استانادا مەكتەپكە شىققان وقۋشى اداسىپ كەتتى

استانا. قازاقپارات - بۇگىن تاڭەرتەڭ استانادا ۇيىنەن مەكتەپكە شىعىپ كەتكەن بالا جوعالىپ كەتتى. استانا قالالىق ءبىلىم باسقارماسىنىڭ ءبولىم باسشىسى مادينا سۇلەيمەنوۆا باق وكىلدەرىنە بوراندا جوعالعان بالانىڭ قالاي تابىلعانىن ايتىپ بەردى، دەپ حابارلايدى قازاقپارات.

 «بالا امان- ەسەن تابىلدى. تاڭەرتەڭگى ساعات 5- ءتىڭ كەزىندە ساباققا بارامىن دەپ ۇيىنەن شىعىپ كەتكەن. جولدا كەلە جاتقان كەزىندە ونى كاماز كولىگىنىڭ جۇرگىزۋشىسى مارات كوبەسوۆ ەسىمدى ازامات كورىپ، ۇيىنە الىپ بارعان. سودان كەيىن ەرىكتىلەرگە حابارلاسىپ، ساباققا بارا جاتقان كىشكەنتاي بالانى كەزىكتىرگەنىن جانە ۇيىنە الىپ كەلگەنىن ايتقان. ول №78 مەكتەپ- گيمنازياسىنىڭ 2 «ع» سىنىبىندا وقيتىن رۋسلان رادجاپوۆ ەسىمدى بالا بولىپ شىقتى. قازىر بالا ءدىن امان اتا- اناسىنىڭ قاسىندا»، - دەدى ول.

ونىڭ ايتۋىنشا، رۋسلان رادجاپوۆ «جاعالاۋ» ىقشام اۋدانىندا جەر ۇيدە تۇرادى.

«بالا تاڭەرتەڭ اكەسىنەن: «ساباققا بارايىن با؟»، - دەپ سۇراعان. ساعاتقا قاراماعان اكەسى ساباققا بارۋىنا رۇقسات بەرگەن. جالپى، بۇل اتا- اناسىنىڭ جاۋاپكەرشىلىگى. قازىرگى ۋاقىتتا جاۋاپتى ورگاندار بالانى قالاي جىبەرىپ قويعاندارىن اتا- اناسىنان سۇراپ جاتىر»، - دەدى مادينا سۇلەيمەنوۆا.

باسقارما وكىلى اۋا رايىنىڭ قولايسىزدىعىنا بايلانىستى ساباق بولمايتىن جاعدايدا تاڭعى ساعات 6.15-كە دەيىن «109» قۇتقارۋ قىزمەتىنە، توتەنشە جاعدايلار دەپارتامەنتىنە، WhatsApp جەلىسى ارقىلى بارلىق مەكتەپ باسشىلارىنا ەسكەرتۋ جىبەرىلەتىندىگىن باسا ايتتى.

اۆتور: مارلان جيەمباي