پرەزيدەنتتىڭ سىنىن مويىندايمىز - ۆيتسە- مينيستر جاقىپوۆا
دەپ حابارلايدى قازاقپارات ءتىلشىسى.
«پرەزيدەنت ءوز جولداۋىندا مينيسترلىكتىڭ جۇمىسىن قاتتى سىنعا الدى. ءبىز ول سىندى تولىعىمەن مويىندايمىز. ول سوزدەردىڭ نەگىزى بار»، - دەدى ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى سۆەتلانا جاقىپوۆا استانادا وتكەن باسپا ءسوز ءماسليحاتىندا.
ونىڭ ايتۋىنشا، وتكەن جىلى مينيسترلىك جۇمىسشى رەتىندە ەشبىر جەردە تىركەلمەگەن ازاماتتاردى انىقتاۋ شارالارىن وتكىزدى. سول كەزدە 18 ميلليون حالىقتىڭ ىشىندە 5,7 ميلليون ادامنىڭ ناقتى الەۋمەتتىك مارتەبەسى جوق بولىپ شىقتى.
«وسى ۋاقىتقا دەيىن ءبىز تەك 2,5 ميلليون ادامدى قۇزىرەتتى مەملەكەتتىك ورگانداردا تىركەدىك. ارينە، اتقارىلعان جۇمىسپەن ماقتانا المايمىز. سەبەبى تاعى 3,2 ميلليون ادام قالدى. ولار كىمدەر؟ مەن قىسقاشا ايتىپ بەرەيىن، 504 مىڭ ادام باسقا ايماققا، ءيا بولماسا، باسقا ەلگە كوشىپ كەتتى. ولار ءوز ۇيلەرىندە بولماي شىقتى. 363 مىڭ ادامنىڭ شىنىمەن دە كوشىپ كەتكەنى راستالدى. قازىر ولارمەن ىشكى ىستەر مينيسترلىگى جۇمىس جاساپ جاتىر. بۇدان بولەك، 123 مىڭ ادام ستۋدەنتپىز دەپ مالىمدەدى. ءبىراق ءبىلىم جانە عىلىم مينيسترلىگىندە ولار تۋرالى مالىمەت جوق. سوسىن 17,5 مىڭ ادام قايتىس بولعان ەكەن»، - دەپ اتاپ كورسەتتى س. جاقىپوۆا.
ايتا كەتەيىك، مەملەكەت باسشىسى نۇرسۇلتان نازاربايەۆ بيىلعى جولداۋدا ءوزىن- ءوزى جۇمىسپەن قامتىپ جۇرگەندەردى تىركەۋ ماسەلەسىنە باسا نازار اۋداردى.
«ءوزىن- ءوزى جۇمىسپەن قامتىعاندار مەن جۇمىسسىزدار ەكونوميكالىق ءوسىمنىڭ رەزەرۆى سانالادى. مەن ءوزىن- ءوزى جۇمىسپەن قامتىعاندار ماسەلەسىن قاراستىرۋ جونىندە بىرنەشە رەت تالاپ قويعانمىن. ەڭبەك جانە حالىقتى الەۋمەتتىك قورعاۋ مينيسترلىگى بۇل ىسكە جاۋاپسىزدىق تانىتىپ، اتءۇستى قاراپ وتىردى. ادامداردى ناتيجەلى جۇمىسقا تارتۋ ءۇشىن كوبىرەك مۇمكىندىك بەرىپ، ولاردىڭ جەكە كاسىبىن باستاۋىنا نەمەسە جاڭا ماماندىق الىپ، جۇمىسقا ورنالاسۋىنا جاعداي جاساۋ كەرەك»، - دەلىنگەن جولداۋدا.
