جەڭىلىس تاپساڭ دا، جەڭىستەن ءۇمىت ۇزبەۋ كەرەك- دينا جولامان
دينا جولاماننىڭ ەسىمى قازىر سپورتسۇيەر قاۋىمعا جاقسى تانىس. شاعىن عانا اۋىلدان تۇلەپ ۇشقان بىلعارى قولعاپ شەبەرىنىڭ جۇدىرىعى مىقتى، تالابى تاۋداي، ارمانى اسقاق. وسىدان ون شاقتى جىل بۇرىن دينانىڭ ءدال وسىنداي بيىككە قول جەتكىزەتىنىنە سەنگەن ءبىر ادام بولسا، ول ونىڭ اناسى مەن جاتتىقتىرۋشىسى ەدى.
«قولىما بىلعارى قولعاپ كيىپ، بوكسشى بولامىن، دەپ كەلگەن مەنىڭ تالابىمدى جانىپ، قابىلەتىمدى اشىپ، بولاشاعىما زور سەنىم ارتقان جاتتىقتىرۋشى الەكساندر ۆىسوتسكيگە ايتار العىسىم شەكسىز»، - دەيدى بوكسشى قىز.
قىزداردىڭ اۋىر اتلەتيكا، بوكس سياقتى ۇلكەن كۇشتى قاجەت ەتەتىن سپورت تۇرلەرىمەن اينالىسۋى بۇگىندە ەشكىمنىڭ تاڭدانىسىن تۋدىرمايدى. سودان بولار، ونىڭ بوكسپەن اينالىسقانىنا تۋعان- تۋىستارى دا قارسى بولا قويماعان.
«بوكسپەن 13 جاسىمنان بەرى اينالىسىپ كەلەمىن. سول جىلدارى جاقسى اۋدانىنداعى «ت ن ك اگروفيرماسىنىڭ» قولداۋىمەن ت. ۋاليەۆ اتىنداعى سپورت مەكتەبىندە قىزدار بوكسىنان ۇيىرمە اشىلدى. كلاستاس قىزدارمەن ەرىپ بارعان ەدىم، باسىندا جاي قىزىعۋشىلىعىم باسىم بولدى. كەيىن تىلسىم سىرعا تولى عاجايىپ سپورت الەمى وزىنە باۋراي ءتۇستى. انام مەنىڭ بۇل تاڭداۋىما قارسىلىق بىلدىرگەن جوق. كەرىسىنشە، قولداۋ كورسەتتى. وسىلايشا، بىلعارى قولعاپتى مىقتاپ قولىما كيدىم»، - دەيدى دينا جولامان.
سپورتشى ءوزىنىڭ الەم چەمپيونىنا دەيىنگى جولى بىردەن جانە كەزدەيسوق سامعاۋ ارقىلى ەمەس، ساتىلاپ وسۋمەن جانە كوپ تەر توگە وتىرىپ جاتتىعۋدىڭ ارقاسىندا كەلگەنىن ايتۋدا.
«سپورتتا «جەڭىلىس تاپساڭ دا، جەڭىستەن ءۇمىت ۇزبەۋ كەرەك» دەگەن قاعيدا بار. رينگكە العاش رەت 14 جاسىمدا شىقتىم. العاشقى رەت شىعىپ، جەڭىلىپ قالعانىم راس. ءبىراق، ءوز ءىسىنىڭ شەبەرى جاتتىقتىرۋشىمنىڭ قولداۋىمەن مەن سپورتتان قول ۇزبەي، ەڭسەمدى ەزبەي كەرىسىنشە، ەكى ەسە ەڭبەكتەنىپ، جەڭىسكە دەگەن قۇلشىنىسپەن العا ۇمتىلدىم. بۇگىن سونىڭ ناتيجەسىن كورىپ وتىرمىن»، دەپ ءسوزىن قورىتىندىلادى كەيىپكەرىمىز.
ايتا كەتۋ كەرەك، دينا جولامان - 2016 -جىلى استانا قالاسىندا ريو- دە- جانەيروداعى جازعى وليمپياداعا جولداما ساراپقا سالىنعان سايىستا التىن مەدالدى جەڭىپ الدى. 67 ەلدەن 285 بوكسشى قاتىسقان وسى ءدۇبىرلى دودادا 54 كەلى سالماق دارەجەسىندە سايىسقا تۇسكەن اقمولالىق سپورتشى قارسىلاستارىنىڭ ءبارىن جەڭىپ، الەم چەمپيونى اتاندى. ايەلدەر اراسىنداعى بوكس بۇگىندە وليمپيادالىق ويىندار تىزىمىنە ەنگەن سپورتتىڭ ەڭ تانىمال ءتۇرى بولىپ سانالادى.
بىرنەشە دۇركىن رەسپۋبليكا چەمپيونى بولعان دينا 2014 -جىلى وڭتۇستىك كورەيادا وتكەن حالىقارالىق جارىستا بەسىنشى ساتىدان كورىنىپ، بولاشاعىنان ۇلكەن ءۇمىت كۇتتىرەتىن سپورتشى ەكەنىن كورسەتتى. مۇنداي ءدۇبىرلى جارىسقا العاش قاتىسقان جاس سپورتشى ءۇشىن بۇل از تابىس ەمەس. سونداي- اق، بۇل جەتىستىك وعان حالىقارالىق دارەجەدەگى سپورت شەبەرى اتاعىن الۋعا ىقپالىن تيگىزدى.
استانادا وتكەن جارىسقا قايتا ورالساق، بۇل - ءدال وليمپيادا ويىندارى قارساڭىندا وتكەن اسا جاۋاپتى دا كۇردەلى سىن بولعان ەدى. جارىس جۇلدەگەرى وليمپياداعا جولداما دا الۋى ءتيىستىن. سوندىقتان سپورتشىلار جەڭىس ءۇشىن جانىن سالىپ باقتى. دينانىڭ قارسىلاستارى تالاي جارىستاردا توپ جارعان كىلەڭ مىقتىلار بولدى. دەگەنمەن، ولاردىڭ اتاق- داڭقى، بۇرىنعى جەڭىستەرى جاس بوكسشىنىڭ بويىنا ۇرەي ۇيالاتا قويعان جوق. نەمىس سپورتشىسى ورنەلەي ۆاحنەردى 3:0 ەسەبىمەن ۇتقان ول قىتايلىق ايا شينماتونى دا سونداي ەسەپپەن تىزە بۇكتىردى. فينالدا تاعى ءبىر قىتايلىق ليۋ پياپياونى دا 3:0 ەسەبىمەن انىق باسىمدىقپەن جەڭدى. ءسويتىپ، ەلىمىز تاريحىندا ايەلدەر اراسىندا ەكىنشى الەم چەمپيونى اتاندى.
وكىنىشكە وراي، دينا ريو- دە- جانەيرودا وتەتىن وليمپياداعا بارا المادى. ويتكەنى، ونىڭ سالماعى وليمپيادا ويىندارىنا كىرەتىن سالماق ولشەمىنە ەنبەدى. وليمپيادادا ايەلدەر بوكسىندا ءۇش: - 51, 60 جانە 75 كەلى سالماقتارى عانا قاراستىرىلعان. دەگەنمەن، بۇل جاسىنداي جارقىراپ، بيىككە ۇمتىلعان تالانتتى سپورتشىنىڭ جولىنا توسقاۋىل بولا المايدى. ونى الدىندا ءالى دە تالاي ءدۇبىرلى جارىستار كۇتىپ تۇر.
ەلىنىڭ ابىرويىن ويلاعان، سول ءۇشىن تەر توككەن قازاقستاننىڭ 100 جاڭا ەسىمىنىڭ ءبىرى دينا جولاماندى ءالى تالاي بيىكتەن كورەتىنىمىز انىق. وعان دينانىڭ سپورتتىق الەۋەتى مەن مۇمكىندىگى جەتەرلىك.
اۆتور: اسلان وسپانوۆ
