استانا كوشەلەرىنىڭ بىرىنە قايىم مۇحامەدحانوۆتىڭ ەسىمى بەرىلدى
قازاقتىڭ قايسار عالىمىنىڭ ەسىمىمەن استاناداعى ءبىر كوشەنىڭ اتالۋىنا بايلانىستى بۇگىن قازاق تەحنولوگيا جانە بيزنەس ۋنيۆەرسيتەتىندە استانادا «قايىم مۇحامەدحانوۆ - ابايدىڭ ءىنىسى، الاشتىڭ ءىرىسى» اتتى سەمينار ءوتتى. سەمينارعا عالىم عاريفوللا ەسىم، اقىن نەسىپبەك ايت ۇلى، عالىمنىڭ ۇرپاقتارىنان دەگدار قايىم ۇلى، دينا قايىم قىزى مەن قارلىعاش قايىم قىزى قاتىستى.
«تابيعاتىنان تازا، اۋەلگىدەن- اق ءادىل، قايسار عالىم ءارى ۇستازىمىز قايىم مۇحامەدحانوۆتىڭ قۇرمەتىنە بەرىلگەن كوشەنىڭ اشىلۋ سالتاناتىنا جينالىپ وتىرمىز. ءوز ومىرىندە قۋعىن- سۇرگىننىڭ سان ازابىن تارتسا دا، ۇستازى اۋەزوۆتى ۇستاپ بەرمەي، ساتقىندىق جاساماي، تۇرمەگە تۇسكەن، ناعىز عالىمعا ءتان قايسار مىنەز كورسەتكەن قايىم اعامىزعا قاشان دا قۇرمەت كورسەتە ءبىلۋىمىز كەرەك»، - دەدى سەميناردا ءسوز سويلەگەن اقىن نەسىپبەك ايت ۇلى.
قايىم مۇحامەدحانوۆقا بەرىلگەن كوشە ەلوردانىڭ ەسىل اۋدانىندا ورنالاسقان. ناقتىراق ايتقاندا، قورعالجىن تاس جولىمەن قاتارلاس جاتقان كوشە ش. ايتماتوۆ كوشەسىمەن قيىلىسادى.
«قايىم مۇحامەدحانوۆ ابايدىڭ مەكتەبى بولعانىن دالەلدەگەن تۇلعا. سوناۋ قاراۋىلدا وتىرىپ ابايدىڭ بالالارى الەمدىك ماسەلەنى كوتەرەدى. پايعامبار جوق، ادامزات قايدا اداسىپ بارادى؟ الداعى باعىتى قانداي، مىنە، وسىنداي ويلاردى ابايدىڭ اينالاسى ايتا ءبىلدى. بۇل دەگەنىڭىز تاڭعاجايىپ دۇنيە ەمەس پە؟» - دەيدى ءوز سوزىندە عاريفوللا ەسىم.
ايتا كەتسەك، قايىم مۇحامەدحانوۆ 1916 -جىلى 5 - قاڭتاردا سەمەي قالاسىندا دۇنيەگە كەلگەن. كوپ جىل بويى اباي مۇراجايىنىڭ ديرەكتورى قىزمەتىن اتقارعان، «ابايدىڭ ادەبيەت مەكتەبى» تاقىرىبىنا كانديداتتىق ديسسەرتاتسيا قورعاعان. ادەبيەت زەرتتەۋشى عالىم رەتىندە اباي مۇراسىنىڭ تەكستولوگيالىق زەرتتەۋلەرىنە مول ۇلەس قوستى. اباي توڭىرەگىندەگى اتاقتى انشىلەر: كوكباي، اقىلباي، ماعاۋيا تۋرالى، وتكەن زاماننىڭ كەيبىر مۇرالارى جايىندا زەرتتەۋلەر، كولەمدى ماقالالار جازدى. ول - قازاقستاننىڭ مەملەكەتتىك سىيلىعىنىڭ، جازۋشىلار وداعى سىيلىعىنىڭ، حالىقارالىق «الاش» ادەبي سىيلىعىنىڭ جانە حالىقارالىق اباي اكادەمياسىنىڭ (لوندون) التىن مەدالىنىڭ يەگەرى، پروفەسسور، ك س ر و جانە قازاقستان حالىق اعارتۋ ءىسىنىڭ ۇزدىگى. 2004 - جىلى دۇنيە سالعان.
اۆتور: ايان بەكەن ۇلى
