كورسەتتى ب. سۇلتانوۆ.

ونىڭ مالىمەتىنە سايكەس، ەكى جىلدىڭ ىشىندە كەشەندى جوسپارعا كىرەتىن 476 كاسىپورىن ساۋدا-ساتتىققا شىعارىلىپ، 367 ءسى ساتىلدى. ودان تۇسكەن قارجىنىڭ كولەمى 164 ميلليارد تەڭگەنى قۇرادى. «بۇدان باسقا، 255 نىسان قايتا ۇيىمداستىرۋ جانە تاراتۋ ساتىسىندا تۇر. جالپى، قايتا ۇيىمداستىرىلاتىن جانە تاراتىلاتىن نىسانداردى ەسەپكە العاندا جەكەشەلەندىرۋ بويىنشا كەشەندى جوسپاردىڭ ورىندالۋى 71 پروتسەنت دەڭگەيىندە»، - دەيدى قارجى ءمينيسترى.

ايتا كەتەيىك، وتىرىس بارىسىندا ق ر پرەمەر-ءمينيسترى باقىتجان ساعىنتايەۆ جەكەشەلەندىرۋدەن تۇسكەن قىرۋار قارجىنى ۇلتتىق قورعا ۋاقىتىندا اۋدارۋدى تاپسىردى. ال ق ر ۇلتتىق ەكونوميكا ءمينيسترى تيمۋر سۇلەيمەنوۆ ينۆەنتاريزاتسيادان كەيىن جاڭا كاسىپورىنداردىڭ ساڭىراۋقۇلاقتاي قاپتاپ كەتەتىنى ءۇشىن ءسوز ەستىدى.