بالانى دامىتاتىن ويىندار
ۋاقىتتى كوڭىلدى وتكىزۋمەن قاتار، بالانى دامىتۋعا كومەكتەسەتىن ويىنداردى ۇسىنامىز. قيالشىل سۋرەتتەرى بار بالالار كىتابىن الىڭىز. بالاڭىزبەن سۋرەتتەرگە مۇقيات قاراپ وتىرىپ، كىتاپتاعىدان باسقا اڭگىمە ويلاپ تابىڭىز. بىرگە بىرنەشە اڭگىمە قۇراستىرعان سوڭ، ارى قاراي بالا ءوزى ويلاپ تابۋعا ىنتالانادى.
تىڭشى اناسى كىتاپ ىشىندەگى سۋرەتتى بالاعا كورسەتپەي، وندا نە سالىنعانىن سۋرەتتەپ بەرەدى. سودان سوڭ كىتاپتى جاۋىپ تاستايدى. بالا اناسىنىڭ ايتقانى بويىنشا كىتاپتان سول سۋرەتتى تابۋى كەرەك. ودان كەيىن رولدەرىڭىزبەن اۋىساسىزدار: بالا سۋرەتتەيدى، اناسى ىزدەيدى.
دىبىستاۋ بالالارعا جانە ۇلكەندەرگە ارنالعان كوڭىلدى ويىن ويناۋعا بولادى. ول ءۇشىن جانۇياڭىزبەن تەلەديدار قاراپ وتىرعان ساتتە ونىڭ دىبىسىن جاۋىپ تاستاپ، اركىم جەكە دىبىستاۋ جاسايدى. ول مۋلتفيلم، كينو نەمەسە جاڭالىقتار بولۋى مۇمكىن. بالا ۇلكەندەردى قايتالاپ، ارتىستىك ونەرىن دامىتادى.
ساندار كارتونعا قانىق تۇستەرمەن 1 دەن 10 عا دەيىن جازىڭىز نەمەسە ساندارى بار دايىن شاعىن تەكشەلەردى ءۇي بولمەلەرىنىڭ ءار جەرىنە قويىپ شىعىڭىز. بالانىڭ مىندەتىنە اتا- انا ايتقان ساندى اكەلىپ بەرۋ جاتادى. بالا جۇگىرەدى، ىزدەيدى جانە ۇيرەنەدى.
تابۋ بالانىڭ كوزىن شارفپەن جاۋىپ، قولىنا كەزەكپەن ءتۇرلى زاتتار بەرىڭىز. ول ويىنشىقتار، ىدىس، كىتاپ، ءتۇرلى تاماقتار بولۋى مۇمكىن. بالا ونى يىسكەپ نەمەسە ءدامىن كورۋ ارقىلى قولىنداعى زاتتىڭ نە ەكەنىن تابۋى كەرەك.
قادام بالاعا قادام ساناۋدى تاپسىرما ەتىپ بەرىڭىز. مىسالى، ۇيدەن قاقپاعا، قاقپادان اعاشقا دەيىن، اعاشتان باعاناعا دەيىن، ودان دۇكەنگە دەيىن قانشا قادام دەپ سۇراپ وتىرىڭىز. ودان سوڭ مىنا جەردەن كەلەسىگە دەيىن قانشا قادام ەكەنىن كوزبەن بولجاپ ايتىڭىزدار، سودان سوڭ ونى قاداممەن ساناتىڭىز. بالا مۇنداي جاتتىعۋلاردان سوڭ ارا قاشىقتىقتى ساناۋدى جانە اڭعارۋدى ۇيرەنەدى.
پلاستيلين پلاستيلين - بالانىڭ قيالىن جانە ساۋساق موتوريكاسىن دامىتاتىن امبەباپ قۇرال. بالاڭىزبەن ارىپتەردى زەرتتەڭىز. سودان سوڭ پلاستيليننەن ارىپتەر جاساڭىز. جاقسى شىققان ءارىپ ءۇشىن بالانى ماقتاۋدى ۇمىتپاڭىز. كولەڭكە جانىپ تۇرعان مايشامنىڭ قاسىندا قابىرعاعا كولەڭكە تەاترىن ويناتىڭىز. قولىڭىزبەن قۇستار مەن ءيتتى كورسەتۋمەن شەكتەلمەڭىز، قاعازدان ەرتەگى كەيىپكەرلەرىن جاساپ، ولاردى رولدەرى بويىنشا كورسەتىپ، اڭگىمە قۇراستىرىڭىزدار.
Massaget.kz
