تەرمينولوگيا جۇمىسىن مەملەكەتتىك دەڭگەيدە قولعا الۋ كەرەك - ەردەن قاجىبەك

استانا. قازاقپارات - احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك ەلباسىنىڭ قازاقستان حالقىنا جولداۋى بويىنشا ءوز پىكىرىن ءبىلدىردى، دەپ حابارلايدى قازاقپارات ءتىلشىسى.

عالىمنىڭ پىكىرىنشە، بۇرىنعى جولداۋلارعا قاراعاندا بيىل ەلباسى سيفرلاندىرۋ، جاڭا زاماناۋي تەحنولوگيالار سىندى الدەقايدا جوعارى ماقساتتاردى حالىق الدىنا قويىپ وتىر. بۇل - ەلىمىز بەن مەملەكەتتىڭ بيىكتەي تۇسكەنىنىڭ كورسەتكىشى.

«ەلباسى جولداۋدا تەرمينولوگياعا نازار اۋدارىپ وتىر. شىنىندا دا، تەرمينولوگيا بىزدە - كەنجەلەپ قالعان ءتىل ءبىلىمى سالالارىنىڭ ءبىرى. ءار سالا ءۇشىن تەرمينولوگيا عىلىمىندا دالەلدەنگەن مولشەر بويىنشا، كەمىندە 5 مىڭ، ءارى كەتسە 10-15 مىڭ تەرمين كەرەك ەكەن. قوعامدا 100 سالا بار دەسەك، كەمىندە 500 مىڭ تەرمين كەرەك ەكەن. ال ءبىز سوڭعى 20-25 جىلدا 20-30 مىڭ تەرميندى عانا بەكىتىپ وتىرمىز. ءدال قازىر ۇلتتىق تەرمينولوگيانى، اسىرەسە IT- تەحنولوگيا، يننوۆاتسيالىق باعىتتاعى تەرميندەردى ءبىر جۇيەگە كەلتىرمەسەك، ارتتا قالامىز»، - دەيدى ە. قاجىبەك.

ينستيتۋت ديرەكتورىنىڭ ايتۋىنشا، تەرمينولوگيا - تەك قانا فيلولوگتاردىڭ جۇمىسى ەمەس، بۇل - مەملەكەتتىك دەڭگەيدە قولعا الىناتىن جۇمىس.

«ۇلتتىق تەرمينولوگيانى قالىپتاستىرۋ جۇمىسىنا ەلىمىزدەگى اۋىل شارۋاشىلىق، ءوندىرىس سەكىلدى بارلىق سالالارى بويىنشا ءتيىستى مينيسترلىكتەر، ۆەدومستۆولار، كوميتەتتەر نەمەسە ۇلتتىق كومپانيالار ءوز سالاسى بويىنشا ارنايى توپ قۇرىپ، ءار جاڭا تەرميندى قاراستىرىپ، قابىلداپ، كەڭ تالقىعا سالۋى ءتيىس. نەگىزگى تەرميندەردى جاساۋ، تالقىلاۋ جانە ساراپتاۋ جانە بەكىتۋ راسىمدەرىن، ونىڭ جولدارىن، تارتىپتەرىن، كەستەسىن، جوسپارىن جاساۋى ءتيىس. سول جوسپار بويىنشا بۇكىل ەل بولىپ جۇمىس ىستەۋىمىز كەرەك»، - دەپ ءوز ءسوزىن تولىقتىردى ول.

ەردەن قاجىبەك بىلتىر قاراشا ايىندا ۇكىمەت جانىنداعى ۇلتتىق كوميسسيا جانىنان تەرمينولوگيالىق توپ قۇرىلعانىن، ءبىرقاتار جيىندار وتكەنىن ەسكە سالدى. جاقىن كۇندەرى ارنايى سايت اشىلىپ، بارلىق قازاقستاندىقتاردىڭ تەرمينشى مامانداردىڭ جۇمىسىن قاراۋىنا، قاداعالاۋىنا جانە كەڭەس بەرۋىنە مۇمكىندىك بەرىلمەك.

اۆتور: ايجان سەرىكجان قىزى