بورانعا بايلانىستى توقتاعان استانا اۋەجايى قايتا جۇمىس ىستەي باستادى
«اۋەجاي ساعات 17:00-دە اشىلدى جانە شتاتتىق رەجيمدە ءوز جۇمىسىن باستادى»، - دەدى اۋەجايدىڭ باسپا ءسوز قىزمەتى اگەنتتىك ساۋالىنا.
اۋەجاي جۇمىسى توقتاعان ۋاقىتتا 19 رەيس بوگەلىپ، 27 رەيس توقتاتىلعان. قازىرگى ۋاقىتتا اۋەجايدا جول 350 مەتردەن كورىنىپ تۇر، جەل جىلدامدىعى سەكۋندىنا 14 مەتردى قۇرادى.
بۇعان دەيىن ق ر ينۆەستيتسيالار جانە دامۋ مينيسترلىگى ازاماتتىق اۆياتسيا كوميتەتى نۇرسۇلتان نازاربايەۆ حالىقارالىق اۋەجايىنىڭ جەرىلىكتى ۋاقىتپەن ساعات 17:00-دە ءوز جۇمىسىن باستايتىنىن حابارلاعان ەدى. اۋەجاي قىزمەتى ۇشۋ- قونۋ جولاعى مەن گەيتتەردى قاردان تازارتىپ جاتىر. قار تازالاۋ تەحنيكاسى قارقىندى جۇمىس ىستەپ تۇر.
ازاماتتىق اۆياتسيا كوميتەتىنىڭ مالىمدەۋىنشە، اۋا رايىنىڭ قولايسىزدىعى سالدارىنان «ەير استانا» اۋە كومپانياسىنىڭ 4 رەيسى بوگەلىپ، 30 رەيسى توقتاتىلعان. ونىڭ 14- ءى - حالىقارالىق رەيس بولعان. SCAT اۋە كومپانياسىنىڭ 9 رەيسى كەشىگىپ، 12 رەيسى كەيىنگە قالدىرىلعان.
ەسكە سالا كەتسەك، بەيسەنبى كۇنى تاڭەرتەڭ استانا قالاسىنداعى نۇرسۇلتان نازاربايەۆ حالىقارالىق اۋەجايى اۋا رايىنا بايلانىستى ۇشۋ قاۋىپسىزدىگىن قامتاماسىز ەتۋ ماقساتىندا استانا ۋاقىتىمەن ساعات 13:00-گە دەيىن جابىلدى. كەيىنىرەك، جابىلۋ ۋاقىتى ساعات 15:00-دەن 17:00-گە دەيىن ۇزارتىلدى.
اۆتور: ايجان سەرىكجان قىزى
