الماتى وبلىستىق كواليتسياسى ەلباسى جولداۋىن تالقىلادى
الماتى وبلىستىق كواليتسيا قۇرامىنا 5 پارتيا فيليالى، قوعامدىق بىرلەستىك جەتەكشىلەرى، ۇكىمەتتىك ەمەس ۇيىم مۇشەلەرى كىرەدى. جيىن بارىسىندا پرەزيدەنتتىڭ بۇل جولداۋى مازمۇنى جاعىنان وتە كۇردەلى ەكەنىن اتاپ ءوتىپ، ءار پارتيا فيليالىنىڭ باسشىلارى ءوز ۇسىنىستارىن ايتتى. سونداي-اق ەلباسىنىڭ جولداۋىنداعى ماقسات-مىندەتتەردى جۇزەگە اسىرۋ تەتىكتەرىن بىرگە قاراستىرۋعا ۋاعدالاستى. جۇمىلا كوتەرگەن جۇك جەڭىل دەگەن قاعيداتپەن كواليتسيا مۇشەلەرى ەلباسىنىڭ تاپسىرمالارىن ورىنداۋعا ءبىر كىسىدەي اتسالىسۋعا سەنىم ءبىلدىردى.
كواليتسيا ءتوراعاسى، «نۇر وتان» پارتياسى الماتى وبلىستىق فيليالى ءتوراعاسىنىڭ ءبىرىنشى ورىنباسارى عالياسقار سارىبايەۆتىڭ ايتۋىنشا، ەڭ الدىمەن جولداۋدى ءوڭىر تۇرعىندارىنا ءتۇسىندىرۋ قاجەت. ول ءۇشىن ارنايى اقپاراتتىق توپتار قۇرىلىپ، حالىقپەن كەزدەسۋلەر ۇيىمداستىرىلۋى ءتيىس. ال ەكىنشى كەزەكتە جولداۋداعى تاپسىرمالاردىڭ ورىندالۋىنا جۇمىلا كىرىسۋ كەرەك.
اۆتور: سامال قابىشەۆا
