قازاقستانعا جاھاندىق جانجالدار شەشىمىنىڭ جاۋابىن تابۋعا تۋرا كەلەدى - م. ەنچا
مۇنداي پىكىردى بۇگىن نيۋ-يوركتان تىكەلەي بايلانىسقا شىعىپ، قازاقستاندىق ب ا ق وكىلدەرىمەن سۇحباتتاسقان ب ۇ ۇ باس حاتشىسىنىڭ كومەكشىسى ميروسلاۆ ەنچا ءبىلدىردى، دەپ حابارلايدى قازاقپارات.
«وسى ايدا قازاقستان ب ۇ ۇ قاۋىپسىزدىك كەڭەسىنە ءتوراعالىق ەتەدى. بۇل ايرىقشا ماڭىزدى ءرول. ويتكەنى قازاقستان قاۋىپسىزدىك كەڭەسىنىڭ ءتوراعاسى رەتىندە ونىڭ وتىرىسىن شاقىرىپ، كۇن ءتارتىبىن ۇيىمداستىرادى جانە قاۋىپسىزدىك كەڭەسى اتىنان ءسوز سويلەيدى. كەلەسى اپتادا قاۋىپسىزدىك كەڭەسىنىڭ بىرنەشە وتە ماڭىزدى وتىرىسى بولادى. ءبىرىنشىسى - پرەزيدەنت نۇرسۇلتان نازاربايەۆتىڭ قاتىسۋىمەن يادرولىق قارۋسىزدانۋ، سەنىم شارالارى ماسەلەلەرىنە ارنالعان وتىرىس. 19- قاڭتار، جۇما كۇنى ورتالىق ازيا مەن اۋعانستان ماسەلەلەرىنە ارنالعان وتىرىس وتەدى»، - دەدى ميروسلاۆ ەنچا.
سونىمەن قاتار ول سيريا قاقتىعىسىن شەشۋ ماسەلەسىندە قازاقستان ايرىقشا ءرول وينايتىندىعىن، ەلوردادا استانا پروتسەسىنىڭ 8 راۋندى وتكەنىن ايتتى.
«بۇل پروتسەسستىڭ سيرياداعى قاقتىعىس پروبلەمالارى شەشىمىن ىزدەۋدەگى ۇلەسى وتە ۇلكەن. بۇل شيەلەنىستى تومەندەتۋ، دەەسكالاتسيا ايماعىن قۇرۋ جانە ەڭ ماڭىزدىسى اتالعان پروتسەسس ب ۇ ۇ باس حاتشىسىنىڭ ارناۋلى وكىلى ستەففان دە ميستۋرانىڭ جەتەكشىلىگىمەن جەنيەۆادا وتەتىن ساياسي پروتسەسسكە قولداۋ كورسەتەدى»، - دەدى ب ۇ ۇ باس حاتشىسىنىڭ كومەكشىسى.
ميروسلاۆ ەنچانىڭ پايىمىنشا، قازاقستان ورتالىق ازياداعى بەيبىتشىلىك پەن تۇراقتىلىقتى نىعايتۋعا قوسقان ماڭىزدى ۇلەسىن ءتيىمدى پايدالانۋدا.
«بۇل - يادرولىق قارۋسىزدانۋ ماسەلەلەرى، سەمەي يادرولىق پوليگونىن جابۋ، ورتالىق ازياداعى يادرولىق قارۋسىز ايماق قۇرۋ. قازاقستاننىڭ باستاماسىمەن حالىقارالىق يادرولىق سىناقتارعا قارسى ءىس-قيمىل كۇنىنىڭ نەگىزى قالاندى. بۇل باعىتتا قازاقستان قىزمەتىن جالعاستىرۋدا»، - دەدى ول،
ونىڭ ايتۋىنشا، اۋعانستانمەن بايلانىستى قاۋىپسىزدىك ماسەلەلەرىن شەشۋدە دە قازاقستان ايرىقشا رولگە يە.
«اۋعانستان پروبلەماسىن تەك قانا اسكەري جولمەن شەشۋ مۇمكىن ەمەستىگى بارلىعىنا دا تۇسىنىكتى. قايتا وڭىرلىك ىنتىماقتاستىقتى، ينفراقۇرىلىمدىق جوبالاردى قولداۋ قاجەت. ب ۇ ۇ- نىڭ شتاب-پاتەرى قازاقستاننىڭ اۋعانستانعا قولداۋ كورسەتىپ وتىرعانىن، ونىڭ ىشىندە كادرلار دايىنداۋعا جاردەم بەرىپ جاتقانىن جاقسى بىلەدى. كەزىندە ورتالىق ازياداعى پريەۆەنتيۆتى ديپلوماتيا وڭىرلىك ورتالىعىنىڭ باسشىسى بولىپ جۇمىس ىستەگەن كەزىمدە الماتىداعى اۋعان جاستارى ءبىلىم الىپ جاتقان ۋنيۆەرسيتەتتەردە ءدارىس وقىعان ەدىم. مەنىڭشە، بۇل اۋعانستاننىڭ بەيبىت بولاشاعىن قولداۋعا جانە ورتالىق ازياداعى ىنتىماقتاستىقتى دامىتۋعا قوسىلعان ناقتى ۇلەس. وسىلايشا، قازاقستان جاھاندىق بەيبىتشىلىكتى قامتاماسىز ەتۋگە ۇلەس قوسىپ وتىر»، - دەدى ەنچا.
اۆتور: مارلان جيەمباي
